ސަޕްލިމެންޓަރީ ބަޖެޓުގެ ކަންކަން ސާފުކުރަން މިނިސްޓަރާއި ގަވަރުނަރު ހާޒިރުކުރަނީ

މިއަހަރަށް ފާސްކޮށްފައިވާ ދައުލަތުގެ ބަޖެޓު ފޫބައްދަން ސަރުކާރުން ހުށަހަޅާފައިވާ ސަޕްލިމެންޓްރީ ބަޖެޓް ދިރާސާ ކުރާ ކޮމެޓީއަށް ފިނޭންސް މިނިސްޓަރު މޫސާ ޒަމީރާއި އޮޑިޓާ ޖެނެރަލް ހުސައިން ނިޔާޒީ އަދި މަރުކަޒީ ބޭންކުގެ ގަވަރުނަރު އަހުމަދު މުނައްވަރު ހާޒިރު ކުރަން ނިންމައިފި އެވެ.

މި އަހަރު ބާކީ އޮތް ތަނަށް ހަރަދުކުރާނެ ޖާގަ ބަޖެޓުން ނުލިބޭނެ ކަމުގައި ބެލެވޭތީ ބަޖެޓަށް 5.1 ބިލިއަން ރުފިޔާ އިތުރުކުރުމަށް ސަޕްލިމަންޓަރީ ބަޖެޓެއް ފިނޭންސް މިނިސްޓަރު މޫސާ ޒަމީރު ރައްޔިތުންގެ މަޖިލީހަށް ހުށަހަޅުއްވާފައި ވަނީ މިދިޔަ ބުރާސްފަތި ދުވަހު އެވެ.

އެ ބަޖެޓު ދިރާސާ ކުރުމަށް މަޖިލީހުގައި ވަނީ ކޮމެޓީއެއް އުފައްދާފަ އެވެ. މިއަދު ބޭއްވި ބަޖެޓް ދިރާސާ ކުރާ ކޮމެޓީ ބައްދަލުވުމުގައި އެ ތިން ބޭފުޅުން އެއްކޮށް ހާޒިރުކުރުމަށް ހުށަހެޅުއްވީ ބާރަށު ދާއިރާގެ މެންބަރު އިބްރާހިމް ޝުޖާއު އެވެ. އޭނާ ހުށަހެޅުއްވީ މާދަމާ 2:00 އަށް ތިން ބޭފުޅުން ހާޒިރުކުރުމަށެވެ. ޝުޖާއުގެ ހުށަހެޅުން ކޮމެޓީން ވަނީ ފާސްކޮށްފަ އެވެ.

ކޮމެޓީން މިއަދު ވަނީ އެ ކޮމެޓީގެ މުގައްރިރާއި ނައިބު މުގައްރިރު ވެސް އައްޔަނުކޮށްފަ އެވެ. ކޮމެޓީގެ މުގައްރިރަކަށް އައްޔަނު ކުރީ ފުވައްމުލަކު މެދު ދާއިރާގެ މެންބަރު އަލީ ފަޒާދެވެ. ނައިބަކަށް އައްޔަނު ކުރީ އޭދަފުށީ ދާއިރާގެ މެންބަރު އަހުމަދު ސަލީމެވެ.

ފާއިތުވި އަހަރު ފާސްކުރި މި އަހަރަށް ލަފާކުރާ ދައުލަތުގެ ބަޖެޓު ހަރަދުކުރި ގޮތުގެ ތަފުސީލުތައް ބަޖެޓު ދިރާސާކުރާ އުފައްދާފައިވާ ސަބްކޮމިޓީއަށް ހާމަނުކުރަން ވެސް ނިންމާފައިވެ އެވެ. އެގޮތަށް ނިންމީ އިދިކޮޅު އެމްޑީޕީން އެގޮތަށް އެދުމުންނެވެ. އެމްޑީޕީ މެންބަރުން ވަނީ އެކަމާ ވަރަށް ބޮޑަށް ނުރުހުން ވެސް ފާޅުކޮށްފަ އެވެ.

މިއަހަރަށް ފާސްކޮށްފައި ވަނީ 49.8 ބިލިއަން ރުފިޔާގެ ބަޖެޓެކެވެ. މިއަހަރުގެ ޖޫން މަހުގެ ފަހުން ބަޖެޓުން ކޮށްފައިވާ އެއްވެސް ހަރަދެއްގެ ތަފްސީލު ނޭންގޭ ކަމަށް ބައެއް އިދިކޮޅު މެންބަރުން މިއަދު ވަނީ ވިދާޅުވެފަ އެވެ.