"ދިޔަވަރު" ނޫހާ މެދު ސަމާލުވާން މީޑިއާ ކައުންސިލްގެ ޕަބްލިކް އެޑްވައިޒަރީއެއް

ސަރުކާރަށް ވަރަށް ބޮޑަށް ފާޑުކިޔައި، ހަގީގަތާ ހިލާފު އެތައް ލިޔުމެއް ޝާއިރުކުރަމުންދާ "ދިޔަވަރު" ނޫހާ ދެކޮޅަށް މީޑިއާ ކައުންސިލުން ޕަބްލިކް އެޑްވައިޒަރީއެއް ނެރެފި އެވެ.

"dhiyavaru.com" ގެ ނަމުގައި ހިންގާ މި ވެބްސައިޓަކީ މީޑިއާ ކައުންސިލުގައި ރަޖިސްޓްރީ ނުކޮށް ހިންގާ ނޫހެކެވެ. ސަރުކާރާއި ސަރުކާރު ހިއްސާ އޮންނަ ކުންފުނިތަކާއި އެކިއެކި އިދާރާތަކާ ގުޅޭ ވައްކަމާއި ކޮރަޕްޝަންގެ ވާހަކަތަކާއި މީހުންގެ އަބުރަށް އުނިކަން އަންނަ ފަދަ ކޮންޓެންޓް މި ވެބްސައިޓުގައި ހުރެ އެވެ. 

މީޑިއާ ކައުންސިލުން ބުނީ އެ ކައުންސިލަށް މިއަހަރުގެ މިހާތަނަށް 77 ޝަކުވާއެއް ލިބިފައިވާއިރު، އޭގެ ތެރެއިން 63 ޝަކުވާ އަކީ ދިޔަވަރު ވެބްސައިޓުގައި ޝާއިއުކޮށްފައިވާ ލިޔުންތަކާ ގުޅޭ ޝަކުވާ ކަމަށެވެ. މި ޝަކުވާތަކާ ގުޅިގެން އެ ކައުންސިލްގެ ޝަކުވާ ބަހާ ކޮމިޓީން ވެބްސައިޓު ބެލިއިރު، ކައުންސިލްގެ ގާނޫނާއި ގަވާއިދާ ހިލާފު އެތައް ލިޔުމެއް ޝާއިއުކޮށްފައިވާކަން ފާހަގަވެފައިވާ ކަމަށް ވެސް ބުނެފައިވެ އެވެ.

"އެފަދަ ލިޔުންތަކުގެ ސަބަބުން އާންމުންނަށް ހަގީގަތް އެނގުމުގެ ހައްގާއި އަބުރު ރައްކާތެރި ކުރުމުގެ ހައްގަށް އުނިކަން ލިބި، މުޖުތަމައުގައި ގިނަ އަދަދަށް މިސް އިންފޮމޭޝަން ފެތުރިގެން ދިއުމުގެ މައްސަލަތައް ދިމާވަމުން އަންނަކަން ކައުންސިލަށް ވަނީ ފާހަގަކުރެވިފަ އެވެ." މީޑިއާ ކައުންސިލުން ޕަބްލިކް އެޑްވައިޒަރީ ނެރެން ނިންމި ސަބަބު ސާފުކޮށްދެމުން ބުނެފައިވެ އެވެ.

ރަޖިސްޓްރީ ނުކޮށް ހިންގާ މީޑިއާތަކަށް ފިޔަވަޅު އެޅުމުގެ ބާރު، ގާނޫނުން މީޑިއާ ކައުންސިލަށް ލިބިފައިވެ އެވެ. ނަމަވެސް ކައުންސިލުން ބުނީ އެފަދަ މީޑިއާތަކުގެ މައްސަލަ ބަލައި ފިޔަވަޅު އަޅާނެ ގޮތެއް ނުވަތަ އެޅޭނެ ފިޔަވަޅެއް ގާނޫނާއި ގަވާއިދުގައި ބަޔާންކޮށްފައި ނޯންނަ ކަމަށެވެ. އެފަދަ ވެބްސައިޓުތައް ބްލޮކް ކުރުމަކީ ލިބޭނެ ހައްލެއް ނޫން ކަމަށާއި، އެފަދަ ފިޔަވަޅެއް އަޅައިފިނަމަ ރާއްޖެ ޕްރެސް އިންޑެކްސްގައި ވަރަށް ބޮޑަށް ދަށަށް ދާނެ ކަމަށެވެ،

އެހެންކަމުން ކައުންސިލަށް ކުރެވޭނެ ކަމަކީ އެފަދަ ވެބްސައިޓުތަކާމެދު އާންމުން ހޭލުންތެރިކުރުން ކަމަށް ކައުންސިލުން ބުންޏެވެ.  

ދިޔަވަރު ނޫހާ ދެކޮޅަށް ކައުންސިލަށް ހުށަހަޅާފައިވާ ޝަކުވާ ތަކާ ގުޅިގެން ފާހަގަވެފައިވާ ކަންކަން ވެސް މީޑިއާ ކައުންސިލުން ވަނީ ހިއްސާކޮށްފަ އެވެ. އެގޮތުން؛

މިއީ ސީދާ ރައީސުލްޖުމްހޫރިއްޔާ އާއި ސަރުކާރާ ދެމެދު ނަފްރަތު އުފައްދަން ޝާއިއުކުރާ ދޮގު ހަބަރު ކަމަށް ރައީސް އޮފީހުން ހުށަހަޅާ މައްސަލަތަކުގައި ފާހަގަކޮށްފައިވާ ކަމަށް ކައުންސިލުން ބުނެފައިވެ އެވެ.

އެ ނޫހުން އާންމުކޮށްފައި ހުންނަ ކޮންޓެންޓަކީ ތެދެއް ކަމެއް ދޮގެއް ކަމެއް ނޭންގެ އެވެ. ނަމަވެސް ސަރުކާރާ ދެކޮޅު ފަރާތްތަކުގެ މެދުގައި އެ ނޫހަކީ މަގުބޫލު ނޫހެކެވެ. އެކްސްގައި ވެސް އެ ނޫހުން ޝާއިއުކުރާ ލިޔުންތަކާއި އާންމުކުރާ ފޮޓޯ އަދި ވީޑިއޯ ވަރަށް ބޮޑަށް ވައިގައި ހިފަ އެވެ. ކައުންސިލުން ބުނީ މި ޕަބްލިކް އެޑްވައިޒަރީ ނެރުނީ އާންމުން އެކަންކަމަށް ހޭލުންތެރި ކުރުވަން ކަމަށެވެ.