ފާއިތުވި ދިހަ އަހަރު ޓޫރިޒަމް ބޭނުމަށް އެންމެ ގިނަ ރަށް ދޫކުރީ ރ.އަތޮޅުން

ފަތުރުވެރިކަމުގެ ބޭނުމަށް ފާއިތުވި ދިހަ އަހަރު ދޫކޮށްފައިވާ ރަށްތަކުގެ ތެރެއިން އެންމެ ގިނަ ރަށް ދޫކޮށްފައިވަނީ ރ.އަތޮޅުންކަން ޓޫރިޒަމް މިނިސްޓްރީގެ ހިސާބުތަކުން ދައްކައިފި އެވެ. 

"މިރާ"އިން އެދިގެން ފަތުރުވެރިކަމާ ބެހޭ ވުޒާރާއިންވަނީ 2013 ވަނަ އަހަރުން ފެށިގެން 2024 ވަނަ އަހަރުގެ އޯގަސްޓުގެ ނިޔަލަށް ޓޫރިޒަމްގެ ބޭނުމަށް ދޫކޮށްފައިވާ ފަޅާއި ފަޅުރަށްތަކުގެ ތަފުސީލު ހިއްސާކޮށްފަ އެވެ. 

މިިނިސްޓްރީން ހިއްސާކުރި ހިސާބުތަކަށް ބަލާއިރު އެ މުއްދަތުގައި ޖުމްލަ 58 ރަށް ޓޫރިޒަމްގެ ބޭނުމަށް ދޫކޮށްފައިވެ އެވެ. އޭގެ ތެރެއިން އެއް އަތޮޅަކުން އެންމެ ގިނަ ރަށް ދޫކޮށްފައިވަނީ ރ.އަތޮޅުންކަން އެނގެ އެވެ. 

ޓޫރިޒަމް މިނިސްޓްރީގެ ތަފާސްހިސާބުތައް ދައްކާ ގޮތުން މިވަގުތުވެސް ރ.އަތޮޅުގައި 19 ރިސޯޓެއް ގެންދަނީ އޮޕަރޭޓުކުރަމުންނެވެ. އޭގެ އިތުރަށް 2013 އިން 2024 ގެ އޯގަސްޓުގެ ނިޔަލަށް އެ އަތޮޅުން ހަ ރަށެއް ރިސޯޓު ހެދުމަށް ދޫކޮށްފައިވެ އެވެ.

ރ.އަތޮޅުން ރިސޯޓު ހެދުމަށް ދޫކުރި ހަ ރަށުގެ ތެރެއިން އެއްވެސް ރަށެއް މި އަހަރުގެ ސެޕްޓެންބަރު މަހުގެ ނިޔަލަށް އޮޕަރޭޝަނަށް ގެނެވިފައިނުވާކަން މިނިސްޓްރީގެ ހިސާބުތަކުން އެނގެ އެވެ. 

ފާއިތުވި ދިހަ އަހަރުގެ ތެރޭގައި ރިސޯޓު ތަރައްގީކުރުމަށް ޖުމްލަ 58 ރަށް ދޫކުރި ނަމަވެސް އެ ރަށްތަކުގެ ތެރެއިން މިހާތަނަށް އޮޕަރޭޝަނަށް ގެނެވިފައިވަނީ އެންމެ ނުވަ ރަށްކަން މިނިސްޓްރީން ހިއްސާކުރި ހިސާބުތަކުން ދައްކަ އެވެ.