ތޯރިގު ވިދާޅުވީ ތަފާތެއް | އެމްޑީޕީން ސަޕްލިމެންޓްރީ ބަޖެޓު މަޖިލީހަށް ގެންނަނީ ހަރަދުކޮށްފަ

މަހިބަދޫ ދާއިރާގެ މެންބަރު އަހުމަދު ތޯރިގު މަޖިލީހުގައި މިއަދު ވިދާޅުވެއްދެއްވީ ނިމިދިޔަ އެމްޑީޕީ ސަރުކާރުން ތަކުރާރުކޮށް އަމަލު ކުރަމުން ދިޔަ "ގޯސް ޕްރެކްޓިސް" އެއްގެ ވާހަކަ އެވެ. އޭރުގެ މަޖިލީހުގެ ރައީސް މުހައްމަދު ނަޝީދު ތަކުރާރުކޮށް އެ ވާހަކަ ދައްކަވަ އެވެ. އެކަމަކު އޭރުގެ ފިނޭންސް މިނިސްޓަރު އިބްރާހިމް އަމީރު ކޮންމެ އަހަރަކު އެކަން ތަކުރާރު ކުރައްވަ އެވެ. އެއީ ސަޕްލިމެންޓްރީ ބަޖެޓު މަޖިލީހަށް ފޮނުވާއިރު އޭގެ ބޮޑުބައި ހަރަދުކޮށް ހުސްކޮށްލާފައި ހުރުމެވެ.

މަޖިލީހުގައި މިއަދު އޮތް ސަޕްލިމެންޓްރީ ބަޖެޓުގެ ބަހުސްގައި ވާހަކަ ދައްކަވަމުން އެކައުންޓިން ދާއިރާ އިން މަތީ ތައުލީމް ހާސިލް ކުރައްވައިގެން ހުންނެވި މަހިބަދޫ ދާއިރާގެ މެންބަރު ތޯރިގު ވިދާޅުވި ގޮތުގައި ސަޕްލިމެންޓްރީ ބަޖެޓު ހުށަހެޅުމަކީ މައްސަލައެއް ނޫން ކަމަށާ ނަމަވެސް ތަފާތަކީ އެމްޑީޕީ ސަރުކާރުން ބަޖެޓު ހުށަހަޅަނީ ހަރަދު ކުރުމަށްފަހު އެވެ.

"އޭރު [އެމްޑީޕީ ވެރިކަމުގަ] ފަސް ބިލިއަން ރުފިޔާގެ ބަޖެޓު ފާސްކުރަން މަޖިލީހަށް ގެންނައިރު އޮންނާނީ ދެ ބިލިއަން ހަރަދުކޮށްފަ. މާލިއްޔަތު ގާނޫނުންވެސް ބާރުދެނީ މަޖިލީހުން ފާސް ނުކުރާ އެއްޗެއް ހަރަދެއް ނުކުރެވޭނެއޭ. އެކަމަކު އެމްޑީޕީން ހޭދަ ކުރަމުން ދިޔައީ މަޖިލީހުން ފާސްނުކޮށް،" ތޯރިގު ވިދާޅުވި އެވެ.

ތޯރިގު ވިދާޅުވީ ފަސް ބިލިއަން އިތުރަށް ހަރަދު ކުރަން ޖެހުނީ ފައިސާ ޗާޕު ކުރުމުގެ ސަބަބުން ކަމަށެވެ. އެ ފައިސާ ޗާޕު ކުރުމުން ފިނޭންސް މިނިސްޓަރަށް މުސާރަ ދިނުމާއި މަޝްރޫއު ހިންގަން ވަރަށް ފަސޭހަވެ އެވެ. އެކަމަކު ތޯރިގު ވިދާޅުވި ގޮތުގައި މި ގޮތަށް އަމަލު ކުރުމުގެ ނަތީޖާއަކީ ކަންކަން ގޯސްވުމެވެ.

"މިއޮތީ އާހިރުގައި އެ ނަތީޖާ ފެންނަން. މިދިޔަ އަހަރަކީ ރިޔާސީ އިންތިހާބުގެ އަހަރު. މިދިޔަ އަހަރު އަށް ބިލިއަންގެ މަޝްރޫއު ހިންގިކަމަށް ބުނެ ޕްރޮޖެކްޓް ހަވާލުކުރި. އެ ޕްރޮޖެކްޓްތަކެއް ނުހިނގަ، އޭރުގަ ރައީސް ނަޝީދު ވިދާޅުވި ރަށްރަށުގެ ބަނދަރުމަތީގައި ވެލިފުނިތަކެއް އެބަ ހުއްޓޭ. ކަމެއް ނުހިނގައޭ. އެ ވެލިފުނިތަކަށް ވެސް ކޮންމެވެސް އަގެއް ދޭން ޖެހޭ. އަދި ފައިސާ ނުދެވުނީތީ އެމީހުން ކްލެއިމް ކުރޭ އެބަ ފައިސާ އަށް،" ތޯރިގު ވިދާޅުވި އެވެ.