ތިން މިނިސްޓަރުންނަށް ރުހުން ދޭން ކޮމެޓީން ފާސްކޮށްފި
މި ބޭފުޅުންނަށް ރުހުން ހޯއްދަވަން ރައީސް މަޖިލީހަށް ފޮނުއްވި މައްސަލަ ދިރާސާ ކުރެއްވުމަށްފަހު ކޮމެޓީގެ އިއްތިފާގުން މިއަދު ނިންމާފައި ތިން މިނިސްޓަރުންނަށް ވެސް ރުހުން ދިނުމަށެވެ.
ކެބިނެޓަށް ގެނައި ބަދަލުގައި، ތިން މިނިސްޓްރީއަކަށް އަލަށް އައްޔަނު ކުރި މިނިސްޓަރުންނަށް ރުހުން ދިނުމަށް ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމެޓީން މިއަދު ފާސްކޮށްފި އެވެ.
މިދިޔަ ސެޕްޓެމްބަރު މަހުގެ 30 ވަނަ ދުވަހު ކެބިނެޓަށް ރައީސް ޑރ. މުހައްމަދު މުއިއްޒު ގެންނެވި ބަދަލާއެކު ފިނޭންސް މިނިސްޓަރުގެ މަގާމުގައި ހުންނެވި މުހައްމަދު ޝަފީގުގެ މަގާމު ވަނީ ގެއްލިވަޑައިގެންފަ އެވެ. ފިނޭންސް، ފޮރިން އަދި ހެލްތު މިނިސްޓްރީއަށް ރައީސް ވަނީ ބަދަލު ގެންނަވާފަ އެވެ.
އެބަދަލަކީ؛
- އަބްދުﷲ ހަލީލް - ފޮރިން މިނިސްޓަރު
- ނާޒިމް އިބްރާހިމް - ހެލްތު މިނިސްޓަރު
- މޫސާ ޒަމީރު - ފިނޭންސް މިނިސްޓަރު
މޫސާ ޒަމީރު ކުރިން ހުންނެވީ ފޮރިން މިނިސްޓަރަށެވެ. ހަލީލް ހުންނެވީ ހެލްތުގަ އެވެ. ކެބިނެޓަށް އަލަށް އައްޔަނު ކުރެއްވީ ނާޒިމް އެވެ.
މި ބޭފުޅުންނަށް ރުހުން ހޯއްދަވަން ރައީސް މަޖިލީހަށް ފޮނުއްވި މައްސަލަ ދިރާސާ ކުރެއްވުމަށްފަހު ކޮމެޓީގެ އިއްތިފާގުން މިއަދު ނިންމާފައި ތިން މިނިސްޓަރުންނަށް ވެސް ރުހުން ދިނުމަށެވެ.
ތިން ބޭފުޅުންގެ މައްސަލައެއް އޮތްތޯ ކަމާ ގުޅުން ހުރި އިދާރާތަކަށް ހުށަހެޅުމުން، މައްސަލައެއް ނެތް ކަމަށް ކޮމެޓީގައި ވަނީ ފާހަގަކޮށްފަ އެވެ. މައުލޫމާތު ސާފުކުރި އިދާރާތަކުގެ ތެރޭގައި އެންޓި ކޮރަޕްޝަން ކޮމިޝަނާއި ޖުޑިޝަލް އެޑްމިނިސްޓްރޭޝަން އަދި މޯލްޑިވްސް ކަރެކްޝަނަލް ސާވިސް ހިމެނެ އެވެ.
މިއީ ރައީސް މުއިއްޒުގެ ކެބިނެޓަށް ބަދަލު ގެންނެވި ފުރަތަމަ ފަހަރެވެ. ނަމަވެސް މީގެ ކުރީން ސަރުކާރުގެ އެހެން މަގާމުތަކަށް ބަދަލުތައް ގެނެސްފައިވެ އެވެ. އެގޮތުން ސްޓޭޓް މިނިސްޓަރުންނާއި ނާއިބުންނާއި ކުންފުނިތަކުގެ ވެރީން އަދި ސިޔާސީ މަގާމުތަކުގައި ތިއްބެވި ބައެއް ބޭފުޅުން މަގާމުތަކުން ވަކި ކުރައްވާފައިވެ އެވެ.
ކޮމެންޓް
Republic of Maldives