ސިޔާސީ މުވައްޒަފުންނަށް ހަރަދުކުރަނީ ޕޭރޯލުގެ %4، ބަޖެޓުގެ %1

ސަރުކާރުގެ ސިޔާސީ މަގާމުތަކުގައި ތިބި މުވައްޒަފުންގެ މުސާރައަކީ ދައުލަތުގެ ސަރުކާރުގެ މުޅި މުސާރައާއި އިނާޔަތްތަކަށް ކުރާ ހޭދައިގެ 4 އިންސައްތަ ކަމަށާއި، އެއީ މުޅި ބަޖެޓުގެ އެންމެ އިންސައްތައެއް ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެ އެވެ. 

މި އަހަރަށް ލަފާކުރި ބަޖެޓުގެ ބޭރުން ކުރިއަށް އޮތް މަސްތަކުގައި ހަރަދުކުރަންޖެހޭނެކަމަށް ލަފާކުރެވޭތީ ސަރުކާރުގެ ފަރާތުން މިއަދު ހުށަހެޅި ސަޕްލިމެންޓަރީ ބަޖެޓުގެ ބަޔާން އިއްވަވަމުން މިނިސްޓަރު ވިދާޅުވީ ސަރުކާރު ހިންގުމުގެ ހަރަދުތައް ކުޑަކުރުމަށްވެސް ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ އިސްނެންގެވުމަށް ފިޔަވަޅުތަކެއް އަޅާފައިވާ ކަމަށެވެ. 

ސަރުކާރުގެ ސިޔާސީ މުވައްޒަފުންގެ މުސާރައިގެ ދިހަ އިންސައްތަ ދެ އަހަރުގެ މުއްދަތަކަށް އުނިކުރުމަށް ނިންމަވައި، މިނިވަން މުއައްސަސަތަކާއި ޖުޑީޝަރީއާއި ރައްޔިތުންގެ މަޖިލީހުގެ މެންބަރުންގެ މުސާރަތަކުން ދިހަ އިންސައްތަ އުނިކުރައްވަން ހުށަހަޅުއްވަން ރައީސް ނިންމަވާފައިވެ އެވެ. އަދި އެމަނިކުފާނުގެ އަމިއްލަފުޅު މުސާރައިގެ ދެބައިކުޅަ އެއްބައި ނުނަންގަވަން ނިންމަވާފައިވެ އެވެ. 

އެ ނިންމެވުންތަކަށް އިޝާރާތްކުރައްވައި ޒަމީރު ވިދާޅުވީ ދަތުރުފަތުރާއި ހަފުލާތައް ބޭއްވުން ފަދަ ކަންކަމަށް ކުރާ ހަރަދުތައް ހިފަހެއްޓުމަށް ގިނަ ކޮންޓުރޯލުތަކެއްގެ ތެރެއިން ކުރަމުންދާ މަސައްކަތުން ނަތީޖާ ފެންނަމުންދާ ކަމަށެވެ. އަދި ރޭ ރައީސް އިއުލާނުކުރެއްވި ފިޔަވަޅުތަކަކީވެސް ދައުލަތުގެ ހިންގުމުގެ ހަރަދުތައް ކުޑަކުރެއްވުމަށް އަޅުއްވަން ނިންމަވާފައިވާ ފިޔަވަޅުތަކުގެ ތެރެއިން ނިންމެވި ނިންމެވުމެއް ކަމުގައި ޒަަމީރު ވިދާޅުވި އެވެ. 

"އަދި ރައީސުލްޖުމްހޫރިއްޔާ ޑޮކްޓަރ މުޙައްމަދު މުއިއްޒު ރޭ އިއުލާންކުރެއްވި ސިޔާސީ މަގާމުތަކުގައި ތިއްބެވި ފަރާތްތަކާއި، ބައެއް މުއައްސަސާތަކުގެ ވެރިންނާއި، ސަރުކާރު ހިއްސާވާ ކުންފުނިތަކުގެ ބައެއް މުވައްޒަފުންގެ މުސާރަތައް ދެ އަހަރު ދުވަހުގެ މުއްދަތަށް ދައްކުރަން ނިންމަވާފައިވާ ނިންމުމަކީވެސް މިގޮތުން އެޅިފައިވާ ފިޔަވަޅެއް.،" މިނިސްޓަރު ވިދާޅުވި އެވެ. 

އަދި ޒަމީރު ވިދާޅުވީ ސިޔާސީ މުވައްޒަފުންގެ މުސާރައަކީ ދައުލަތުން މުވައްޒަފުންގެ މުސާރައާއި އިނާޔަތްތަކަށް ކުރާ ހޭދައިގެ އެންމެ ހަތަރު އިންސައްތަ ނަމަވެސް އަދި އެއީ ބަޖެޓުގެ އެންމެ އިންސައްތަައެއް ނަމަވެސް އެ މުވައްޒަފުން މުސާރަ ކުޑަކުރައްވަން ރައީސް ނިންމެވީ މާލީ ދެމެހެއްޓެނެވިކަން އިއާދަކުރުމަށް ކުރާ މަސައްކަތުގައި ފުރިހަމައަށް ބައިވެރިވުމާއެކު ސަރުކާރުން ކުޑަ ނަމަވެސް ފިޔަވަޅެއް އެޅެން އޮތްނަމަ އެކަމެއް ކުރުމުގެ ބޭނުމުގައި ކަމަށެވެ. 

"ސިޔާސީ ފަރާތްތަކުގެ މުސާރައަށް ކުރާ ހޭދައަކީ ސަރުކާރުގެ މުޅި މުސާރައާއި އިނާޔަތްތަކަށް ކުރާ ހޭދައިގެ ހަތަރު އިންސައްތަ ކަމުގައިވީނަމަވެސް، މި ބަދަލު ގެނައީ ފިސްކަލް ދެމެހެއްޓެނިވިކަން އިއާދަކުރަން ކުރަމުންދާ މަސައްކަތުގައި ފުރިހަމައަށް ބައިވެރިވެ، ކުޑަ ނަމަވެސް އެޅެންހުރި ހުރިހާ ފިޔަވަޅުތަކެއް އެޅުމުގެ ބޭނުމުގައި.،" ޒަމީރު ވިދާޅުވި އެވެ.