މިމަހު އެންމެ ބޮޑު އެއް ސާވިސް ޗާޖު އިތާފުށީ މުވައްޒަފުންނަށް

ރާއްޖޭގެ އެންމެ ގިނަ މުވައްޒަފުން ގެންގުޅޭ އެއް ރިސޯޓް ކަމަށްވާ ވޮލްޑޯފް އެސްޓޯރިއާ، އިތާފުށި މޯލްޑިވްސްގެ މުވައްޒަފުންނަށް މިމަހު ވެސް ލިބުނު ސާވިސް ޗާޖު 1،000 ޑޮލަރަށްވުރެ ބޮޑެވެ.

"މިރާ" އަށް އެނގިފައިވާ ގޮތުގައި ގާތްގަނޑަކަށް 700 އަށްވުރެ ގިނަ މުވައްޒަފުން މަސައްކަތް ކުރާ އިތާފުށި ރިސޯޓުގެ ކޮންމެ މުވައްޒަފަކަށް ވަނީ މިމަހުވެސް 1.060.51 ޑޮލަރު ސާވިސް ޗާޖުގެ ގޮތުގައި ލިބިފަ އެވެ. މުޅި އަހަރު ދުވަހަށް ބަލާއިރު މި ރިސޯޓުގެ މުވައްޒަފުންނަށް ލިބުނު ސާވިސް ޗާޖު އުޅެނީ އެވެރެޖުކޮށް މަހަކު  1400 ޑޮލަރުގަ އެވެ. މި ރިސޯޓް ހިމެނެނީ މިމަހު އެންމެ ބޮޑު ސާވިސް ޗާޖެއް ލިބުނު ރިސޯޓަށެވެ. 

ރާއްޖޭގެ ބައެއް ރިސޯޓުތަކަށް މިދިޔަ މަހު ސާވިސް ޗާޖުގެ ގޮތުގައި ލިބުނު އަދަދު ވަރަށް ކުޑަ އެވެ. ބަައެއް ރިސޯޓްތަކުގެ މުވައްޒަފުންނަށް މިދިޔަ ސެޕްޓެމްބަރު މަހު ސާވިސް ޗާޖުގެ ގޮތުގައި 200 ޑޮލަރު ވަރު ލިބިފައިވެ އެވެ. ނަމަވެސް އިތާފުށި ރިސޯޓުގައި މަަސައްކަތް ކުރާ މުވައްޒަފުންނަށް މިދިޔަ މަހު ވެސް ސާވިސް ޗާޖު އުޅެނީ 600 ޑޮލަރުން މަތީގަ އެވެ.  މި އަހަރު އެ ރިސޯޓުގެ މުވައްޒަފުންނަށް ޖެނުއަރީ މަހު 2.800 ޑޮލަރުގެ ސާވިސް ޗާޖެއް ލިބިފައިވެ އެވެ.