ދެ މިލިއަން ނަމްބަރާ ގާތަށް | ޖުމްލަ އަދަދު 1.6 މިލިއަނުން މައްޗަށް

ރާއްޖޭގެ ދެ މިލިއަން ޓޫރިސްޓުން ގެންނަން ކުރަމުންދާ ދަތުރުގައި ރާއްޖެ އަށް ޒިޔާރަތް ކުރި ޓޫރިސްޓުންގެ އަދަދު 1.6 މިލިއަން ފަހަނަ އަޅައިފި އެވެ. 

ޓޫރިޒަމް މިނިސްޓްރީގެ ހިސާބުތައް ދައްކާ ގޮތުގައި މިއަދުގެ ނިޔަލަށް ރާއްޖެއަށް ވަނީ 1,603,287 ޓޫރިސްޓުން ޒިޔާރަތް ކޮށްފަ އެވެ. މި އަދަދަށް އައުމާއެކު ރާއްޖޭން ދެ މިލިއަން ޓޫރިސްޓުންގެ ޓާގެޓަށް ދާން ބާކީ ބޭނުންވަނީ 396,713 މީހުންނެވެ. މި އަހަރު ނިމެން ބާކީ ދެ މަހާއި ދުވަސްކޮޅެއް އޮތްއިރު މިހާރު ދުވާލެއްގެ މައްޗަށް ޓޫރިސްޓުން އަންނަ އަދަދުން އަންދާޒާ ކުރެވޭ ގޮތުގައި ޑިސެމްބަރު މެދުތެރޭގައި ދެ މިލިއަން ހަމަވާނެ އެވެ. މިހާރުގެ އަންދާޒާއަކީ ދުވާލަކު ގާތްގަނޑަކަށް 6،600 ޓޫރިސްޓުން އައިސްފިނަމަ މި އަދަދު ހަމަވާނެ އެވެ. 

މިދިޔަ ދެ ތިން ދުވަހު ޓޫރިސްޓުން ދުވާލެއްގެ މައްޗަށް ރާއްޖެ އަންނަ ޓޫރިސްޓުންގެ އަދަދު 6،000 ފަހަނަ އަޅާ ގޮސްފައިވެ އެވެ. އެގޮތުން މިމަހުގެ 20 ވަނަ ދުވަހު 7،000 ޓޫރިސްޓުން އައިސްފައިވެ އެވެ. މިއީ މިދިޔަ ދެ މަހުގެ ތެރޭގައިވެސް ޑެއިލީ އެރައިވަލްސް 7،000 ފަހަނަ އެޅި ފުރަތަމަ ފަހަރެވެ. މިހާރު ރާއްޖެއަށް އެވްރެޖުކޮށް ދުވާލެއްގެ މައްޗަށް އަންނަ ކަމަށް ދައްކަނީ  5,435 ޓޫރިސްޓުންނެވެ. 

ޓޫރިސްޓުން އެންމެ ގިނައިން އަންނަ ގައުމުތަކުގެ ކުރީގައި އަދިވެސް އޮތީ ޗައިނާ އެވެ. އެ ގައުމުން 235,765 ޓޫރިސްޓުން އައިސްފައިވެ އެވެ. އަދި ދެވަނާގައި އޮތް ރަޝިއާއިން 176,185 ޓޫރިސްޓުން ވަނީ ރާއްޖެ އައިސްފަ އެވެ. މީގެ އިތުރުން ދެ މިލިސްޓުގައި އުޅެނީ ޔޫރަޕުގެ ގައުމުތަކެވެ. ޔޫކޭ އާއި ޖަރުމަނު އަދި އިޓަލީގެ މީގެ ތެރޭން ކޮންމެ ގައުމަކުން އަންނަ ޓޫރިސްޓުންގެ އަދަދު ވަނީ އެއް ލައްކަ ފަހަނަ އަޅާފަ އެވެ. އަދި މިނޫން ގައުމުތަކުގެ ތެރޭން އެންމެ ބޮޑު ކުރިއެރުމެއްގައި އުޅެނީ  އިންޑިއާ އެވެ. އެ ގައުމުން އައި ޓޫރިސްޓުންގެ އަދަދު ވަނީ 96,793 އަށް އަރާފަ އެވެ.