ނައީމާގެ މަރު: ރިފާސް ވެސް ދައުވާތަކަށް އިންކާރު ކޮށްފި

ނ. މަނަދޫގައި އަނިޔާވެރި ގޮތަކަށް މަރާލާފައި އޮއްވާ ފެނުނު އެރަށު އަންނާރުމާގޭ ނައީމާ މޫސާ، 62، ގެ މަރުގެ މައްސަލައިގައި ދައުވާ ކޮށްފައިވާ އަބްދުލްވާހިދު ރިފާސް ދައުވާތަކަށް އިންކާރު ކޮށްފި އެވެ.

ނައީމާ މަރާލި މައްސަލައިގައި ދައުލަތުން ދައުވާކޮށްފައި ވަނީ އެރަށު ތިން ޒުވާނުން ކަމަށްވާ އަބްދުލްވާހިދު ރިފާސް އާއި އަހުޒަމް އަބްދުއްޝުކޫރާއި ހަސަން ފަވާޒުގެ މައްޗަށެވެ. ތިން މީހުންގެ މައްޗަށް އުފުލާފައި ވަނީ ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދައުވާ އާއި މައްޔިތާގެ ބޭނުން ނަހަމަ ގޮތުގަ ބޭނުން ކުރުމުގެ ކުށުގެ ދައުވާ އަދި އަދުލު އިންސާފު ގާއިމް ކުރަން ހުރަސް އެޅުމުގެ ކުށުގެ ދައުވާ އެވެ.

ތިން މީހުންގެ މައްޗަށް ވަކިވަކިން ހިންގާ ޝަރީއަތުގައި މީގެ ކުރިން އަހުޒަމް އަދި ފަވާޒް ވަނީ ދައުވާތަކަށް އިންކާރު ކޮށްފަ އެވެ. ރިފާސްގެ މައްޗަށް ކުރިން ދައުވާތައް އިއްވި ނަމަވެސް އޭނާ ޖަވާބުދާރީވެފައެއް ނުވެ އެވެ.

މިއަދު ކްރިމިނަލް ކޯޓުގައި ބޭއްވި އަޑުއެހުމުގައި އޭނާ ވަނީ ތިން ދައުވާއަށް ވެސް އިންކާރު ކޮށްފަ އެވެ. އޭނާ ބުނެފައި ވަނީ ދައުލަތުން ދައުވާތަކުގައި ބުނާ އެއްވެސް އަމަލެއް އޭނާ ހިންގާފައި ނުވާނެ ކަމަށެވެ.

މީގެ ކުރިން އޮތް އަޑުއެހުމުގައި ދައުވާތައް އިއްވަމުން ދައުލަތުން ބުނެފައި ވަނީ ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ދައުވާ ކުރަނީ އޭޕްރީލް 6، 2023 ދުވަހުގެ ދަންވަރު ނައީމާ ދިރިއުޅޭ ގެއަށް ވަދެ، ކަރަށާއި ބުރަކަށީގެ އެކި ތަންތަނަށް ހަމަލާދީގެން ނައިމާ މަރާލާފައިވާތީ ކަމަށެވެ. ކަރަށް ދިން ހަމަލާގައި، ނައީމާގެ ކަރު ބުރިކޮށްލަން މަސައްކަތް ކޮށްފައިވާ ކަމަށް ދައުލަތުން ބުންޏެވެ.

އަދުލު އިންސާފު ގާއިމް ކުރަން ހުރަސް އެޅުމުގެ ދައުވާގައި ދައުލަތުން ބުނީ، އެދައުވާ ކޮށްފައި ވަނީ ނައީމާ މަރާލުމަށްފަހު މީހުން ދިރި ނޫޅޭ ތަނެއްގައި ވަޅުގަނޑެއް ކޮނުމަށްފަހު ވަޅިތަކާއި، އަންގިތަކާއި، ލައިގެން ތިބި ޓީޝާޓުތަކާއި ޖިންސުތައް އަންދާލައި، ހެކި ނައްތާލަން މަސައްކަތް ކޮށްފައިވާތީ ކަމަށެވެ.

މައްޔިތާގެ ބޭނުން ނަހަމަ ގޮތުގައި ހިފުމުގެ ދައުވާ ކޮށްފައި ވަނީ، ނައީމާ މަރާލުމަށްފަހު އޭނާ އޮތް ކޮޓަރި އެތެރެއިން ތަޅުލާފައި ދިއުމުންނެވެ. ދައުލަތުން ބުނީ ލޭތަކާއެކު ނައީމާގެ ހަށިގަނޑު ކުނިވާން ދޫކޮށްލާފައިވާ ކަމަށާއި، ހަށިގަނޑު ފެނުނީ މަރުވިތާ 40 ގަޑިއިރު ފަހުން ކަމަށެވެ.

ރިފާސް ދައުވާތަކަށް އިންކާރު ކުރުމުން ގާޒީ އަލީ އާދަމް ވަނީ ދިފާއީ ހެކި ހުށަހަޅަން ފުރުސަތު ދެއްވާފަ އެވެ. އެފުރުސަތުގައި ރިފާސްގެ ދިފާއީ ވަކީލް އާދަމް ޝަމީމް ވިދާޅުވީ ދިފާއީ ހެކި ހުށަހަޅަން ހުރި ނަމަވެސް މައްސަލައިގެ ބާވަތުން ބައެއް ހެކިން ކޯޓަށް ހާޒިރުވާން ޖެހިލުންވާ ކަމަށެވެ. އެހެންކަމުން އެކަންކަން ހަމަޖެއްސުމަށް ވީއެންމެ ދިގު މުއްދަތެއް ދެއްވުމަށް އޭނާ ވަނީ އެދިވަޑައިގެންފަ އެވެ. ނަމަވެސް ދިފާއީ ހެކި ލިޔުމުން ހުށަހަޅަން ގާޒީ ދެއްވީ 20 ދުވަހުގެ ފުރުސަތެކެވެ.

އަޑުއެހުން ނިންމަވާލައްވަމުން ގާޒީ ވިދާޅުވީ ދެން އޮންނަ އަޑުއެހުމެއްގައި އޮންނާނީ ހެކި ހާމަކުރުން ކަމަށެވެ.