ވާވު ރިސޯޓަކުން މޫދަށް ފޭބި ފަތުރުވެރިޔަކު މަރުވެއްޖެ

ވާވު އަތޮޅު ރިސޯޓަކުން މޫދަށް ފޭބި ފަތުރުވެރިޔަކު ގެނބިގެން މަރުވެއްޖެ އެވެ.

ފުލުހުން މީޑީއާތަކަށް ފޮނުވި މެސެޖެއްގައި ބުނީ ވާވު އަތޮޅު ރިސޯޓެއްގައި މޫދަށް އެރި އުޅުނު ފަތުރުވެރިޔަކު ގެނބިގެން އުޅޭ ކަމަށް މިއަދު 11:29 ގައި ރިޕޯޓު ކޮށްފައިވާ ކަމަށެވެ. އެމީހާ ފެލިދޫ ހޮސްޕިޓަލަށް ގެންދިޔައިރުވެސް މަރުވެފައިވާ ކަމަށް ހޮސްޕިޓަލުން ފުލުހުންނަށް މައުލޫމާތު ދީފައިވާ ކަމަށެވެ.

މަރުވެފައިވަނީ ބެލަރުސްގެ 63 އަހަރުގެ އަންހެނެއް ކަމަށް ފުލުހުން ބުންޏެވެ.

މި މައްސަލަ ފުލުހުން ގެންދަނީ ތަހުގީގު ކުރަމުންނެވެ.

ދާދިފަހުން އއ. އަތޮޅުން ފީނަށް އަށް ދިޔަ ފަތުރުވެރިޔަކާއި މާފުށިން ފީނަށް ދިޔަ ފަތުރުވެރިޔަކުވެސް ވަނީ މަރުވެފައެވެ.