އާޒިމާގެ ރަންތުނޑު: އިއްޔެ ހަނގާކުރެވުނީ ކުޑަކުއްޖަކަށް، މިއަދު އަންހެނަކަށް، މާދަމާ ކާކަށް؟

މި ފަހަރު ޒާރާ އެވެ. ޒާރާއަކީ 23 އަހަރުގެ ޒުވާން އަންހެނެކެވެ. ބޮޑުޢީދުގައި ރަށުގައި ބޭއްވުނު ޢީދު ކުޅިވަރުތަކުން މަޝްހޫރުވި ކުއްޖެކެވެ. އޭނާގެ ރީތި ކަމަށެވެ. އަދި ފަރިކަމަށެވެ. 

އެދުވަސްކޮޅު އެތަކެއް ދިވެހި ފިރިހެނުން "ކަމަދޫ އޮތް ކޮޅަށް ބޯލައިގެން ނޫނީ ނުނިދިގެން"، "ކަމަދޫ އަށް ނުދެވިގެން ހަމަނޭވާ ނުލެވިގެން" އުޅުނީ ކިހާވަރަކަށްތޯއެވެ؟ "ކަމަދޫ އަށް ހިތްދޫވެއްޖެ" މިއީ މަޝްހޫރު އެކްޓިވިސްޓަކު އޭނާގެ ސޯޝަލް މީޑިޔާގައި ޖެހި ޕޯސްޓެކެވެ. އެއިރު އެކަކު އަނެކަކަށް ދެރަ ބަހަކަށް ވެސް ބުނެއުޅުނީ ކަމަދޫގެ ވާހަކައެކެވެ. ނޫސްތަކުގެ ސުރުޚީތައް ފުރާލީ ޒާރާ އާއި ކަމަދޫގެ އެހެން އަންހެންކުދިންގެ ނަމުންނާއި ފޮޓޯތަކުންނެވެ. ތަޢުރީފު އެކަންޏެއް ނޫނެވެ. އޭގެ ތެރޭގައި ހަނގާކުރުމާއި ފުރައްސާރަ މަދެއް ނޫނެވެ. އެކުދިންނަށް ގޮތްކިޔާ، މަލާމާތްކޮށް އަދި ފުރައްސާރަކޮށް އުޅުނު އަންހެނުންނެއް ވެސް މަދެއް ނޫނެވެ.

ދެން އިވުނީ "ކަމަދޫގެ ފަތްމިނިން"، މަޝްހޫރު ވިޔަފާރިވެރިޔާ އުއްޗު ޝޯއެއް ބޭއްވުމަށް ގެންދެވި ވާހަކައެވެ. އަދި އޭގެ ފަހުން ރާއްޖޭގެ އެންމެ މުއްސަނދި އެއް ވިޔަފާރިވެރިއެއް ކަމަށްވާ މީދޫ ދާއިރާގެ މެންބަރު އަހްމަދު ސިޔާމް، ޒާރާއާ ކައިވެނި ކުރި ވާހަކަ އެވެ.

ސިޔާމް އަކީ 55 އަހަރުގެ އެތައް މީހަކަ އިނދެފައި ހުރި މީހަކަށްވެފައި ޒާރާ އަކީ ދުވަހަކު ވެސް މީހަކާ ނީންނަ އެންމެ 23 އަހަރުގެ ކުއްޖެއް ކަމުން، މި ކައިވެނީގެ ވާހަކަ ދައްކާ މީހުންގެ ތެރޭގައި، މި ކައިވެންޏާ މެދު ކަންބޮޑުވާ މީހުން މަދެއް ނޫނެވެ. އެކަން ވާނީ ވެސް އެހެންނެވެ. އަޅުގަނޑަށް ވެސް އެކަން ޤަބޫލު ކުރެވެއެވެ. އަޅުގަނޑަށް ޤަބޫލުނުކުރެވިގެން މިއުޅެނީ ޒާރާއަށް ހަނގާކުރުމެވެ. ނުވަތަ ބުލީކުރުމެވެ. އަދި އޭނާއާ ޒާތީވެ މަލާމާތް ކުރުމެވެ. އޭނާގެ އަތާއި ފައިގެ ދޮންކަން އެއްވަރުތޯ ބެލުމާއި ތަނބިކަށީގައި ކައްޓެއް ހުރިތޯ ބަލަން ފޮޓޯ ޖަހާ ހިސާބަށް ދިޔައީމަ އެވެ.

ޒާރާގެ ޙާލަތު އެނގެނީ އަޅުގަނޑުމެން ތެރެއިން ކިތައް މީހުންނަށްތޯއެވެ؟ އަދި އޭނާގެ ކައިވެންޏަށް އޭނާގެ މައިންބަފައިން ރުހުނީ ކީއްވެގެންތޯ އެނގެނީ އަޅުގަނޑުމެންގެ ކިތައް މީހުންނަށްތޯއެވެ؟ އަދި އެކަން އެނގުނަސް އަދި އަޅުގަނޑުމެންނަށް އެކަން ކިތަންމެ ގޯހަސް އޭނާއަށް ހަނގާކޮށް، ފުރައްސާރަކޮށް ޒާތީވުމަކީ އަޅުގަނޑުމެންނަށް އޮތް ޙައްޤެއްތޯއެވެ؟ އޭނާގެ ޙައްޤުތަކެއް އަދި މިނިވަންކަމެއް ވެސް ހަމަނެތީތޯއެވެ؟

ޅަދޮނޅު ރީތި އަންހެންކުދިން ދުވަސްވީ މުއްސަނދި މަހުޖަނުންނާ އިނުން މިއީ ރާއްޖޭގައިވެސް އަދި ދުނިޔޭގައިވެސް އައު ކަމެއް ނޫނެވެ. އެއީ އިޖްތިމާޢީ ގުޅުމެކެވެ. އަދި އިޖްތިމާޢީ މައްސަލައެއްވެސް މެއެވެ. އަދި ހަމައެއާއެކު، އެކަމުގެ ތެރެއިން ކަންބޮޑުވާންޖެހޭ ވަރުގެ އިޖްތިމާޢީ މައްސަލަތަކެއް އުފަންވާވެސް މައްސަލައެކެވެ. ގިނަ ޙާލަތްތަކެއްގައި މުއްސަނދި ބައެއް ފިރިހެނުންގެ ކުރިމަތީގައި އަންހެނުންގެ ޢިއްޒަތާއި ކަރާމާތާއި އެމީހުންގެ ކުރިމަތީގައި އަންހެނުންގެ އަގެއް ނެތްކަންވެސް އަންގައިދޭ ކަމެކެވެ. އަޅުގަނޑު މިހެން ބުނުމުން، މިކަމާ ބައެއް ބޭފުޅުން ހިތްޕުޅު ހަމަޖެހިވަޑައިނުގެންފާނެއެވެ. އެހެނަސް މިއަދު ރާއްޖޭގައިވެސް މި ރާސްތާ ކަޑައްތުކުރެއްވި ކިތަންމެ އަންހެން ބޭފުޅުންނެއް އެބަތިއްބެވިއެވެ. އެބޭބޭފުޅުންގެ ދިރިއުޅުމުގެ ޙަޤީޤަތްތަކެއްވެސް އެބަހުއްޓެވެ. އެއީ އެމީހުންގެ އަމިއްލަ ނިންމުމެކޭވެސް ބުނެވިދާނެއެވެ. ހަމައެއާއެކު މިއީ އިޖްތިމާޢީ މައްސަލައަކަށް ވުމާއެކު، އެކަމާ މުޖްތަމަޢެއްގެ ހައިސިއްޔަތުން ކަންބޮޑުވެގެން ވާހަކަވެސް ދެއްކިދާނެއެވެ. އެހެނަސް ވަކިވަކި މީހުން ފާހަގަކޮށް، ހަނގާ (bully) ކޮށް ފުރައްސާރަކޮށް (harass) ކޮށް ޒާތީވުމަކީ ކޮށްގެންވާނޭ ކަމެއްނޫނެވެ. ހަމައެއްގޮތަކަށްވެސް ކޮށްގެންވާނޭ ކަމެއްނޫނެވެ.

މީގެ ދުވަސްކޮޅެއް ކުރިއެވެ. 16 އަހަރުގެ ފިރިހެން ކުއްޖަކު އޭނާގެ ހިތާވެގެން އުޅޭ ކުއްޖާ ސަލާމަތްކުރަން ލޯންޗެއް ވަގަށް ނަގައިގެން މާލެ އައީ އެވެ. ކުޑަކުއްޖެކެވެ. ކޮންމެ ސަބަބަކާހުރެ ނަމަވެސް އެކުއްޖާ ކުރީ ކުށެކެވެ. އެހެން ނަމަވެސް މުޅި ސޯޝަލް މީޑިޔާގައި އޮތީ ކުށުގެ ވާހަކައެއް ނޫނެވެ. މުޅި ސޯޝަލް މީޑިޔާގައި އޮތީ އޭނާއަށް މަލާމާތް ކުރުމެވެ. ހަނގާކުރުމެވެ. އަދި ފުރައްސާރަ ކުރުމެވެ. ހީވީ މުޅި ރާއްޖޭގެ އެންމެން އެކުއްޖާ ފަކީރު ކާލަ ފާނެހެންނެވެ. "ލޯންޗެއް ވަގަށް ނަގައިގެން އަންނާނޭ މީހަކު ނުލިބިގެން މީހަކާ ނީނދެވިފައި" މިކަހަލަ ކިތައް ސްޓޭޓަސް ތޯއެވެ. ބޮޑެތި ސިންގާ މީހުންގެ ސްޓޭޓަސް ތަކެވެ. 

އުމުރުގެ ގޮތުންނާއި މަޤާމުގެ ގޮތުންނާއި އަދި ތަޢުލީމްގެ ގޮތުގެ ގޮތުން ބޮޑެތި މީހުންނެވެ. ޚުދު އަޅުގަނޑުވެސް އެތައް "ބޭފުޅުންނަކަށް" ޕްރައިވެޓްކޮށް ދަންނަވައިގެން ހަނގާކޮށް ފުރައްސާރަކޮށްފައ ހުރި ސްޓޭޓަސް ރިމޫވް ކުރަން ޖެހުނެވެ. ސަރުކާރުގެ މަތީ މަޤާމުތަކުގައި ތިއްބެވި ބޭފުޅުން ފެށިގެން ޤައުމީ ކުޅިވަރު ކޯޗުންގެ ފެންވަރުގެ ބޭފުޅުންނަށެވެ.

އެދުވަސްތަކުގެ ސްޓޭޓަސްތައް ބަލާލުމުން ހީވީ މިއިން އެއްވެސް މީހަކީ ދުވަހަކުވެސް ސޯޅަ ސަތާރަ އަހަރުގައި އަހަރުގައި ކޮސް ކަމެއް ނުކުރާ ބައެއް ހެންނެވެ. އަދި މީހަކަށްޓަކައި ޤުރުބާންވާން ކަނޑުފަތަން ވަޢުދުނުވާ މީހުން ހެންނެވެ. ތިމާ ހިތާވާ އަންހެން ނޫނީ ފިރިހެން ކުއްޖާއާ ދިމާލަށް އެހެން މީހަކު ބަލާލުމުން "ރަންބުއްދި" ނުވާމީހުން ހެންނެވެ.

އެކުއްޖާ ފުޅު މާލެ އައީ، އޭނާގެ ލޯބިވެރިޔާއަށް މީހަކު ޖިންސީ އަނިޔާކުރާތީ އޭނާ ސަލާމަތްކުރުމުގެ ނިޔަތުގައެވެ. މިކަން މިފާހަގަކުރަނީ، މިއަދު އަޅުގަނޑުމެންގެ ތެރޭގައި ކުއްޖަކަށް ޖިންސީ އަނިޔާ ލިބޭއިރުވެސް އަޅާ ނުލާ މީހުން ޤަބޫލުކުރަން ދަތި މިންވަރަށް ގިނަވީމައެވެ. އަންހެނަކަށް އަނިޔާލިބި މަރުވެގެންދާއިރު ވެސް ކަހާތަން ހިރުވައިނުލާ މީހުންވެސް މަދުނޫން ވީމައެވެ. މިފަދަ މީހުން ހިމެނޭގޮތުން މިފަދަ ކަންކަމާ ކުޑަ އަދި ޅަކުދިންނަށް ހަނގާކުރަންވީމަ ދެން މި މުޖްތަމަޢާ ބެހެގޮތުން ބުނާނީ ކީކޭތޯއެވެ؟

ރާއްޖެއަކީ މިއަދު އިޖްތިމާޢީ މައްސަލަތަކުގެ ހާއްޔެކެވެ. ކުޑަކުދިންގެ ތެރެއިން ޢުމުރުގެ ޅަފަތުގައި އެކުދިންގެ ފުރާނައާއި ދިރިއުޅުން ފޭރެވިގެންދަނީ ކިތައް ކުދިންގެ ތޯއެވެ. ދަރިންނާއެކު ބިކަވެ މަގުމަތުވަނީ ކިތައް އަންހެނުންތޯއެވެ. ދަރިންނަށްޓަކައި ކެތްކޮށްގެން އިންދާ ފިރިމިހާގެ އަތުން މަރާލަނީ ކިތައް އަނބިންތޯއެވެ. މުސްކުޅިވީ ދުވަހު ބަލާނޭ މީހަކުނެތި ގުރައިދޫ މަރުކަޒުގައި ތިބެ ނިމިދަނީ ކިތައް މަންމައިންނާއި ކިތައް ބައްޕައިންތޯއެވެ. ވޭނަށް ކެތްނުވެގެން އަމިއްލައަށް ނިމިގެންދަނީ ކިތައް ޅަކުދިންތޯއެވެ. ވިސްނަވާ ލައްވާށެވެ.

މިފަހަރު ހަނގާކުރުމުގެ މައްސަލައިގެ އެހެން ޕަރސްޕެކްޓިވް އެކެވެ. ރާއްޖޭގެ ކުށުގެވެއްޓަށް ބަލައިފިނަމަ، އެންމެ ކަންބޮޑުވާންޖެހޭ މައްސަލައަކީ ޖިންސީ ކުށުގެ މައްސަލައެވެ. އެންމެ ބޮޑު ކަންބޮޑުވުމަކީ ޖިންސީ ކުށުގެ މައްސަލަ ތައް ރިޕޯޓްނުކުރެވޭ މައްސަލައެވެ. ކީއްވެތޯ އެވެ. ޢަދުލު އިންސާފުގެ ދާއިރާއަށް އިތުބާރުނުކުރެވުމެވެ. ހަމައެއާއެކު މުޖްތަމަޢުގެ ހަނގާކުރުމާއި ފުރައްސާރަކުރުމަށް ކުރިމަތިލާން ނުކުރުމެވެ. ވަކިކަހަލަ ހެދުމެއް އަޅާތީ އަދި ވަކިކަގަލަ ގޮތަކަށް އުޅޭތީ ރޭޕްކުރަނީކަމުގައި ލޭބަލް ކުރާތީއެވެ. ވިކްޓިމް، ރިވިކްޓިމައިޒްވާތީއެވެ. ނުވަތަ އަނިޔާލިބުނު މީހާއިތުރު އަނިޔާއަކަށް ހުށަހެޅޭތީއެވެ. "މިވެނި މީހެއްގެ ޝިކާރައަކަށްވެފައިވާ މީހެއްގެ ގޮތުގައި" ނުވަތަ މިވެނި ތަނެއްގައި މިވެނިގޮތަކަށް އުޅެނިކޮށް މިވެނިގޮތެއްވި ކުއްޖެއްގެ ގޮތުގައި" މުޅި ޢުމުރު ހޭދަކުރަންޖެހޭތީއެވެ. އޭނާގެ އަނިޔާއާއި އަދި ޓްރޯމާއިން ނިކުންނަންޖެހޭ މަސައްކަތް މުޖްތަމަޢުގެ ހަނގާކުރުމާއި ފުރައްސާރަކުރުމުން އެތައް ގުނައަކަށް އިތުރުވާތީއެވެ. ރިހޭފައި މައްޗަށް ފޮއިވައްޓާލާތީއެވެ. ނޫނީ ލޭލާލާއި ހުރި ރޯޒަޚަމްތަކެއްގައި މުޖްމަޢުގެ ވިސްނުންތަކުގެ ވިހަ ދޫތަކުން ލޮނުމިރުސް އަޅާތީއެވެ.

އަހުރެމެންގެ ތެރޭގައި އުނިކަމެއް ނޫނީ ފޮރުވާނޭ މާޒީއެއް ނެތީ ކާކުގެ ހެއްޔެވެ؟ އެހެންނަމަވެސް މިފަދަ ޙާލަތްތަކިގައި މީހުންނާއި، ކުދިންނާއި އަދި ޒުވާނުންނަށް ހަނގާކޮށް އަދި ރޭރުކުރާއިރު، ހީވަނީ އަޅުގަނޑުމެން ހަމައެއްވެސް އެހެންމީހެއްގެ އެއްވެސް އައިބެއް ނުވަތަ އުނިކަމެއް ނެތީހެންނެވެ. ހަމަ ދުވަހަކުވެސް ކުށެއްވެސް އަދި މޮޔަކަމެއްވެސް ނުކުރަނީ ހެންނެވެ. މިފަދަ ކަންކަމުގެ ތެރޭގައި ހަނގާކުރުމާއި ފުރައްސާރަކުރުމާ ދެކޮޅަށް އަޑުއުފުލާމީހުންވެސް މިކަމުގެ ބައިވެރިވާތަން ފެނުމަކީ ހިތާމައިން ކަނދުރާ އެލުވާލަންޖެހޭ ކަމެކެވެ. ލަދުވެތިކަމާއެކު އިސްދަށަށް ޖަހާލަންޖެހޭ ކަމެކެވެ.

ހަނގާކުރުން އެބަޔަކަށް ރައްދުވާ ބޮޑު އާބާދީއަކަށް ބަލައިފިނަމަ، އެއްބަޔަކީ ރާއްޖޭގައި އުޅޭ ބޭރުގެ މަސައްކަތްތެރިންނެވެ. ޚާއްޞަގޮތެއްގައި ބަންގްލާދޭޝްގެ މަސައްކަތް ތެރިންނެވެ. އަޅުގަނޑުމެންގެ ބަހުންނަމަ، ބަންގާޅު މީހުންނެވެ. އެމީހުން ރާއްޖޭގައި ގަވާއިދާ ޚިލާފަށް އުޅުމަކީ އަޅުގަނޑުމެން ފުރުޞަތު ދީގެންވާނޭ ކަމެއްނޫނެވެ. އެކަމާ އަޅުގަނޑު އެއްބަހެވެ. އަދި ހަމައެގޮތަށް އުޅޭ މީހުން ފޮނުވާލެވެންޖެހޭނެއެވެ. އެމީހުން ގަވާއިދާ ޚިލާފަށް އުޅެނީ ޤައުމެއްގެ ހައިސިއްޔަތުން އަޅުގަނޑުމެން އެކަމަށް ފުރުޞަތު ދިނީމައެވެ. އަދި އަޅުގަނޑުމެންނަށް އެމީހުންނާ ނުލައި ދިރިނޫޅެވޭ ވަރަށް އަޅުގަނޑުމެންގެ އަމިއްލަވަންތަކަމާއި އަމިއްލަ ދިރިއުޅުމުގެ ބާރުވެރިކަން ނެތިދިޔައީމައެވެ. ނުވަތަ ދޫކޮށްލީމައެވެ.

މިފަހަރު، ތަފާތު ނަޒަރިއްޔާތަކުން އެމީހުންނާ ދޭތެރޭގައި ވިސްނާލަމާތޯއެވެ. ރާއްޖޭގެ ހުރިހާ ހަޑި މަސައްކަތެއް ކުރަނީ އެމީހުންވެ. ފާޚާނާ ވަޅުގަނޑުތައް ސާފުކުރުމެވެ. ޤަބުރުސްތާނު ބެލެހެއްޓުމެވެ. ގޭގޭގައި ނޯކިރީ ކުރުމެވެ. މިނޫންވެސް ހަޑިކަމުން ނުވަތަ ދަށްކަމުން އަޅުގަނޑުމެން އަމިއްލައަށް ކުރަންބޭނުންނުވާ އެންމެހާ ކަންކަމެވެ.

މިދޭތެރެއަކުން، ޢިއްޒަތްތެރި މެންބަރަކު "ބަންގާޅުމީހުން" ގެ ވާހަކަ ވިދާޅުވިއިރު، ވިދާޅުވާން ހަނދުމަފުޅު ނެތުނު ވާހަކައަކީ ގޭތެރޭގައި އަނބިމީހާއަށް އަތްގާތް ކޮށްލަދޭން ހުންނަނީވެސް ބަންގާޅުމީހެއް ކަމެވެ. މައިންބަފައިން ބެލެހެއްޓުމުގައިވެސް އެހީތެރިވަނީ އެމީހުންކަމެވެ. އަދި މިހާރު ރާއްޖޭގެ މަސްދޯނިވެރިކަމާއި ދަނޑުވެރިކަމުގެ ސިނާޢަތުގައިވެސް އެމީހުންގެ ދައުރު ބޮޑުކަމުގެ ވާހަކައެވެ. އެހެންނަމަވެސް އަޅުގަނޑުމެންގެ މުޖްތަމަޢެއްގެ ހައިސިއްޔަތުން އެކަން ބަލައިގަންނަމުތޯ މިއީ ކޮށްލަން ހަމަ ޖާއިޒުސުވާލެކެވެ.

އަދިވެސް ވިސްނާލައްވާށެވެ. އަޅުގަނޑުމެންގެ ހަނގާކުރުމާއި އަނިޔާކުރުމާއެކުވެސް އެމީހުން މިރަށުގައި އެތިބެނީ އެނޫން އެހެންގޮތެއް ނެތީމައެވެ. ގެރިބަކަރިއަށްވުރެވެސް ޙާލުގައި ނިދަންޖެހުނަސް ގެ މޯގޭޖް ކޮށްގެން އައިސް ޣުލާނުކޮށް ނޯކިރީކުރަނީ މައިންބަފައިންގެ ބޭހަށްކަމެވެ. ނޫނީ އަންހެން ދަރިފުޅުގެ ކައިވެނީގެ ޑައުރީ ހޯދަންކަމެވެ. އެހެނަސް އެއީވެސް އިންސާނުންނެވެ. ބަލިބަލިވެސް ތަޙައްމަލުކުރާ މީހުންނެވެ. އިޙްސާސްތަކާއި އަދި ކަރުނަވެސް އޮހޮރުވާނޭ އަޅުގަނޑުމެންފަދަ އިންސާނުންނެވެ.

ވިސްނަވާލައްވާށެވެ. އަޅުގަނޑުމެން އެއްވެސް މީހަކީ ފުރިހަމަ މީހަކީމެއް ނޫނެވެ. އައިބުތަކުން ފުރިފައިވާ އަދި ނުނިޔަތްވާ އަދި ފާޅުވާން ބޭނުންނުވާ އެތައް ކަމެއް އަޅުގަނޑުމެންގެ ޙަޔާތުގައި ހިމެނޭ މީހުންނީމުއެވެ. ފިޠުރީ މަޚްލޫޤުންތަކެކެވެ. އިންސާނެއްގެ ހައިސިއްޔަތުން އަނެއްމީހާއަށްވުރެ، އެންމެ ތަންކޮޅެއްވެސް މޮޅު މީހުންނެއްނޫނެވެ. އެމީހެއްގެ ކިބައިގައިވާ އަޚްލާޤެއްފިޔަވައެވެ. ﷲ ތަޢާލާ އަޅުގަނޑުމެން އެންމެން ލައްވާފައިވަނީ ހަމަހަމަ ބައެއްގެ ގޮތުގައެވެ. މިޙާލަތުގައި އެހެން މީހަކަށް ފުރައްސާރަކޮށް މަލާމާތްކުރެވޭ ވަރުގެ ހަމައެއްވެސް މީހަކު އެބަހުރި ތޯއެވެ. އަދި މިއީ އަޅުގަނޑުމެން މުޖްތަމަޢެއްގެ ހައިސިއްޔަތުން އުޅެން ބޭނުން ގޮތްތޯއެވެ. އަޅުގަނޑުމެންގެ ދަރިންނަށް ދައްކުވާއިދޭން ބޭނުންވާ ގޮތްތޯއެވެ.

އަޅުގަނޑުމެން ދިވެހިންނަކީ އެއްބަހަކުން ވާހަކަދައްކާ އެއް ނަސްލެއްގެ ބައެކެވެ. އެހެންނަމަވެސް އަޅުގަނޑުމެން މިކުރިއަރަމުންދާ ދުނިޔޭގައި ތަފާތުމީހުންނާއެކު އުޅެން ދަސްކުރަން ނުޖެހޭތޯއެވެ. އަޅުގަނޑުމެންގެ މިފަދަ ކަންކަން އިޞްލާޙުކުރަން ނުޖެހޭތޯއެވެ. ދިވެހިންނަށް ވީތީއެވެ. ސައްތައިން ސައްތަ މުސްލިމުންގެ ގޮތުގައި މިބިމުގައި ލެއްވުމުގެ ޝަރަފާއި ފަޚުރު އަޅުގަނޑުމެންނަށް ލިބިފައިވީތީ އެވެ.