ވޭމަންޑޫ ކުޑަކުދިން ބަލަހައްޓާ މަރުކަޒުގައި ތިބި ކުދިން އެހެން ރަށަކަށް

ތ.ވޭމަންޑޫގައި ހުންނަ ފެމިލީ އެންޑް ޗިލްރެން ސާވިސް ސެންޓަރުގައި ފެމިލީ އެންޑް ސޯޝަލް ޑިވެލޮޕްމެންޓު މިނިސްޓްރީގެ ބެލުމުގެ ދަށުން ބަލަހައްޓަމުން އައި ކުދިން އެހެން ރަށަކަށް ބަދަލުކޮށްފި އެވެ. 

ދައުލަތުގެ ބެލެހެއްޓުމުގެ ދަށުގައި ވޭމަންޑޫގައި ތިބި ކުދިން އެ ރަށުން އެހެން ރަށަކަށް ގެންދިޔައީ އެ ކުދިންގެ ތެރެއިން އުމުރުން 16 އަހަރުގެ ކުއްޖަކު އުޅޭ ގޮތާމެދު ރަށު ރައްޔިތުން ހިތްހަމަނުޖެހިގެން އެ ކުއްޖާ އެހެން ރަށަކަށް ގެންދިއުމަށް ގޮވައިލާ އެ ސެންޓަރު ކައިރީ މުޒާހަރާކޮށްފައިވަނިކޮށްވެެ. 

މި މައްސަލަ ފެންމަތިވި ސަބަބެއްކަމަށް އެ ރަށުން "މިރާ"އަށް މައުލޫމާތު ދިން ބައެއް މީހުން ބުނީ އެ ރަށުގެ މަރުކަޒުގެ މުވައްޒަފުންނާމެދު އެ ކުއްޖާ އަމަލުކުރާ ގޮތާމެދު ރަށުގެ ރައްޔިތުން ހިތްހަމަނުޖެހި ކަންބޮޑުވީ އެވެ. އަދި އެ ކުއްޖާ ސުކޫލުގައިވެސް ހަމަނުޖެހުން ހިންގައި އެހެން ކުދިންނަށް ގޯނާކުރާ މައްސަލަ ފާހަގަވެފައިވާ ކަމަށް އެ ރަށުން ވާހަކަދެއްކި މީހުން ބުނެ އެވެ. 

މިކަމާ ގުޅިގެން ޖެންޑާ މިނިސްޓްރީގެ އޮފިޝަލަކު ވިދާޅުވީ ވޭމަންޑޫގައި ހުންނަ ކުޑަކުދިން ބަލަހައްޓާ މަރުކަޒުގައި ޖުމްލަ ފަސް ކުދިން ތިބި ކަމަށެވެ. އަދި އެހުރިހާ ކުދިންވެސް މިހާރު އެހެން ރަށަކަށް ބަދަލުކޮށްފައިވާ ކަމަށާއި، ނަމަވެސް އެކުދިންގެ ކަރާމާތް ރައްކާތެރިކުރުމުގެ ގޮތުން އެ ކުދިންގެ އުމުރާއި ބަދަލުކުރި ރަށް ހާމަނުކުރެވޭނެ ކަމަށް މިނިސްޓްރީގެ އޮފިޝަލު ވިދާޅުވި އެވެ. 

މީގެ ކުރިންވެސް ދައުލަތުގެ ބެލުމުގެ ދަށުގައި ތިބޭ ބައެއް ކުދިން ހިންގާ އަމަލުތަކާ ގުޅިގެން އެ ކުދިން ތިބޭ ރަށްރަށުގެ އާންމުން ކަންބޮޑުވުން ފާޅުކޮށްފައި އެބަހުއްޓެވެ. 

މާލޭ ސަރަހައްދުގައި ކުޑަކުދިން ހިޔާތަކުގައި ބަލަހައްޓަމުން އައި ކުޑަކުދިން އަތޮޅު ތެރޭގެ ރަށްތަކަށް ބަދަލުކުރީ ނިމުނު ސަރުކާރުގަ އެވެ. މިފަދަ ކުދިންނަކީ ހާއްސަ އެހީތެރިކަމަށް ބޭނުންވާ ކުދިންނަށްވާއިރު އެ ކުދިން ބަދަލުކުރި ރަށްތަކުގައި ސައިކޯސޯޝިއޯ މަދަދުވެރިކަން ފޯރުކޮށްދޭނެ ވަސީލަތްތައް ނެތްކަމުގެ ކަންބޮޑުވުން އެއިރުވެސް ބައެއް ފަރާތްތަކުން ފާހަގަކުރި އެވެ.