ޑޮލަރު ވިއްކާ ކަމަށް ބުނެ އޮޅުވާލައިގެން ބިދޭސީއެއްގެ އަތުން 28000 ރުފިޔާ ފޭރިގަނެފި

ޑޮލަރު ވިއްކާ ކަމަށް ބުނެ ބިދޭސީއެއްގެ އަތުން 28،000 އަށްވުރެ ގިނަ ރުފިޔާ ފޭރިގަތް މީހަކު ހައްޔަރުކޮށްފިއެވެ.

މަކަރާއި ހީލަތް ހެދުމުގެ މި މައްސަލައިގައި ހައްޔަރުކޮށްފައިވަނީ، ގ. ސިނަމާލެ، 13-05 ޒައިދާން މުޙައްމަދު ހާޝިމް 27އ، އެވެ.

އޭނާ ހައްޔަރުކޮށް ބަންދާމެދު ގޮތެއް ނިންމުމަށް ކުރިމިނަލް ކޯޓަށް ހާޒިރުކުރުމުން އެ ކޯޓުން ވަނީ އޭނާ 15 ދުވަހަށް ބަންދު ކުރުމަށް އަމުރުކޮށްފައެވެ.

ބަންދު އަމުރުގައިވާގޮތުން ޑޮލަރު ވިއްކުމަށް ކަމަށްބުނެ ސައްހަ ނޫން ސްލިޕެއް ފޮނުވައިގެން، 28،000 އަށް ވުރެ ގިނަ ރުފިޔާ މަކަރާއި ހީލަތުން އޭނާ ހޯދާފައިވާ ކަމަށް ތުހުމަތު ކުރެވެ އެވެ. އަދި މީގެ ތެރެއިން ބައެއް ފައިސާ އަނބުރާ ދީފައިވާނެ ކަމަށާއި އަދި ގެއްލުން ލިބުނު މީހާއަށް ފައިސާ ދޭނެ ކަމަށް އޭނާގެ އަނބިމީހާއާއި އާޢިލާއާއި ދެކެވުނު ވާހަކައިން އެއްބަސްވެފައިވާ ކަމަށްވެސް އަމުރުގައިވެ އެވެ.


އަމުރުގައިވާގޮތުން ޒައިދާން މި ފައިސާ ދޭން އެއްބަސްވެފައިވީ ނަމަވެސް އެއީ އޭނާ ކުރި ކަމެއް ނޫން ކަމަށް ވަނީ ބުނެފައެވެ. އެކަމަކު، އޭނާ ފައިސާ ހޯދާފައިވާ މީހާ އަކީ ކާކުކަމާއި އޭނާ ވަޒީފާ އަދާކުރާތަން އެނގުމާއި އެއީ ބިދޭސީއަކަށްވުމުން ބާރު ފޯރުވިދާނެ ކަމަށް ބެލެވޭތީ އޭނާ ބަންދުން ދޫކޮށްނުލުމަށް ކުރިމިނަލް ކޯޓުން ވަަނީ އަމުރުކޮށްފަ އެވެ.

ޒައިދާން އަކީ މީގެ ކުރިންވެސް މިބާވަތުގެ އެތައް ކުށެއް ކޮށްފައިވާ ފަރާތެއްކަމަށް ސޯޝަލް މީޑިއާގައި ގިނަ ބަޔަކު ވަނީ ތުހުމަތު ކޮށްފަ އެވެ. އެގޮތުން ފަރުނީޗަރު ވިއްކާ ކަމަށްބުނެ އެތައް ބައެއްގެ އަތުން ފައިސާ ހޯދުމަށްފަހު ފަރުނީޗަރު ޑެލިވަރ ނުކުރުމާއި އެމީހުންގެ ނަންބަރު ބްލޮކް ކުރުމުގެ ތުހުމަތު އޭނާ ވަނީ ކޮށްފަ އެވެ. އަދި ފްލެޓްތަކުގެ ފިނިޝިން މަސައްކަތް ކޮށްދޭ ކަމަށްބުނެވެސް ގިނަ ބައެއްގެ އަތުން މީނާ ފައިސާ ހޯދާފައިވާ ކަމަށް ވަނީ ތުހުމަތު ކޮށްފަ އެވެ.