ޕީއެންސީގެ ބައެއް މެންބަރުން ސަރުކާރުގެ ބިލުތަކަަށް "ރަތް ޖަހާނެ" ކަމަށް އެބަ ބުނޭ: މައުރޫފު
"ބައެއް މެންބަރުން ކުޑަ ދަށުގައި އަޅުގަނޑުމެން ކައިރީ ބުނަމުން އެދަނީ ބައެއް ބިލުތަކަށް ތިމަންނާމެން ރަތް ޖަހާނެ ވާހަކަ. ކުރިއަށް އޮތް ދުވަސްތަކުގައި ޕީއެންސީގެ މެންބަރުން ސަރުކާރުން ހުށަހަޅާ ބައެއް ބިލުތަކަށް ރަތް ޖަހާނެ ވާހަކަ،"
ސަރުކާރުން ރައްޔިތުންގެ މަޖިލީހަށް ހުށަހަޅާ ބިލުތަކަށް ސަރުކާރު ހިންގާ މައި ޕާޓީ ކަމުގައިވާ ޕީޕަލްސް ނޭޝަނަލް ކޮންގުރެސް (ޕީއެންސީ)ގެ ބައެއް މަޖިލިސް މެންބަރުން ދެކޮޅުހައްދަވާނެ ކަމަށް ވިދާޅުވަމުން ގެންދަވާކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފު ޒާކިރު ވިދާޅުވެއްޖެ އެވެ.
އެމްޑީޕީ ހަރުގޭގައި އޮތް ޖަލްސާއެއްގައި ވާހަކަދައްކަވަމުން މައުރޫފު ވިދާޅުވީ ޕީއެންސީގެ އެތެރޭގައި ދެ ހިޔާލެއް މިހާރުވެސް އެބައޮތް ކަމަށެވެ. އަދި މަޖިލީހުގައި ބައެއް މެންބަރުން ދައްކަވާ ވާހަކަފުޅުތަކުން ދެ ހިޔާލެއްގެ އޮއިވަރު ޕީއެންސީގެ މަޖިލިސް މެންބަރުންގެ މެދުގައި ހިނގަމުންދާކަން ސާފުވާކަމަށް މައުރޫފު ވިދާޅުވި އެވެ.
އިތުރަށް މައުރޫފު ވިދާޅުވީ މަޖިލީހުގެ މެންބަރުން ޖަލްސާއިން ބޭރުން އެއްވެ ވާހަކަދައްކާ ސަރަހައްދުގައި ބައެއް މެންބަރުން ސަރުކާރުން ހުށަހަޅާ ބިލުތަކާ ދެކޮޅަަށް ކުރިއަށް އޮތް ތަނުގައި ވޯޓު ދޭނެކަމަށް ވިދާޅުވަމުން ގެންދަވާ ކަމަށެވެ. އެ މެންބަރުން ސަރުކާރު ބިލުތަކަށް ވޯޓު ދިނުމަށް އިންކާރުކުރާ ހިސާބަށް ދިޔާއީ ދާއިރާތަަކުގައި ތަރައްގީގެ މަޝްރޫއުތައް ނުހިނގާތީ ކަމަށްވެސް މެންބަރު ވިދާޅުވި އެވެ.
"އަޅުގަނޑުމެންނަށް ވަރަށް ސާފުކޮށް ފެނޭ މަޖިލިސް ތެރޭގައި ދެ ފިކުރަކަށް ވާހަކަދެކެވޭ ތަން. ހާއްސަކޮށް ޕީއެންސީގެ މެންބަރުންގެ ތެރޭގައި. މިއީ އަޅުގަނޑަށް ހީވަނީ އަޅުގަނޑުމެން އުފާކުރަންވީ ވަރު ކަމެއްހެން. ވަރަށް ބޮޑަށް ޕީއެންސީ މެންބަރުންގެ މެދުގައި ހިޔާލު ތަފާތުވުން އެބަހުރި،" މައުރޫފު ވިދާޅުވި އެވެ.
"ބައެއް މެންބަރުން ކުޑަ ދަށުގައި އަޅުގަނޑުމެން ކައިރީ ބުނަމުން އެދަނީ ބައެއް ބިލުތަކަށް ތިމަންނާމެން ރަތް ޖަހާނެ ވާހަކަ. ކުރިއަށް އޮތް ދުވަސްތަކުގައި ޕީއެންސީގެ މެންބަރުން ސަރުކާރުން ހުށަހަޅާ ބައެއް ބިލުތަކަށް ރަތް ޖަހާަނެ ވާހަކަ އަޅުގަނޑުމެން ކައިރީގައި ކުޑަ ދަށުގައި ބުނަމުން އެދަނީ.،"
މައުރޫފު އިތުރަށް ވިދާޅުވީ ރަށްރަށުގައި ހިނގަމުން އައި ތަރައްގީގެ މަޝްރޫއުތައް ހުއްޓި މަސައްކަތްތައް ކުރިއަށްނުދާތީ މެންބަރުންނަށް މިހާރު ދާއިރާތަކަށް ދިއުންވެސް ލަދުވެތި ކަމަކަށްވެފައިވާ ކަމަށެވެ. އަދި ސަރުކާރުގެ ތެރެއިން ވަކި އެއްބަޔަކު މާ ބޮޑަށް ކޮރަޕްޝަން ހިންގަމުންދާތީ އެކަމާމެދުވެސް ކޮންގްރެސްގެ ބައެއް މެންބަރުން ނުރުހުން ފާާޅުކުރަމުންދާ ކަމަށް މައުރޫފު ވިދާޅުވި އެވެ.
މައުރޫފު އިތުރަށް ތުހުމަތުކުރެއްވި ގޮތުގައި ކޮރަޕްޝަން ހިންގުމުގައި އިސްކޮށް އުޅުއްވަނީ ރައްޔިތުންގެ މަޖިލީހަށް ދެވަނަ ދައުރަށް ހޮވިވަޑައިގެންނެވި ބޭފުޅުންނެވެ. އަދި އެއީ މަޖިލީހުގެ ރައީސް އަބްދުއްރަހީމް އަބްދުﷲގެ ޓީމުގެ ގޮތުގައި އޭނާ ސިފަކުރެއްވި އެވެ.
މިކަން ރައީސުލްޖުމްހޫރިއްޔާ ޑރ.މުހައްމަދު މުއިއްޒަށްވެސް މިހާރު އެނގިވަޑައިގަންނަވާ ކަމަށާއި، އެކަމާ ގުޅިގެން އެމަނިކުފާނު މަޖިލީހުގެ ތެރެއިން ބައެއް ފިޔަވަޅުތައްވެސް އަޅުއްވަމުންދާކަމަށާއި، އެކަންކަން އެމްޑީޕީގެ މެންބަރުންނަށްވެސް ފާހަގަަވަމުންދާކަމަށް މައުރޫފު ވިދާޅުވި އެވެ.
"އަޅުގަނޑަށް ހީވަނީ މިހާރު އެކަން މިހާރުގެ ރައީސުލްޖުމްހޫރިއްޔާއަށްވެސް އެނގިވަޑައިގެންފިހެން. އެކަމަކަށްޓަކައި މަޖިލިސް ތެރޭގައި ކުރައްވަމުންދާކަން އެބަފެނޭ. މަޖިލިސް ތެރޭގައި ކޯޅުންގަނޑު ފެންނާނެ. މާގިނަ ދުވަސްތަކެއް ނުވެ ޕީއެންސީގެ މަޖިލިސް ބައިބައިވާނެ ކަމުގައި އަޅުގަނޑު ޝައްކެއް ނުކުރަން،"
ކޮމެންޓް
Republic of Maldives