ބަދަލެއް؛ ފައިރޫޝް ހޯމްލޭންޑަށް، ސަފޫރާ ޑިފެންސް މިނިސްޓްރީއަށް

ސަރުކާރުގެ ބައެއް މަގާމުތަކަށް ބަދަލު ގެނެސްފި އެވެ.

އެ ގޮތުން ހަޔާ އެޑިއުކޭޝަން މިނިސްޓްރީގެ ސްޓޭޓް މިނިސްޓަރުގެ މަގާމުގައި ހުންނެވި ޑރ. އަބްދުﷲ ފައިރޫޝް ވަނީ ހޯމް ލޭންޑް އެންޑް ސެކިއުރިޓީ މިނިސްޓްރީގެ ސްޓޭޓް މިނިސްޓަރަކަށް ބަދަލު ކުރައްވާފަ އެވެ.

ފައިރޫޝް އަކީ ފުލުހުންގެ ހިދުމަތުގެ ވަރަށް އިސް މަގާމުތަކެއް ފުރުއްވާފައިވާ ބޭފުޅެކެވެ. އެކްޓިން ސީޕީއެއްގެ ގޮތުގައި ފުލުސް އިދާރާ ވެސް ހިންގެވި އެވެ. އޭނާ ނިސްބަތް ވަނީ މޯލްޑިވްސް ނެޝަނަލް ޕާޓީއަށެވެ.

މީގެ އިތުރުން އެޑިއުކޭޝަން މިނިސްޓްރީގެ ސްޓޭޓް މިނިސްޓަރު ސަފޫރާ އަލީ ވަނީ ޑިފެންސް މިނިސްޓްރީގެ ސްޓޭޓް މިނިސްޓަރަކަށް ބަދަލު ކުރައްވާފަ އެވެ. ސަފޫރަކީ ރާއްޖޭގައި މި ފަހުން އުފެދުނު އެންމެ ގާބިލު ޕްރިންސިޕަލުންގެ ތެރޭގައި ހިމެނިވަޑައިގަންނަވާ ބޭފުޅެކެވެ. ވަރަށް ގިނަ ދުވަސްތަކެއް ވަންދެން ސީއެޗްއެޗްސީ ހިންގެވި އެވެ.

މި ބަދަލު ގެނައި ސަބަބެއް ސަރުކާރުން ނުބުނެ އެވެ.

ރައީސް ޑރ. މުހައްމަދު މުއިއްޒުގެ ސަރުކާރު ފާހަގަ ކުރެވިފައި ވަނީ ސިޔާސީ މަގާމުތައް ވަރަށް ގިނަ އަދި މަގާމުތަކަށް އަވަސް އަވަހަށް ބަދަލު ގެންނަ ސަރުކާރެއްގެ ގޮތުގަ އެވެ. މަގާމު ބަދަލު ކުރުމާއި މަގާމުން ވަކިކުރުން ފަދަ ބަދަލުތައް ގެންނަ ސަބަބެއް ވެސް ހާމައެއް ނުކުރެ އެވެ.

ސިޔާސީ މަގާމުތައް އިތުރުވުމާއި މަގާމުތަކުގެ ޖުމްލަ އަދަދު ހާމަނުކުރުން ފަދަ ކަންކަމުގައި ސަރުކާރަށް ވަރަށް ބޮޑަށް ފާޑުކިޔުން އަމާޒުވެފައި ވަނިކޮށް ރައީސް މުއިއްޒު ވަނީ 200 ވުރެ ގިނަ ސިޔާސީ މަގާމުތައް އުވާލުމަށް ނިންމަވާ އެކަން އިއުލާނު ކުރައްވާފަ އެވެ. ރައީސް އެންގެވީ އަންނަ މަހުގެ 15 ގެ ކުރީން ސިޔާސީ މަގާމުތަކުގެ ތިއްބެވި 228 ބޭފުޅަކު ވަކި ކުރެއްވުމަށެވެ.