ޑްރަގް ބޮޑު މައްސަލައިގެ ބޮޑު ހުކުމް | އުމުރަށް ޖަލަށް ލީ މީހުންގެ ފޮޓޯ އާންމު ކޮށްފި

ރާއްޖޭގައި މި ފަހުގެ ތާރީހެއްގައި މަސްތުވާތަކެތީގެ މައްސަލައެއްގައި ކުރި އެންމެ ބޮޑު ހުކުމުގައި ހިމެނޭ ހަތަރު މީހުންގެ ފޮޓޯ އާންމު ކޮށްފި އެވެ.

ކްރިމިނަލް ކޯޓުން އިއްޔެ މި ހުކުމް ކޮށްފައިވަނީ ގދ. ތިނަދޫ / ރަންގަލް، ހަސަން ލޫތު (45އ)، ހުޅުމާލެ ފްލެޓް ނަންބަރު 01-ޖީ-45 ހަސަން ރަޝީދު (36އ)، ތ. ތިމަރަފުށި / ވައިޓްރޯސް، އިސްމާއިލް ޝަރީފް (43އ) އަދި މާލެ، މއ. ހަސްލަތު، ޝާނިޔާ އިބްރާހިމް (35އ) ގެ މައްޗަށެވެ.

މި ހަތަރު މީހުން ޖަލަށްލާން ހުކުމްކުރުމުގެ އިތުރުން ޖޫރިމަނާކޮށްފައި ވެއެވެ. އެގޮތުން، ހަސަން ލޫތު ދެ މިލިއަން ރުފިޔާ އިން، ހަސަން ރަޝީދު އެއް މިލިއަން ރުފިޔާ އިން އަދި އިސްމާއީލް ޝަރީފާއި ޝާނިޔާ އިބްރާހިމް 500،000 ރުފިޔާ އިން ޖޫރިމަނާކޮށްފައި ވެ އެވެ.

މި ހަތަރު މީހުން ހައްޔަރުކޮށްފައިވަނީ ދިވެހި ރާއްޖެއަށް މަސްތުވާތަކެތި އެތެރެކޮށް، އެތަކެތި ބޭނުންކޮށް، ގެންގުޅެ އަދި ޓްރެފިކް ކުރާކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން 2021 ޖަނަވަރީ 12 ވަނަ ދުވަހު ހިންގި އޮޕަރޭޝަނުގައެވެ.
ގެ އިތުރުން މި މައްސަލައާ ގުޅިގެން ފުލުހުންގެ ބެލުމުގެ ދަށަށް ގެނައި 1،466،000 ރުފިޔާ އާއި 76،675 ރުފިޔާ ދައުލަތަށް ނެގުމަށް ވެސް ވަނީ އަމުރުކޮށްފަ އެވެ. މީގެ ތެރޭގައި ހިމެނޭ 1،466،000 ރުފިޔާ އަކީ މ. ބުރެވިމާގެއިން ހޯދާފައިވާ ފައިސާ އެވެ. ދެން ހުރި ފައިސާ ހޯދީ ރޭއަލި ގެސްޓްހައުސް އިންނެވެ.

ހުކުމްގައި ވަނީ މި ފައިސާ އަކީ ކުށްކޮށްގެން ހޯދާފައިވާ ފައިސާ ކަމުން ދައުލަތަށް ނަގަން އަމުރުކުރާ ކަމަށެވެ.