ޓެކްސް ނެގުމާ ދެކޮޅެއް ނޫން، އެކަމަކު ފައިސާ ހޭދަކުރަން ޖެހޭނީ ރަނގަޅަށް

ޓެކްސް ނެގުމާ ދެކޮޅު ނޫން ކަމަށާ، އެކަމަކު ޓެކުހުގެ ފައިސާ ހޭދަކުރަން ޖެހޭނީ އެންމެ ރަނގަޅު ގޮތުގައި ކަމަށް ރާއްޖޭގެ އެންމެ ބޮޑު ރިސޯޓުގެ ވެރިޔާ އަހުމަދު ސިޔާމް މުހައްމަދު ވިދާޅުވެއްޖެ އެވެ. 

ސިޔާސީ ޕާޓީ އެމްޑީއޭގެ ރައީސްގެ މަގާމުގައިވެސް ހުންނެވި ވިޔަފާރިވެރިޔާ ސިޔާމް ވިދާޅުވީ ފާއިތުވި އަހަރުތަކުގައި ބުރަ މަސައްކަތް ކުރާ ރައްޔިތުން އަތުން ނަގައި ޓެކްސް އެއް ދުވަހުން އަނެއް ދުވަހަށް ބޮޑުކުރަމުން އައިކަމަށް އޭނާ ވިދާޅުވި އެވެ. 

"ގައުމަށް ލާރި ވެސް ލިބޭ. މި ގައުމަކީ ސައުތު އީސްޓް އޭޝިއާގައި އޮތް އެންމެ ހަގީގަތުގައި ބުނާނަމަ އެންމެ މުއްސަނދި ގައުމު ވެސްމެ. ޓެކްސްގެ ބޮލަކަށް ޖެހޭ މިންވަރުން ބަލާނަމަ ވެސް މަތި،" ސިޔާމް ވިދާޅުވި އެވެ. 

ސިޔާމް ވިދާޅުވި ގޮތުގައި ރާއްޖެއަށް ޓެކުހުގެ ގޮތުގައި 5 ބިލިއަން ޑޮލަރު ލިބޭ ކަމަށާ އެކަމަކު މީގެ ތެރޭން ދެ ބިލިއަން ޑޮލަރު އަޅަނީ ކަނޑަށް ކަމަށެވެ. 

"އަޅުގަނޑުމެން މި ޓެކްސް އިތުރަށް 10 ގުނަ ދެއްކިޔަސް 100 ގުނަ ޖެއްސިޔަސް، 1،000 ގުނަ ޖެއްސިޔަސް އިއްޒަތްތެރި ރައީސް މިއަކުން ކުރާނެ ރާހަތެއް ނޯންނާނެ،" އޭނާ ވިދާޅުވި އެވެ.

ދައުލަތް ދެކޮޅު ނުޖެހިގެން އުޅޭ ސަބަބެއްގެ ގޮތުގައި ސިޔާމް ވިދާޅުވީ ދައުލަތުގެ ކުންފުނިތަކުގައި ހުރި އިޝްރާފާއި ސަރުކާރުގެ އެސްއޯއީތަކެވެ. އެގޮތުން ކޮންމެ ވެރިއަކުވެސް ގިނަ އަދަދެއްގެ ކުންފުނި އުފައްދައި އިޝްރާފު ބޮޑުކަން ސިޔާމް ފާހަގަ ކުރެއްވި އެވެ. އޭނާ ވިދާޅުވީ މިވަގުތު ކުރަން ޖެހޭ ކަމަކީ ޖަރީމާ ހިންގަން އުފައްދަވާފައިވާ ކުންފުނިތައް އުވާލުމެވެ. 

"މިފްކޯއިން އެކަނި ވެސް މިދިޔަ އަހަރު ފަސް ބިލިއަން ރުފިޔާގެ ގެއްލުންވި. މޯލްޑިވިއަންއަށް ވެސް އެއް ބިލިއަން ޑޮލަރެއްހާ ފައިސާގެ ގެއްލުންވި ދެން އަޅުގަނޑުމެން އިތުރަށް ކިތަންމެ ޓެކްސްއެއް ނެގިޔަސް ރައްޔިތުންނަށް ކުރާނެ ފައިދާއެއް ނޯންނާނެ،" ސިޔާމް ވިދާޅުވި އެވެ.