ބިބީގެ ރިވިއު: ފިލްމު މޮޅޭ، ރީއްޗޭ ބުނަނީ ވަރަށް ގިނަ ސަބަބުތައް ހުރީމަ

ރާއްޖޭގެ އެންމެ ކާމިޔާބު ފިލްމު ސްޓޫޑިއޯ -- ޑާކްރެއިން އެެންޓަމައިންޓްގެ އާ ފިލްމް "ބިބީ" މި މަހުގެ ހަތްވަނަ ދުވަހުން ފެށިގެން ސިނަމާ ގައި ދަނީ ދައްކަމުންނެވެ. ޑާކްރެއިންގެ ކޮންމެ ފިލްމަކަށް ވެސް ފިލްމީ އޯޑިއެންސް ބޮޑު އިންތިޒާރެއް ކުރެ އެވެ. އޭގެ ސަބަބަކީ އެ ސްޓޫޑިއޯގެ އުފެއްދުންތަކަށް އޮންނަ އިތުބާރެވެ. މިހާތަނަށް ގެނެސް ދިން ކޮންމެ ފިލްމެއް / ސީރީޒެއް / އުފެއްދުމެއް ކޮލެޓީ ވެފައި ރީތި ވީމަ އެވެ.

"ބިބީ" އަކީ ޑާރްކެއިންގެ ތަފާތު އުފެއްދުމެވެ. އެއީ މިހާތަނަށް އެ ސްޓޫޑިއޯ އިން އުފައްދާފައި ނުވާ ސްޓައިލެއްގެ ފިލްމެކެވެ. ބިރުވެރި / ހެއްވާ މަޖާ ފިލްމެކެވެ. އެހެން ކަމުން މި ފިލްމު ބަލާލަން ގިނަ ބަޔަކު ތިބީ ބޮޑު އިންތިޒާރެއްގަ އެވެ.

މިހާތަނަށް "ބިބީ" ގެ 8 ޝޯ ވަނީ ދައްކާފަ އެވެ. ފިލްމު ބެލި އެންމެން ވެސް ދައްކަނީ އެއް ވާހަކަ އެކެވެ. މިއީ ޑާކްރެއިން އިން ގެނެސްދެމުން އައި ރީތި ފިލްމުތަކުގެ ލިސްޓަށް އިތުރުވީ ބޮޅެއް ކަމުގަ އެވެ. އެންމެނަށް ހެން ފިލްމު ވަރަށް ކަމުދިޔަ އެވެ. ފިލްމު ބެލި މީހުން ކޮށްފައިވާ ޕޯސްޓަކާއި މީޑިއާތަކަށް ދިން އިންޓަވިއުތަކުން އެކަން ސާފުކޮށް އެ އޮތީ ފެންނާށެވެ.

ހަގީގަތަކީ ވެސް އެއީ އެވެ. "ބިބީ" އަކީ ރީތި ފިލްމެކެވެ. އެއް ނަޒަރަކުން އެއީ ވަރަށް މޮޅު ފިލްމެކެވެ. ޝައުގުވެރި ކުރުވަނި ގިނަ ކަންކަން ހިމެނޭ ފިލްމެކެވެ. އެންމެ "ބިބީ" ރީއްޗޭ، މޮޅޭ އެ ބުނަނީ ބައިވަރު ސަބަބުތަކެއް ހުރެގެންނެވެ.

މިއީ ހެއްވާ މަޖާ އެހެނަސް ބިރުވެރި ކަންތައްތަކެއް ދައްކުވައިދޭ ފިލްމެކެވެ. ފިލްމުގައި ހިމެނޭ ހާދިސާތައް ގެނެސް ދީފައި ވަނީ ވަރަށް ޝައުގުވެރި ގޮތަކަށެވެ. ޒުވާން ރޭޑިއޯ ހުށައެޅުންތެރިޔާ ޝަހުދާ މަހުމޫދު (ޝަހޫ) ގެ ސްކްރީންޕްލޭ އަކަށް މި ފިލްމު ޑައިރެކްޓް ކޮށްފައި ވަނީ ވެސް އޭނާ އެވެ.

ފިލްމުގައި ދައްކައި ދެނީ ދެމަފިރިއަކު ގެއަކަށް ބަދަލުވުމުން އެގޭގެ ތެރޭގައި ހިނގާ ކަންތައްތަކެވެ. ގޭގެ ތެރޭގައި ހިނގަނީ ބިރުވެރި ކަންތައްތަކެެކެވެ. އެއީ ކުރީން އެ ގޭގައި މީހަކު ހިންގާފައިވާ ނުބައި އަމަލެއްގެ ނަތީޖާ އެވެ. ނަމަވެސް އެ ބިރުވެރި ކަންކަންމުގެ ތެރޭގައި ދިމާވަނީ ހީހީ ހަލާކުވާހާ މަޖާ ކަންތައްތަކެވެ.

އެ ހުރިހާ ކަމެއް ގުޅުވާލާ ވަރަށް ފުރިހަމަ ގޮތަކަށް ވަށާޖައްސާލާފައިވުމަކީ ފިލްމު ރީތިވުމުގެ ވަރަށް ބޮޑު ސަބަބަކެވެ.

ޑާކްރެއިންގެ ކޮންމެ ފިލްމަކާމެދު ވެސް އެންމެން އިއްތިފާގުވާ އެއް ކަމެއް އޮވެ އެވެ. އެއީ ފިލްމުތަކުގެ މޮޅު ކަމެވެ. އެއް ފިލްމަށް ވުރެ އަނެ ފިލްމު މޮޅުކޮށް އުފެއްދުމަށް އެ ސްޓޫޑިއޯ އިން ކުރާ މަސައްކަތަކީ ތައުރީފު ހައްގު މަސައްކަތެކެވެ. ހުރިހާ ޝުކުރެއް މޮގާއާ އޭނާގެ ޓީމަށެވެ.

"ބިބީ" އަކީ އެ ނަޒަރުން ބަލާނަމަ ވަރަށް މޮޅު އުފެއްދުމެކެވެ. ފިލްމުގެ މަންޒަރުތައް ވަރަށް ހިތްގައިމެވެ. ޑާކްރެއިންގެ އެހެން ފިލްމުތަކެކޭ އެއްގޮތަށް ވަރަށް ރީތި މަންޒަރުތައް ހިމަނާ މި ފިލްމަށް ވެސް ވަނީ ބޮޑު ފުރިހަަމަ ކަމެއް ގެނެސްދީފަ އެވެ.

ބިރުވެރި މަންޒަރުތައް ގެނެސްދީފައިވާ ގޮތް އަސްލާ އެއްގޮތް ވުމަކީ ވެސް މި ފިލްމު މޮޅުވުމުގެ ސަބަބެކެވެ. ފިލްމުގައި ހިމެނޭ ހުރިހާ ކެރެކްޓާއެއްގެ ވެސް ބިރުވެރި މަންޒަރުތައް ހިމެނެ އެވެ. އެއިން ކޮންމެ މަންޒަރެއް ފުރިހަމަ އަށް ގެނެސްދޭން ވަރަށް މަސައްކަތް ކޮށްފައިވެ އެވެ. ގެނެސްދީފައި ވަނީ ވަރަށް ވެސް ފުރިހަމައަށެވެ.

ފިލްމުގައި ހިމެނޭ ހުރިހާ އެކްޓަރުންގެ އެކްޓިން މޮޅޭ ބުނަން ޖެހެ އެވެ. ހާއްސަކޮށް މުހިންމު ރޯލުތަކުން ފެންނަ ތަރީންނެވެ.

މަޖޫއާ ޝަރަފް އަދި ޝީލާ އާއި ސައީދުގެ އެކްޓިން އާދަޔާ ހިލާފަށް މޮޅެވެ. އާނަންދުއާ ދެން ހިމެނޭ ތަރީންގެ އެކްޓިން ވެސް ރަނގަޅެވެ. ފިލްމުގައި މަޖޫގެ ފެންނަނީ ތަފާތު ދެ ރޯލެކެވެ. އެއް ރޯލަކީ ވަރަށް ޒިންމާދާރު އަންހެނެއްގެ ރޯލެވެ. ދެން ޖިންނި ކެރެކްޓާ އެކެވެ. މި ދެ ރޯލް ވެސް ހުށައަޅައިދިނީ މަޖޫގެ ކުޅަދާނަކަން ސާބިތުކޮށް ދެމުންނެވެ.

ޝަރަފް އަކީ ކިތަންމެ ޒުވާން އެކްޓަރެއް ނަމަވެސް އޭނާއަކީ މިހާރު ސިނަމާގައި ހުރި އެންމެ މޮޅު އެކްޓަރުންގެ ތެރޭގައި ހިމެނޭ މީހެކެވެ. "ބިބީ" ގައި ޝަރަފްގެ ފެންނަނީ ތަފާތު ރޯލެކެވެ. ވަރަށް ބިރު ގަންނަ އެކަމަކު ކަންކަމާ ކުރިމަތިލާން ޖެހޭ މީހެކެވެ. ޝަރަފު ފެންނަ ބައެއް ސީންތަކުގައި ހީހީ ބަލިވެ އެވެ. އަނެއް ބައި ސީންތަކުގައި ޝަރަފުގެ މޮޅު އެކްޓިން އިން ބެލުންތެެރީންގެ ހިތްތައް ރޮއްވާލަ އެވެ.

ޝީލާއާ ސައީދުގެ ރޯލަކީ "ބިބީ" ބަލާލަން ދާން ޖެހޭ އެންމެ ބޮޑު އެއް ސަބަބެވެ. ކޮމެޑީ ރޯލްތަކަށް ޝީލާ ވަރެއް ނޯންނާނެ އެވެ. އެކަން އޭނާ ކުރީން ކުޅުނު ބައެއް ފިލްމުތަކުން ވެސް އޮތީ ސާބިތުކޮށްދީފަ އެވެ. "ބިބީ" ގައި ވެސް ޝީލާ ފެންނަ ކޮންމެ މަންޒަރަކާ އެކު އޮލިމްޕަސްތެރޭ ހުނުމުގެ އަޑު ނޫން އަޑެއް ނީވެ އެވެ. ސައީދުއާ ދެ މީހުން އެކުގައި ފެންނަ މަންޒަރުތަކުން އެކަކަށް ވެސް ނުހީ ނުއިދެވޭނެ އެވެ.

ފިލްމުގައި އެ މީހުން އަމިއްލައަށް މަޖާ ވަނީ އެއް ނޫނެވެ. ސްކްރީން ޕްލޭގެ މޮޅުކަމާއި ފުރިހަމަ އެކްޓިން އިން އޯޑިއެންސް ހެއްވާލަނީ އެވެ.

"ބިބީ" އަކީ ޑާކްރެއިން އިން ކުރި ތަފާތު ތަޖުރިބާ އެކެވެ. އެ ސުޓޫޑިއޯ އަބަދުވެސް ފާހަގަ ކުރެވިފައި ވަނީ މި ދާއިރާއަށް އާ ކަންކަން ތައާރަފު ކުރާ ބައެއްގެ ގޮތުގަ އެވެ. އަދި އާ ތަރީން ނެރެ މިހާރު ވެސް ދާއިރާގެ ތިބި ފަންނާނުންނަށް ފުުރުސަތު ދޭ ސްޓޫޑިއޯއެއްގެ ގޮތުގަ އެވެ.

މި ފަހަރުގެ މި ޕްރޮޖެކްޓް ޑާކްރެއިން އިން ހަވާލުކުރީ ޒުވާން ލިޔުންތެރިޔާ / ރޭޑިއޯ ހުށައެޅުންތެރިޔާ ޝަހޫއަށެވެ. މިއީ ޝަހޫގެ ފުރަތަމަ ފިލްމު ޑައިރެކްޝަނެވެ. ނަމަވެސް މި ފިލްމު ބަލާފައި މިއީ އަލަށް މީހަކު ކޮށްފައި އޮތް މަސައްކަތެކޭ ހީ ނުވާނެ ކަން ގައިމެވެ. ޝަހޫގެ މަސައްކަތް އޭނާ ކޮށްފައި ވަނީ ވަރަށް ފުރިހަމަ އަށެވެ. 

މިވެނި ކަމެއް މިހެން ކޮށްލިނަމަ ހާދަ ފުރިހަމަ ވާނެއޭ ބުނާނެ ކަންތައްތަކެއް ނެތެވެ. ފިލްމު ބެލުންތެރީންނަށް ގެނެސް ދިނީ މުޅީން ފުރިހަމަ ކޮށްފަ އެވެ. އެކަން އެހެންވުމުގެ މައިގަނޑު ސަބަބަކަށް ވާނީ ޑާކްރެއިންގެ ޓީމުކަން ޔަގީނެވެ.

ޝަހޫގެ ޑައިރެކްޝަނެއް ނަމަވެސް ފިލްމުގައި ޑާކްރެއިންގެ ކޮލެޓީ ހުންނާނެ ވާހަކަ މޮގާ ގެންދިޔައީ ތަކުރާރުކޮށް ބުނަމުންނެވެ. އެކަން ފިލްމުން ވަނީ ޔަގީން ކޮށްދީފަ އެވެ.

"ބިބީ" ދައްކަން ޑާކްރެއިންނަށް ލިބުނީ މަދު ދުވަސްކޮޅެކެވެ. އެއީ އޮލިމްޕަހުގެ ތާށިކަމުންނެވެ. "ބިބީ" އަށް ލިބުނީ މި މަހުގެ ހަތަކުން 20 ވަނަ ދުވަހުގެ ރޭގެ ނިޔަލަށެވެ.

ކުރިއަށް ދެން އޮތީ "ބިބީ"ގެ ފަހު ޝޯތަކެވެ. އެ ޝޯތަކުގެ ޓިކެޓް މިހާރު ވަނީ ވިއްކަން ފަށާފަ އެވެ. މިއީ ކޮންމެހެން ބަލާލަން ޖެހޭ ރީތި / މަޖާ ފިލްމެކެވެ. ޔަގީން ކަމަކީ އޮލިންޕަހުން ނިކުންނާނީ ހިތްހަމަޖެހިގެން ކަމެވެ. މޮޅު އުފެއްދުމެއް ބަލާލެވުނު ކަމުގެ އިހުސާސު ކުރެވޭނެ އެވެ. އުފާވެރި ވަގުތުކޮޅެއް ހޭދަކޮށްލެވޭނެ އެވެ. އެކުވެރީންނާ ހީލަން ވަގުތުކޮޅެއް ހޭދަކޮށްލަން ވެސް ބަލާލަން ރަނގަޅު ފިލްމެކެވެ.