ރާއްޖޭގައި ވޭޕް މަނާކުރުން: ގާނޫނަށް ބަދަލު ގެންނަން މި ހަފްތާގައި ހުށައަޅަނީ

ރާއްޖެއަށް ވޭޕް އެތެރެކުރުން މަނާ ކުރަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމެވު ނިންމެވުން ތަންފީޒުކުރުމަށްޓަކާ ގާނޫނުތަކަށް ގެންނަންޖެހޭ އިސްލާހުތައް މިހަފްތާގެ ތެރޭގައި މަޖިލީހަށް ފޮނުވުމަށް ކުރަންޖެހޭ މަސައްކަތް ކުރަމުންދާ ކަމަަށް ބަންޑާރަ ނާއިބު އަހްމަދު އުޝާމް ވިދާޅުވެއްޖެ އެވެ. 

އެކްސް ގައި ކުރެއްވި ޕޯސްޓެއް ގައި ރައީސް މުއިއްޒު މިއަދު ވިދާޅުވީ ‏ވޭޕްކުރުމަށް ބޭނުންކުރާ ތަކެއްޗާއި އެ ތަކެތީގެ ވަކިވަކި ބައިތައް ދިވެހިރާއްޖެއަށް އެތެރުކުރުން ނޮވެމްބަރު 24، 2024 އިން ފެށިގެން މަނާ ކުރުމަށާ ދިވެހިރާއްޖޭގައި ވޭޕްކުރުމަށް ބޭނުންކުރާ ތަކެތި ބޭނުންކުރުމާއި ގެންގުޅުމާއި އުފެއްދުމާއި ވިއްކުމާއި ރާއްޖޭގައި އިޝްތިހާރު ކުރުމާއި ހިލޭބެހުން ޑިސެމްބަރު 15، 2024 އިން ފެށިގެން މަނާކުރުމަށް ކުރަންޖެހޭ އެންމެހާ ކަންކަން ކުރުމަށް ކަމާބެހޭ ފަރާތްތަކަށް އަންގަވާފައިވާ ކަމަށެވެ.

ބަންޑާރަ ނާއިބު ވިދާޅުވީ ރައީސްގެ ނިންމެވުން ތަންފީޒުކުރުމަށްޓަކާ ގާނޫނުތަކަށް ގެންނަންޖެހޭ އިސްލާހުތައް މިހަފްތާގެ ތެރޭގައި މަޖިލީހަށް ފޮނުވުމަށް ކުރަންޖެހޭ މަސައްކަތް ކުރަމުންދާ ކަމަށެވެ.

އެގޮތުން ދުންފަތް ކޮންޓްރޯލްކުރުމާބެހޭ ގާނޫނާއި ދިވެހިރާއްޖޭގެ އެކްސްޕޯޓް އިމްޕޯޓް ގާނޫނަށް އިސްލާހު ގެނައުމަށް މަޖިލީހަށް ހުށަހެޅުމަށް ނިންމާފައިވާ ކަމަށް ވިދާޅުވި އެވެ.

ރާއްޖޭގައި ވޭޕު ކުރުން ވަނީ ވަރަށް ބޮޑު ފެޝަނަކަށް ވެފަ އެވެ. ވަރަށް ޒުވާން އުމުރުގައި ގިނަ ބަޔަކު ވޭޕު ކުރަން ފަަށަ އެވެ.

ފިިރިހެނުންގެ އިތުރުން ވަރަށް ގިނަ އަންހެނުން ވެސް ވޭޕް ކުރެ އެވެ. ސުކޫލުގައި އުޅޭ ވަރަށް ގިނަ ދަރިވަރުންނަކީ ވެސް ވޭޕު ކުރާ ކުދީންނެވެ.

ސަރުކާރުގެ މި ނިންމުން އައީ ރާއްޖެއަށް ވޭޕް އެތެރެކުރުން މަނާކުުރުމަށް ޑޮކްޓަރުންގެ ޖަމިއްޔާ އާއި ކުޅިވަރު އެސޯސިއޭޝަންތަކާއި ސުކޫލުތަކުގެ ވެރީންނާއި ސިއްހީ ދާއިރާގެ ހޭލުންތެރި ކަމަށް މަސައްކަތް ކުރާ ޖަމިއްޔާތަކާއި އާންމުން ވެސް އެކަމަށް ގޮވާލަމުން ދަނިކޮށެވެ. އެ ނިންމުމަަށް ވަރަށް ގިނަ ބަޔަކު ދަނީ މަރުހަބާ ކިޔަމުންނެވެ.