ރައީސްގެ އދ ދަތުރުފުޅަށް 2.4 މިލިއަން، ސޯލިހް ކުރެެއްވި ދަތުރުފުޅަށް 5.3 މިލިއަން

އދ.ގެ އާއްމު މަޖިލީހުގެ ބައްދަލުވުމުގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކުރެއްވި ދަތުރުފުޅުގެ ހަރަދު ތަފްސީލް ރައީސުލްޖުމްހޫރިއްޔާގެ އޮފީހުން މިއަދު ހާމަކޮށްފި އެވެ.

މިދިޔަ މަހުގެ 20 ވަނަ ދުވަހުން ފެށިގެން 29 ވަނަ ދުވަހަށް ރައީސް ކުރެއްވި މި ދަތުރުފުޅަކީ އދގެ އާންމު މަޖިލީހުގެ 79 ވަަނަ ސެޝަން "ހައި ލެވެލް ވީކް" ގައި ތަގުރީރު ކުރެއްވުމަށް ކުރެއްވި ދަތުރުފުޅެކެވެ.

ރައީސް އޮފީހުުން މިހާރު ވަނީ މި ދަތުރުފުޅުގެ ހަރަދު ތަފްސީލް އާންމު ކޮށްފަ އެވެ. މި ދަތުުރުފުޅަށް ހަރަދުވީ 2.4 މިލިއަން ރުފިޔާ އެވެ.

މި ދަތުރުފުޅުގައި ރައީސް ވަނީ ވަރަށް ގިނަ ގައުމުތަކުގެ އިސްވެރީންނާއި ބައްދަލު ކުރައްވަވާފަ އެވެ. އެ ބައްދަލްވުންތަކުގައި ގުޅުން ބަދަހި ކުުރުމާ ގުޅޭ މުހިންމު މަޝްވަރާތަކެއް ކުރައްވަވާފަ އެވެ.

މީގެ އިތުރުން ނިއުޔޯކް އާއި ކައިރި ހިސާބުތަކުގައި ތިބި ދިވެހީންނާއި ބައްދަލު ކޮށް ހާލު ބައްލަވާފައިވެ އެވެ.

އދ.ގެ އާއްމު މަޖިލީހުގެ ބައްދަލުވުމުގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކުރެއްވި ދަތުރުފުޅުގެ ހަރަދު ތަފްސީލް ހާމަކުރިއިރު ކުރީގެ ރައީސް އިބްރާހިމް މުހައްމަދު ސޯލިހް އެންމެ ފަހުން އދ އަށް ކުރެއްވެވި ދެ ދަތުރުފުޅަަށް ވުރެ ހަރަދު ބޮޑުތަނުން ކުޑަ އެވެ.

ރައީސް ސޯލިހް ވަނީ ދެ ފަހަރެއްގެ މަތީން އދ އަށް ވަޑައިގެންފަ އެވެ. އެއީ 2019 ވަނަ އަހަރާއި 2021 ވަނަ އަހަރު އެވެ.

ފުރަތަމަ ދަތުރުފުޅަށް 4.1 މިލިއަން ރުފިޔާ އަދި ދެވަނަ ދަތުރުފުޅަށް 5.3 މިލިއަން ރުފިޔާ ވަނީ ހަރަދު ކުރައްްވާފަ އެވެ.