ކޫއްޑޫގައި ނުކުޅެދުންތެރިކަން ހުންނަ މީހަކަށް ގަނާކުރަނީ | ކުންފުނިން މައްސަލަ ބަލަނީ

ކޫއްޑޫ ފިޝަރީޒް ކޮމްޕްލެކްސްގައި މަސައްކަތްކުރާ ނުކުޅެދުންތެރިކަން ހުންނަ މީހަކަށް އެތަނުގެ ބައެއް މުވައްޒަފުން ގަނާކުރާ މައްސަލައެއް ފެންމަތިވެ މިފްކޯއިން އެ މައްސަލަ ބަލަން ފަށައިފި އެވެ. 

ރާއްޖޭގެ މަޝްހޫރު ފޭސްބުކް ޕޭޖެއްގައި އެ މުވައްޒަފުގެ ކޮއްކޮއާ ހަވާލާދީ ބުނެފައިވަނީ އޭނާ ވަޒީފާއަށް ދާ ކޮންމެ ދުވަހަކުވެސް އެތަނުގައި މަސައްކަތްކުރާ މުވައްޒަފުންތަކެއް އޭނާއާ ދިމާކޮށް އޭނާ ރުޅިއަންނަ ކަހަލަ ނަންނަމުން މުހާތަބުކޮށް ހަދާ ކަމަށެވެ. 

ހާއްސަ އެހީއަށް ބޭނުންވާ ދެ ކުދިންގެ ބައްޕަ ވަޒީފާ އަދާކުރަނީ އެ ދެ ކުދިންގެ ހައްގުގައިކަން ފާހަގަކޮށް އެ ޕޯސްޓުގައި ބުނެފައިވަނީ އޭނާ ކާން ކެންޓީނަށް ދިއުމުން ދިމާކޮށް ހުތުރު އޭނާ ރުޅި އަންނަ ޒާތުގެ ނަންނަން ބޭނުންކޮށްގެން އެއްޗެހި ގޮވައި ހަދާ ކަމަށެވެ. 

އަދި އަމިއްލަ ނަފުސުގެ ދިފާއުގައި ކަމެއް ކޮށްފިނަމަ ޖަމާއަތް ހަދައިގެން އެންމެން އަރައިގަނެ އޭނާގެ ބޮލުގައި ތަޅައި އަނިޔާކުރާ ކަމަށްވެސް އޭނާގެ ކޮއްކޮއާ ހަވާލާދީ ލިޔެފައިވާ ޕޯސްޓުގައި ބުނެފައިވެ އެވެ. އެހެންވެ ބައެއް ދުވަސްދުވަހު ބަނޑުހައިވިޔަސް އޭނާ ކާންނުދާ ކަމަށާއި، އަނެއް ބައި ދުވަސްދުވަހު ކާން ގޮސްފައި ނުކައި އަނބުރައި އަންނަންޖެހޭ ކަމަަށްވެސް ބުނެފައިވެ އެވެ. 

މި ޕޯސްޓާ ގުޅިގެން ކޮމެންޓު ކުރި ކޫއްޑޫގައި ކުރިން މަސައްކަތްކުރި ބައެއް މުވައްޒްފުންވަނީ އެ މައްސަލައަކީ ހަގީގަތުގައިވެސް ހިނގަމުންދާ ކަމެއްކަން ޔަގީންކޮށްދީފަ އެވެ. އެމީހުންވެސް ބުނެފައިވަނީ އެމީހާއަށް ކެންޓީނުގައި ބައި ހަދައިގެން ގަނާކުރާ މަންޒަރު އެތައް ފަހަރަކު ފެނިފައިވާ ކަމަށެވެ. 

މިކަމާ ގުޅިގެން ކޫއްޑޫ ފިޝިން ކޮމްޕްލެކްސް ހިންގާ މިފްކޯގެ މީޑިޔާ އޮފިޝަލު މިއަދު ވިދާޅުވީ އެ މައްސަލަ އެ ކުންފުނީގެ ސަމާލުކަމަށް އައިސްފައިވާ ކަމަށެވެ. އަދި މިހާރު އެ މައްސަަލަ ކުންފުނީގެ ފަރާތުން ބަލަމުންދާ ކަމަށްވެސް އޭނާ ވިދާޅުވި އެވެ. 

"މުވައްޒަފުންނަށް ގާނާ ކުރުމާއި އެނޫންވެސް ފުރައްސާރައިގެ އަމަލުތަކަކީ މި ކުންފުނިން ޓޮލެރޭޓް ކުރާނެ ކަމެއް ނޫން ކަމުގައި ދަންނަވަން،" އެ މައްސަލަަ ބެލުމަށްފަހު އެކަމުގައި އެ ކުންފުނިން އަޅަންޖެހޭ ކޮންމެ ފިޔަވަޅެއްވެސް އަޅާނެކަމުގެ ޔަގީންކަން ދެމުން ކުންފުނީގެ މީޑިޔާާ އޮފިޝަލް ވިދާޅުވި އެވެ.