ކެބިނެޓަށް ގެންނެވި ބަދަލާއެކު ތިން ވަޒީރުންނަށް ރުހުން ހޯދަން ފޮނުއްވައިފި
މަޖިލީހަށް ރުހުން ހޯއްދެވުމަށް ފޮނުއްވި ތިން ބޭފުޅުންނަކީ ދާދިފަހުން ރައީސް މުއިއްޒު ކެބިނެޓަށް ގެންނެވި ބަދަލުގެ ތެރެއިން އަލަށް ވުޒާރާތަކާ ހަވާލުވެވަޑައިގެންނެވި ތިން ބޭފުޅުންނެވެ.
ފާއިތުވި ސެޕްޓެންބަރު 30 ވަނަ ދުވަހު ކެބިނެޓަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ގެންނެވި ބަދަލާ ގުޅިގެން ތިން ވަޒީރަކަަށް ރުހުން ހޯއްދެވުމަށް ރައްޔިތުންގެ މަޖިލީހަށް އެ ބޭފުޅުންގެ ނަންފުޅުތައް ރައީސް ފޮނުއްވައިފި އެވެ.
އެ ދުވަހު ރައީސް ގެންނަވާފައިވާ ބަދަލަކީ ފިނޭންސް މިނިސްޓަރުކަމުގައި ކުރިން ހުންނެވި ޑރ.މުހައްމަދު ޝަފީގު އެ މަގާމުން އިސްތިއުފާދެއްވުމާ ގުޅިގެން އޭނާ ހުންނެވި މަގާމަށް އެހައިތަނަށް ފޮރިން މިނިސްޓަރު ކަމުގައި ހުންނެވި މޫސާ ޒަމީރު ހަމަޖެއްސެވުމެވެ.
އަދި ކުރިން ހެލްތު މިނިސްޓަރުގެ މަގާމުގައި ހުންނެވި ޑރ.އަބްދުﷲ ހަލީލު ފޮރިން މިނިސްޓަރުގެ މަގާމަށް އައްޔަންކުރައްވައި، ރައީސުލްޖުމްހޫރިއްޔާގެ އޮފީހުގައި ޕޮލިސީ ސެކްރެޓަރީގެ މަގާމުގައި ހުންނެވި މުހައްމަދު ނާޒިމް އިބްރާހީމު ހެލްތު މިނިސްޓަރުކަމަށްވަނީ ހަމަޖައްސަވާފަ އެވެ.
މިއަދު އެ ތިން ބޭފުޅުންނަށް އަލަށް އައްޔަންކުރެއްވި ވުޒާރާތަކުގެ ވަޒީރުކަމަށް ރުހުން ދިނުމަށް މަޖިލީހަށް ފޮނުއްވުމާ ގުޅިގެން މަޖިލީހުގެ ސަަރުކާރުގެ ޒިންމާ އަދާކުރާ މިންވަރު ބަލާ ކޮމިޓީއަށް އެބޭފުޅުންނަށް ރުހުން ދިނުމުގެ މައްސަލަ ފޮނުއްވުމަށް މަޖިލީހުގެ ރިޔާސަތުގައި އިންނެވި މަޖިލީހުގެ ނައިބުރައީސް އަހްމަދު ނާޒިމުވަނީ ނިންމަވާފަ އެވެ.
މިއީ ރައީސް މުއިއްޒުގެ ކެބިނެޓަށް ބަދަލު ގެންނެވި ފުރަތަމަ ފަހަރެވެ. ނަމަވެސް މީގެ ކުރީން ސަރުކާރުގެ އެހެން މަގާމުތަކަށް ބަދަލުތައް ގެނެސްފައިވެ އެވެ. އެގޮތުން ސްޓޭޓް މިނިސްޓަރުންނާއި ނާއިބުންނާއި ކުންފުނިތަކުގެ ވެރީން އަދި ސިޔާސީ މަގާމުތަކުގައި ތިއްބެވި ބައެއް ބޭފުޅުން މަގާމުތަކުން ވަކި ކުރައްވާފައިވެ އެވެ.
20 ވަނަ ރައްޔިތުންގެ މަޖިލީހުގައި ސަރުކާރު ހިންގާ ކޮންގުރެސް ޕާޓީގެ ފުރިހަމަ އަޣުލަބިއްޔަތު އޮތުމާއެކު އެއްވެސް ދަތިކަމެއް ނެތި ތިން ބޭފުޅުންނަށްވެސް މަޖިލީހުން ރުހުން ލިބިވަޑައިގަންނަވާނެ ކަމުގައި ބެލެވެ އެވެ.
ކޮމެންޓް
Republic of Maldives