ރައީސްގެ ބޮޑު ނިންމެވުމެއް: އަންނަ މަހުން ފެށިގެން ރާއްޖޭގައި ވޭޕު މަނާ

ރާއްޖެއަށް ވޭޕް އެތެރެކުރުން މަނާ ކުރަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެންމެ ނިންމަވައިފި އެވެ.

ސަރުކާރުގެ މި ބޮޑު ނިންމުން މީގެ ކުޑައިރުކޮޅެއްގެ ކުރީން އެމަނިކުފާނު ވަނީ އާންމުކޮށްފަ އެވެ. ސަރުކާރުގެ މި ނިންމުން އައީ ރާއްޖެއަށް ވޭޕް އެތެރެކުރުން މަނާކުުރުމަށް ޑޮކްޓަރުންގެ ޖަމިއްޔާ އާއި ކުޅިވަރު އެސޯސިއޭޝަންތަކާއި ސުކޫލުތަކުގެ ވެރީންނާއި ސިއްހީ ދާއިރާގެ ހޭލުންތެރި ކަމަށް މަސައްކަތް ކުރާ ޖަމިއްޔާތަކާއި އާންމުން ވެސް އެކަމަށް ގޮވާލަމުން ދަނިކޮށެވެ.

އެކްސް ގައި ކުރެއްވި ޕޯސްޓެއް ގައި ރައީސް ވިދާޅުވީ ‏ވޭޕްކުރުމަށް ބޭނުންކުރާ ތަކެއްޗާއި އެ ތަކެތީގެ ވަކިވަކި ބައިތައް ދިވެހިރާއްޖެއަށް އެތެރުކުރުން ނޮވެމްބަރު 24، 2024 އިން ފެށިގެން މަނާ ކުރުމަށާ ދިވެހިރާއްޖޭގައި ވޭޕްކުރުމަށް ބޭނުންކުރާ ތަކެތި ބޭނުންކުރުމާއި ގެންގުޅުމާއި އުފެއްދުމާއި ވިއްކުމާއި ރާއްޖޭގައި އިޝްތިހާރު ކުރުމާއި ހިލޭބެހުން ޑިސެމްބަރު 15، 2024 އިން ފެށިގެން މަނާކުރުމަށް ކުރަންޖެހޭ އެންމެހާ ކަންކަން ކުރުމަށް ކަމާބެހޭ ފަރާތްތަކަށް އަންގަވާފައިވާ ކަމަށެވެ.

ރާއްޖޭގައި ވޭޕު ކުރުން ވަނީ ވަރަށް ބޮޑު ފެޝަނަކަށް ވެފަ އެވެ. ވަރަށް ޒުވާން އުމުރުގައި ގިނަ ބަޔަކު ވޭޕު ކުރަން ފަަށަ އެވެ.

ފިިރިހެނުންގެ އިތުރުން ވަރަށް ގިނަ އަންހެނުން ވެސް ވޭޕް ކުރެ އެވެ. ސުކޫލުގައި އުޅޭ ވަރަށް ގިނަ ދަރިވަރުންނަކީ ވެސް ވޭޕު ކުރާ ކުދީންނެވެ.

ދުންފަތުގެ އިސްތިއުމާލު ކުރުމުގެ އިސްޓައިލަށް އައި ބަދަލާއެކު މިހާރު ބޭނުން ކުރާ ދުންފަތުގެ އިސްތިއުމާލު ކުރުމުގެ އާލާތްތައް އެތެރެ ކުރުމުގެ ޓްރެންޑުން މާ ނުރައްކާތެރި މަންޒަރެއް ފެނެ އެވެ.

ހިސާބުތައް ދައްކާ ގޮތުގައި 2022 ވަނަ އަހަރު ރާއްޖެއަށް ވޭޕިން ޑިވައިޒް އެތެރެ ކުރަން 16 މިލިއަން ރުފިޔާ ވަނީ ހަރަދުކޮށްފަ އެވެ. އެ އަހަރު 220،781 ޕޭޕިން ޑިވައިސް ރާއްޖެ އެތެރެކޮށްފައިވެ އެވެ. އަދި މިދިޔަ 2023 ވަނަ އަހަރު ވޭޕު ކުރަން ބޭނުން ކުރާ 140.645 ޑިވައިސް ރާއްޖެ އެތެރެކޮށްފައިވެ އެވެ. މި ތަކެތި އެތެރެ ކުރަން 12 މިލިއަން ހަރަދުކޮށްފައިވެ އެވެ.

ތަފާސް ހިސާބުތައް ދައްކާ ގޮތުގައި ނިކޮޓިން ހިމެނޭ އެކަމަކު އަނދާ ނުލައި ދުންފަތުގެ އިސްތިއުމާލް ކުރަން ބޭނުން ކުރާ އީ-ސިނގިރެޓްގެ 55،000 ކިލޯ ގްރާމް ނުވަތަ 61 ޓަނުގެ ތަކެތި 2022 ވަނަ އަހަރު ރާއްޖެ ވަނީ އެތެރެކޮށްފަ އެވެ.

އަދި މި ތަކެތި އެތެރެކުރަން އެ އަހަރު 9.1 މިލިއަން ރުފިޔާ ހަރަދުކޮށްފައިވެ އެވެ. ޑިއުޓީގެ ގޮތުގައި އެ އަހަރު 16 މިލިއަން ރުފިޔާ ދައުލަތަށް ވަނީ ދައްކާފަ އެވެ. ޖެހިގެން އައި 2023 ވަނަ އަހަރު 4،760 ކިލޯގްރާމްގެ މިފަދަ ތަކެތި އެތެރެކޮށްފައިވެ އެވެ. މި ތަކެތީގެ އަގު 9 މިލިއަން ރުފިޔާ އަށް އަރަ އެވެ.