ޖަލުގައި ފުލުހެއް ގައިގައި ތަޅައިގަތް މީހަކު އެއް އަހަރާއި ނުވަ މަހަށް ޖަލަށް

ކަސްޓޯޑިއަލް ޖަލެއްގައި ފުލުހުންގެ އޮފިސަރަކަށް ހަމަލާދީ މާރާމާރީ ހިންގި މީހަކު އެއް އަހަރާއި ނުވަ މަސްދުވަހާއި 20 ދުވަހަށް ޖަލަށް ލުމަށް ހުކުމްކޮށްފި އެވެ. 

މި މައްސަލައަކީ 2022 ވަނަ އަހަރުގެ ޖަނަވަރީ މަހުގެ ތެރޭގައި ޖަލު ގޮޅީގެ ފާހާނާ ސާފުކުރަން ގޮޅިއަށް ފުލުސް އޮފިސަރު މަަސައްކަތު މީހަކާއެކު ވަނުމުން އެ ގޮޅީގައި ހުރި ޏ.ފުވައްމުލައް، ކެލާގެ، އަހްމަދު ސާލިހު ގޮޅިން ނުކުމެ އެހެން ގޮޅިތައް ކުރިމަތީ އަޑުގަދަކޮށް ހަޑިހުތުރު ބަހުން މުއާމަލާތްކޮށް ގޮޅިއަށް ވަންނަން އިންކާރުކުރުމުގެ ހިނގި ހަމަނުޖެހުމާ ގުޅިގެން ދައުވާކުރި މައްސަލައެކެވެ. 

އޭނާ ގޮޅިން ނުކުމެ އަޑުގަދަކުރަން ފެށުމުން 2 ގޮޅިން އޭނާ ނެރެ 2 ނަންބަރާއި ފަސް ނަންބރު ގޮޅީގެ ދެމެދުގައި ހުންނަ ޕޯސްޓު ކައިރީ ބެހެއްޓުމުން ޖަލުގެ އިދާރީ އޮފީހާ ދިމާލަށް ދާން އުޅުމުން އޭނާ ހުއްޓުވަން ފުލުހުންގެ އޮފިސަރު މަސައްކަތްކުރި އެވެ. 

އޭނާ ހުއްޓުވަން އުޅުނު އޮފިސަރުގެ ގައިގެ އެކި ތަންތަނުގައި އަތުންނާއި ފައިން ތަޅައި މާރާމާރީ ހިންގުމަށްފަހު، ފުލުސް އޮފިސަރު ބިން މައްޗަށް ވައްޓާލައި އޭނާ ގެންގުޅުނު ވޯކީޓޯކީ ނަގައިގެން އެއިން އޮފިސަރު ގައިގައި ތެޅި އެވެ. އެ މާރާމާރީގެ ތެރޭގައި ފުލުސް އޮފިސަރުގެ ނިތްކުރި ތަޅައިގެން ދިޔަ އެވެ. 

އެ މައްސަލާގައި ދައުލަތުން ހެކިވެރިންގެ ގޮތުގައި މަންޒަރު ދުށް މީހަކާއި، ފުލުސް އޮފިސަރު ބެލި ޑޮކްޓަރާއި، ކްރައިމް ސީން ތައްޔާރުކުރި ފުލުސް އޮފިސަރު ހުށަހަޅާފައިވާއިރު، ދައުވާއަށް އިންކާރުކުރި ސާލިހުގެ ފަރާތުން ދިފާައީ ހެއްކެއް ހުށަހަޅާފައިނުވެ އެވެ. 

މި މައްސަލާގައި ސާލިހުގެ މައްޗަށް އުފުލާފައިވަނީ އަނިޔާއެއް ދިނުމުގެ ކުށުގެ ދައުވާއާއި ދައުލަތުގެ މުދަލަކަށް ގެއްލުން ދިނުމުގެ ކުށުގެ ދައުވާ އެވެ. ދައުލަތުގެ މުދަލަށް ގެއްލުންދިނުމުގެ ކުށުގެ ދައުވާކުރީ ވޯކީޓޯކީ ބޭނުންކޮށްގެން ފުލުސް އޮފިސަރަށް ދިން ހަމަލާގައި ވޯކީ ޓޯކީ ހަލާކުވުމާ ގުޅިގެންނެވެ. 

އެ މައްސަލާގައި އުފުލި އަނިޔާކުރުމުގެ ކުށް ސާބިތުވެ ސާލިހަށް އެއް އަހަރާއި ހަތް މަހާއި ހަ ދުވަހުގެ ހުކުމެއް އިއްވާފައިވާއިރު ދައުލަތުގެ މުދަލަކަށް ގެއްލުންދިނުމުގެ ކުށް ސާބިތުވެ އިތުރު ދެ މަހާއި 12 ދުވަހުގެ ހުކުމެއް އިއްވާފައިވާތީ، އެ މައްސަލާގައި އޭނާގެ މައްޗަށް ކޮށްފަައިވަނީ ޖުމްލަ އެއް އަހަރާއި ނުވަ މަހާއި 20 ދުވަހުގެ ހުކުމެކެވެ.