މި އަހަރުގެ ސެޕްޓެމްބަރަށް މާފުއްޓަށް 135،000 ޓޫރިސްޓުން

މި އަހަރުގެ ސެޕްޓެމްބަރު މަހުގެ ނިޔަލަށް މާފުއްޓަށް 135،000 ޓޫރިސްޓުން އައިސްފައިވާ ކަމަށް މާފުށީ ކައުންސިލުން ބުނެފި އެވެ. 

މާފުއްޓަށް އަންނަ ޓޫރިސްޓުންގެ އަދަދު އެއްކުރަން މާފުށީ ކައުންސިލުން މަސައްކަތް ފަށާފައިވާއިރު، އެ ކައުންސިލްގެ ރައީސް ހަސަން ސޮލާހު ވިދާޅުވީ މިހާތަނަށް 135،000 މީހުން އައިސްފައިވާ ކަމަށާ މިއީ ރާއްޖެ އަށް އައި ޓޫރިސްޓުންގެ 10 ވަރަކަށް ޕަސެންޓް ކަމަށާ މިއީ ބޮޑު ކުރިއެރުމެކެވެ. އަދި މި އަހަރު ޓޫރިސްޓުންގެ އަދަދު ދެ ލައްކައަށް އަރައި އަންނަ އަހަރު ތިން ލައްކަ ފަހަނަ އަޅާނެ ކަމަށް އޭނާ ވިދާޅުވި އެވެ. 

މިހާތަނަށް އެންމެ ގިނައިން މާފުއްޓަށް ޓޫރިސްޓުން އައި ގެސްޓްހައުސްތަކުގެ ތެރޭގައި ހިމެނެނީ އެ ވިޔަފާރި މާފުށީގައި އެންމެ ފުޅާކޮށް ހިންގަމުން ގެންދާ ފަރާތްތަކަށެވެ. މާނި ގެސްޓްހައުސް އާއި އެރީނާ ހޮޓެލްސް އަށް ޓޫރިސްޓުން އައި އަދަދު އުޅެނީ ގާތް ގަނޑަކަށް އެއް ވަރަކަށެވެ. ކާނިއަށް 31،000 އެއްހާ ޓޫރިސްޓުން އައިސްފައިވާއިރު އެެރީނާއަށް އައި ޓޫރިސްޓުންގެ އަދަދު 30،000 ގާތް ކުރެ އެވެ. އަދި ޓްރައިޓެން ގެސްޓްހައުސްއަށް 13976 ޓޫރިސްޓުން އައިސްފައިވެ އެވެ، 

މާފުށީގައި މިވަގުތު 50 އެއްހާ ގެސްޓްހައުސް ހުރިއިރު މި ރަަށުގައި ހުރި ޓޫރިސްޓު އެނދު އަދަދު ވަނީ 2،000 އަށްވުރެ މަތީގަ އެވެ.