ސިޔާމު ޒާރާއާ ކާވެނި ބައްލަވައިގަނެފި

މަޝްހޫރު ވިޔަފާރިވެރިޔާ އަދި އެމްޑީއޭގެ ރައީސް މީދު ދާއިރާގެ މަޖިލިސް މެންބަރު އަހްމަދު ސިޔާމު، ފާއިތުވި ބޮޑު އީދުގައި ބ.ކަމަދޫގައި އޮތް ކުޅިވަރުތަކުގެ ތެރެއިން މުޅި ރާއްޖެއަށް މަޝްހޫރުވި އާމިނިތު ޒާރާއާ ކާވެނި ކުރައްވައިފި އެވެ. 

އުމުރުފުޅުން 55 އަހަރުގެ ސިޔާމުއާއި 22 އަަހަރުގެ ޒާރާގެ ކާވެނީގެ ހަފުލާ ބާއްވާފައިވަނީ ސިޔާމުގެ އޮޅުވެލި ރިސޯޓުގަ އެވެ. އެ ހަފުލާގައި ޒާރާއާއި ސިޔާމުގެ އާއިލާ ބޭފުޅުންނާއި ބައެއް ގާތް އެކުވެރިން ބައިވެރިވި އެވެ. 

ކައިވެންޏަށްފަހު އެ ރިސޯޓުގައި ފަސް މިނިޓަށް ހަވާ އަރުވަން ވަނީ ހަމަޖެހިފަ އެވެ. އޭގެ ފަހުން ކަމަދޫގައި ވެސް ޕާޓީއެއް ބޭއްވުމަށް ހަމަޖެހިފައިވެ އެވެ. މައުލޫމާތު ލިބޭ ގޮތުގައި އެ ޕާޓީ އޮތީ އަންނަ ހޮނިހިރު ދުވަހު އެވެ. އެރޭ 10:00 ގައި އެރަށުގައި ވެސް ފަސް މިނެޓަށް ހަވާ އަރުވާނެ ކަމަށް މައުލޫމާތު ލިބެ އެވެ.

މި ކައިވެންޏާ ގުޅިގެން ކަމަދޫއަށް ތިން އަސް ގެންދާ މަންޒަރު ފެންނަ ވީޑިއޯއެއް ވެސް ވަނީ އާންމުވެފަ އެވެ. ވީޑިއޯއިން ފެންނަނީ ދެ ހުދު އަހާއި އެއް ކަޅު އަސް ގެންދާ މަންޒަރެވެ. ސިޔާމް އަކީ އަހަށް ވަރަށް ލޯބިކުރައްވާ ބޭފުޅެކެވެ.

ސިޔާމް، ޒާރާއާ ކައިވެނި ބައްލަވައިގަންނަވާއިރު، އޭނާ އުޅުއްވަނީ މޮރޮކޯ އަންހެނަކާ ވެސް ކައިވެނި ބައްލަވައިގަނެގެންނެވެ. އެ ކައިވެނި ވެސް ވަރަށް ބޮޑަށް ވައިގައި ހިފި އެވެ.