އިންޑިޔާއަށް ކުރެއްވި ފުރަމާނަ ދަތުރުފުޅަށްފަހު ރައީސް ރާއްޖެއަށް ވަޑައިގެންފި

ރައީސުލްޖުމްހޫރިއްޔާ ޑރ.މުހައްމަދު މުއިއްޒު އިންޑިޔާއަށް ކުރެއްވި ފުރަމާނަ ދަތުރުފުޅު ނިންމަވައިލެއްވުމަށްފަހު ރާއްޖެއަށް ވަޑައިގެންފި އެވެ. 

އިންޑިޔާގެ ރައީސް ދުރޫޕާދީ މުރްމޫގެ ދައުވަތަކަށް އިންޑިޔާއަށް ކުރެއްވި ފުރަމާނަ ދަތުރުފުޅުގައި މުރްމޫގެ އިތުރަށް އެ ގައުމުގެ ބޮޑުވަޒީރު ނަރެންދުރަ މޯދީއާ ރައީސްވަނީ ބައްދަލުކުރައްވައި ރަސްމީ މަޝްވަރާތައް ކުރިއަށް ގެންދަވާފަ އެވެ. އެ މަޝްވަރާތަކުގައި ރާއްޖެއާއި އިންޑިޔާ ގުޅިގެން އެކި ދާއިރާތަކުން މަސައްކަތްކުރާނެ ގޮތުގެ ތަސައްވުރަކާމެދު ދެ ގައުމުންވަނީ އެއްބަސްވެފަ އެވެ. 

ރައީސްގެ ދަތުރުފުޅުގައި ނިއުދިއްލީގެ އިތުރަށް މުމްބާއީއާއި ބެންގަލޫރަށް ޒިޔާރްތަކުރެއްވި އެވެ. އެ ތިން ސިޓީގައިވެސް އިންޑިޔާ ރާއްޖެ ވިޔަފާރީގެ ފޯރަމްތައް ބާއްވާފައިވެ އެވެ. އެ ފޯރަމުތަކުގައި ބައިވެރިވެވަޑައިގެން ރާއްޖޭގެ އިގުތިސާދުގައި އިންވެސްޓުކުރަން ހުރި ފުރުސަތުތަކާމެދު ރައީސްވަނީ ވާހަކަދައްކަވާފަ އެވެ. 

އަދި ދިއްލީއާއި ބެންގަލޫރުގައި ދިރިއުޅޭ ދިވެހިންނާ ބައްދަލުކުރައްވައި އެމީހުންގެ ހުރި ކަންބޮޑުވުންތައް ރައީސް އޮޅުންފިލުއްވައި އެމީހުންނާއެކު ވަގުތުކޮޅެއް ހޭދަކުރެއްވި އެވެ. 

އޭގެ އިތުރަށް މުމްބާއީ އަދި ބެންގަލޫރުގައި ރާއްޖޭގެ ފަތުރުވެރިކަން އިންޑިޔާގައި ޕްރޮމޯޓުކުރުމަށް ބޭއްވި ހަރަކާތްތަކުގައިވެސް ރައީސް ބައިވެރިވެވަޑައިގެންފައިވެ އެވެ، އަދި އެ ދެ ސިޓީއަށް ކުރެއްވި ދަތުރުފުޅުގައި މަހަރާޝްތުރާ އަދި ކަރްނަޓަކާގެ ގަވަރުނަރުންނާ ރައީސް ބައްދަލުކުރެއްވި އެވެ. 

މި ދަތުރުފުޅުގައި ފަސް އެއްބަސްވުމެއްގައި ރާއްޖެއިން ސޮއިކޮށްފައިވާއިރު ރާއްޖެއަށް ކުރިމަތިވެފައިވާ ބޭރު ފައިސާގެ ދަތިކަމުން އަރައިގަތުމަށް އެހީތެރިވުމަށް އިންޑިޔާގެ މަރުކަޒީ ބޭންކާއި ރާއްޖޭގެ މަރުކަޒީ ބޭންކުގެ މެދުގައި 400 މިލިއަން ޑޮލަރުގެ ކަރަންސީ ސްވޮޕް އެއްބަސްވުމެއް ހަދާފައިވެ އެވެ. 

އަދި ދެ ގައުމުގެ މެދުގައި ރުފިޔާއާއި ރުޕީސްއިން ވިޔަފާރިކުރުން ފަސޭހަކުރުމަށް 30 ބިލިއަން ރުފީސްގެ ކަރަންސީ ސްވޮޕެއް ހަމަޖައްސާފައިވެ އެވެ. 

އޭގެ އިތުރަށް ރޫޕޭ ކާޑު ރާއްޖޭގައި ބޭނުންކުރަން ފަށާއި، ހުޅުމާލޭގައި އިންޑިޔާގެ އެހީގައި އެޅި 700 ހައުސިން ޔުނިޓު އިފުތިތާހުކޮށް، ހަނިމާދޫ އެއާޕޯޓުގެ ރަންވޭވެސް އިފުތިތާހުކޮށްފައިވެ އެވެ.