އޮޅުވާލައިގެން ރާއްޖެއަށް އެތެރެވާން އުޅުނު 45 މީހަކު އަތުލައިގަނެފި

މި އަހަރުގެ މިހާތަނަށް ގަވާއިދާ ހިލާފަށް އޮޅުވާލައިގެން ރާއްޖެއަށް އެތެރެވާން އުޅުނު 45 މީހަކު ހިފަހައްޓާފައިވާކަމަށް މޯލްޑިވްސް އިމިގްރޭޝަނުން ބުނެފި އެވެ. 

އިމިގްރޭޝަނުން ބުނި ގޮތުގައި އަތުލައިގަތް މީހުންނަކީ ވަގު ލިޔެކިޔުން ބޭނުންކޮށްގެން ރާއްޖެއަށް އެތެރެވުމަށް މަސައްކަތްކުރި މީހުންނެވެ. އޭގެ ތެރޭގައި އަސްލު ނޫން ޕާސްޕޯޓާއި، ވަގު އައިޑީއާއި ވަގު ރެޒިޓެންޓް ކާޑު އަދި ސައްހަ ނޫން ވޯކް ޕާމިޓުތައް ބޭނުންކޮށްގެން އެތެރެވާން އުޅުނު މީހުން ހިމެނެ އެވެ. 

ނިމުނު އަހަރުގެ ފަހު ކުއާޓާގައި ނޮވެންބަރު މަހުގެ 17 އިން ޑިސެންބަރުގެ ނިޔަލަށް ހަ މީހަކު ވަގު ލިޔެކިޔުން ބޭނުންކޮށްގެން ރާއްޖެއަށް އެތެރެވާން އުޅެނިކޮށް ހުއްޓުވާފައިވެ އެވެ. އޭގެ ތެރޭގައި ވަގު ޕާސްޕާޓު ބޭނުންކޮށްގެން އެތެރެވާން އުޅުނު 4 މީހަކާއި ވަގު ރެޒިޑެންސް ކާޑު ބޭނުންކުރި އެކަކު ހިމެނެ އެވެ. 

މި އަހަރުގެ ފުރަތަމަ ކުއާޓާގައި ޝަހުސު އޮޅުވާލައިގެން ރާއްޖެއަށް އެތެރެވާން އުޅުނު މީހަކާއި ވަގު އައިޑީއެއް ބޭނުންކުރި އެކަކާއި ވަގު ޕާސްޕޯޓު ބޭނުންކޮށްގެން އެތެރެވާން އުޅުނު ހަ މައްސަލައެއް އިމިގްރޭޝަނުގެ ސަމާލުކަމަށް އައިސްފައިވެ އެވެ. 

ދެވަަނަ ކުއާޓާގައި ސައްހަ ނޫން ޕާސްޕޯޓު ބޭނުންކޮށްގެން އެތެރެވާން އުޅުނު ސޯޅަ މީހަކާއި ޕާސްޕޯޓު ފޯޖުކުރުމުގެ އެއް މައްސަލަ އިމިގްރޭޝަނުގެ ސަމާލުކަމަށް އައެވެ. 

މިބާވަތުގެ އެންމެ ގިނަ މައްސަލަ ފެންމަތިވީ އަހަރުގެ ތިންވަނަ ކުއާޓާގަ އެވެ. އެ ކުއާޓާގައި ވަގު ޕާސްޕޯޓުގެ ފަސް މައްސަލައަކާއި ވަގު ބައޯޕޭޖުގެ ތިން މައްސަލައާއި ޝަހުސު އޮޅުވައިލުމުގެ ހަތަރު މައްސަލައާއި ފެންޓަސީ ޕާސްޕޯޓުގެ އެއް މައްސަލަ އަދި ވަގު އައިޑީގެ އެއް މއްސަލައާއި ވަގު ވިސާގެ ދެ މައްސަލައަކާއި، ވަގު ސްޓޭމްޕުގެ ހަަތަރު މައްސަލައެއް ފެންމަތިވި އެވެ. 

ރާއްޖޭގެ ބޯޑަރުން އޮޅުވާލައިގެން އެތެރެވާން އުޅޭ މީހުން ހުއްޓުވައި ބޯޑަރުގެ ސަލާމަތާއި ރައްކާތެރިކަން ކަށަވަރުކުރުމަށް އިމިގްރޭޝަނުން އަބަދުވެސް މަސައްކަތް ކުރެ އެވެ.