އިންޑިޔާގެ އަމާޒު؛ ތެލުގެ ޑިމާންޑު ނެތުމުގެ ކުރިން ތެޔޮ އުފެއްދުން އިތުރުކުރުން

އިންޑިޔާއިން މަސައްކަތްކުރަމުންދަނީ ތެޔޮ އުފައްދާ ބައިނަލްއަގުވާމީ ބޮޑެތި ކުންފުނިތައް އެ ގައުމަށް ގެނެސް އެއްގަމާއި އައްސޭރިން ބޭރުގައި ތެޔޮ އުފައްދާ މިންވަރު އިތުރުކުރުމަށް ކަމުގައި އެ ގައުމުގެ ތެލާއި ގޭހާ ބެހޭ ވަޒީރު ހަރްދީޕް ސިންހު ވިދާޅުވެއްޖެ އެވެ. 

އިންޑިއާގައި ބޭއްވި އެނާޖީ ޓްރާންޒިޝަލް ސަމިޓުގައި ފައިނޭންޝަލް ޓައިމްސްއާ ވާހަކަދައްކަވަމުން ސިންހު ވިދާޅުވީ ދުނިޔޭގެ އެންމެ ބޮޑެތި ތެޔޮ އުފައްދާ ކުންފުނިތަކާއެކު އެ ގައުމުން މިހާރު މަޝްވަރާތައް ފަށާފައިވާ ކަމަށެވެ. އެގޮތުން އެކްސޮންއާއި ބީޕީއާއި ބްރެޒިލްގެ ޕެޓްރޮބާސް އަދި ޝެވްރޯންއާއެކު މަޝްވަރާކުރައްވާފައިވާކަމަށް އޭނާ ވިދާޅުވި އެވެ. 

"އަޅުގަނޑު އެ ކުންފުނިތަކަށް ދެންނެވިން އައިސް އިންޑިޔާގެ އަންޑަމަން ކަނޑުގެ ސަރަހައްދުން ތެޔޮ ފެނޭތޯ ބަލާށޭ. އިންވެސްޓުމެންޓެއް ނުކުރިއަސް މައްސަލއެއް ނެތް. ތެޔޮ ހޯދާ ބަޔަކާއެކު އަޅުގަނޑުމެން ޕާޓްނާޝިޕް ހަދާނަން،" އޭނާ ވިދާޅުވި އެވެ. 

އޭނާ ވިދާޅުވި ގޮތުގައި އެކްސޮންއަށް ގަޔާނާއިން ހޯދުނު 11 ބިލިއަން ފީފާގެ ތެޔޮވަޅު ފަދަ އެތައް ތެޔޮވަޅެއް އިންޑިޔާގައި ނުހޯދި ހުންނާނެ އެވެ. އަދި ދުނިޔެ ތެޔޮ ނޫން އެހެން މަސްދަރުތަކުން ހަކަތަ އުފައްދަން ފެށުމުގެ ކުރިން އެ ތެޔޮ ހަޒާނާގެ ބޭނުންހިފުމަކީ އިންޑިޔާއަށް 

ސިންހު އިތުރަށް ވިދާޅުވީ އެ ތެޔޮ ވަޅުތަކުގެ ބޭނުންނުކުރެވި ހުއްޓައި ދުނިޔެ ހަކަތަ އުފައްދާ ގޮތާއި ބޭނުންކުރާ ގޮތް މުޅިން ބަދަލުވެއްޖެނަމަ އެއީ ގެއްލިގެންދާ ބޮޑު އިގުތިސާދީ ފުރުސަތެއް ކަމަށެވެ. އަދި ގަޔާނާއިން ފެނުނު ތެޔޮ ވަޅުގެ ބޭނުން އެގައުމަށް ކުރެވެން ފަށާއިރު، ދުނިޔެ އޮންނާނީ ހަކަތައިގެ އިންތިގާލު ނުވަތަ ބަދަލުގައި ވަރަށް ދުރު މަރުހަލާއަކަށް ވާސިލުވެފައިވާކަމަށް އޭނާ ވިދާޅުވި އެވެ. 

އިންޑިޔާގައި ތެޔޮ ހުރި މިންވަރާމެދު މާހިރުންގެ މެދުގައި ވަރަށް ބޮޑު ދެބަސްވުމެއް އެބައޮތެވެ. އެސްއްންޕީ ގްލޯބަލްއިން އަންދާޒާކުރާ ގޮތުގައި އިންޑިޔާގައި ނުހޯދި އަދި ބޭނުންނުކުރެވި ހުރި ތެލުގެ އަދަދު 22 ބިލިއަން ފީފާއަށް އަރާނެ އެވެ. ނަމަވެސް ހަކަތައިގެ ކޮންސަލްޓެންސީ ކުންފުނި ރައިސްޓަޑްއިން ދެކޭ ގޮތުގައި އެ އަދަދު އުޅޭނީ އަށް ބިލިއަން ފީފާއަށްވުރެ ދަށުގަ އެވެ. 

އަދި އިންޑިޔާއިން ތެޔޮވަޅުތަކެއް ފެނުނު ނަމަވެސް މިހާރު އެ ގައުމުން ތެޔޮ އުފައްދާ މިންވަރުކަމަށްވާ ދުވާލެއްގެ މައްޗަށް 700،000 ތެޔޮ ފީފާގެ އަދަދު އެއަށްވުރެ އިތުރުކުރެވިދާނެ ކަމާމެދު ދުނިޠޭގެ ހަކަތައިގެ އިދާރާ އައިއީއޭއިން ޝައްކު ކުރެ އެވެ. 

އެ އިދާރާއިން ދެކޭ ގޮތުގައި އިންޑިޔާގައި ބައިނަލްއަގުވާމީ ބޮޑެތި ތެޔޮ ކުންފުނިތަކުން ހަރަކާތްތެރިވާ މިންވަރު މަދީ ފާއިތުވި ދުވަސްތަކުގައި އިންޑިޔާއިން ތެޔޮ ފެނުނު މިންވަރު މަދުވުމުންނެވެ. ފާއިތުވި 23 އަހަރު އިންޑިޔާއިން ހޯދިފައިވަނީ އެންމެ 2 ބިލިއަން ފީފާގެ ތެލެވެ. އެ މުއްދަތުގައި އެންގޯލާއާއި ނޯވޭއާއި ގަޔާނާއިންވަނީ ކޮންމެ ގައުމަކުން 10 ބިލިއަން ފީފާ ތެޔޮ ހޯދާފަ އެވެ. 

ސިންހު ވިދާޅުވި ގޮތުގައި އިންޑިޔާގެ އަމާޒަކީ އިތުރު ތެޔޮ ވަޅުތަކުން ތެޔޮ ނަގައި އިންޑިޔާއިން ތެޔޮ އިމްޕޯޓުކުރާ މިންވަރު މަދުކުރުމެވެ. އެކަން ނުކުރެވި އޮތީ ކުރީ ސަރުކާރުތަކުގައި ތެޔޮ އުފައްދާ މިންވަރު އިތުރުކުރަން މަސައްކަތްތައް ނުކުރާތީ ކަމށް އޭނާ ވިދާޅުވި އެވެ.