ހަތަރު އަހަރުން ސަބްސިޑީ ހަރަދަށް 10 ބިލިއަން؛ އެންމެ ބޮޑީ ތެލުގެ ސަބްސިޑީ

ފާއިތުވެގެން ދިޔަ ތިން އަހަރާއި މި އަހަރުގެ މިހާތަނަށް ސަބްސިޑީއަށް ޖުމްލަ 10.3 ބިލިއަން ރުފިޔާ ހަރަދުވެފައިވާއިރު އެންމެ ބޮޑު ހަރަދެއް ހިނގާފައިވަނީ ތެލުގެ ސަބްސިޑީއަށްކަން ފިނޭންސް މިނިސްޓްރީގެ ހިސާބުތަކުން ހާމަވެއްޖެ އެވެ. 

"މިރާ"އިން އެދިގެން ހޯދި ހިސާބުތަކަށް ބަލާއިރު 2021 ވަނަ އަހަރުން ފެށިގެން ސަބްސިޑީގެ ހަރަދުތައް ވަރަށް ބޮޑަށް އިތުރުވެފައިވެ އެވެ. 2021 ވަނަ އަހަރު 1.4 ބިލިއަން ރުފިޔާ ސަބްސިޑީއަށް ހޭދަކުރިއިރު އޭގެ ފަހުން ކޮންމެ އަހަރަކުވެސް ސަބްސިޑީއަށް ކުރާ ހަރަދު ތިން ބިލިއަނުން މައްޗަށް އަރަ އެވެ. 

އެގޮތުން 2022 ވަނަ އަހަރު 3.4 ބިލިއަން ރުފިޔާ އަދި 2023 ގައި 3.06 ބިލިއަން ރުފިޔާ ސަބްސިޑީތަކަށް ހަރަދުވި އެވެ. މި އަހަރުގެ މިހާތަނށް ސަބްސިޑީތަކަށް ހަރަދުވެފައިވަނީ 2.3 ބިލިއަން ރުފިޔާ އެވެ. އެހެންކަމުން މުޅި ޖުމްލަ 10.3 ބިލިއަން ރުފިޔާ ފާއިތުވި މުއްދަތުގައި ސަބްސިޑީތަކަށް ހަރަދުވެފައިވެ އެވެ. 

އެ މުއްދަތުގައި ސަބްސިޑީއަށް ހިނގާފައިވާ ހަރަދުގެ ދެބައިކުޅަ އެއްބައަށްވުރެ އިތުރު މިންވަރެއް ހަރަދުވެފައިވަނީ ތެލުގެ ސަބްސިޑީއަށެވެ. އެގޮތުން އެ މުއްދަތުގައި ތެލުގެ ސަބްސިޑީއަށް 5.9 ބިލިއަން ރުފިޔާ ހަރަދުވެފައިވާކަން ތަފާސްހިސާބުތަކުން ދައްކަ އެވެ. 

2021 ވަނަ އަހަރު ތެލުގެ ސަބްސިޑީއަށް 460 މިލިއަން ރުފިޔާ ހަރަދުވިއިރު، 2022 ގައ އެ އަދަދު 2.3 ބިލިއަނަށް އެރި އެވެ. އަދި ޖެހިގެންއައި 2023 ގައި އެ އަދަދު 1.6 ބިލިއަނަށް އެރި އެވެ. މި އަހަރުގެ މިހާތަނަށް 1.5 ބިލިއަން ރުފިޔާ ތެލުގެ ސަބްސިޑީއަށް ހަރަދުވެފައިވެ އެވެ. 

އޭގެ އިތުރަށް ކަރަންޓު ސަބްސިޑީއަށް ކުރާ ހަރަދުވެސް އަހަރުން އަހަރަށް އިތުރުވެފައިވެ އެވެ. އެގޮތުން 2021 ގައި 735 މިލިއަން ރުފިޔާ ކަރަންޓު ސަބްސިޑީއަށް ހަރަދުވިއިރު ޖެހިގެން އައި 2022 ގައި އެ އަދަދު 855.8 މިލިއަން ރުފިޔާއަށް އިތުރުވި އެވެ. އަދި 2023 ގައި އެ އަދަދު 1.1 ބިލިއަން ރުފިޔާއަށް އިތުރުވި އެވެ. މި އަހަރުގެ މިހާތަނަށް ކަރަންޓު ސަބްސިޑީއަށް 593 މިލިއަން ރުފިޔާ ހަރަދުވެފައިވެ އެވެ. 

ރާއްޖޭގައި ސަަބްސިޑީ ދެމުންދަނީ އިންޑައިރެކްޓް ސަބްސިޑީގެ އުސޫލުން މުދަލާއި ހިދުމަތް ފޯރުކޮށްދޭ ކުންފުނިތަކަށް ސަބްސިޑީގެ ގޮތުގައި ފައިސާ ދީގެންނެވެ. ނަތީޖާއެއްގެ ގޮތުން ސަބްސިޑީ ހައްގުނޫން އެތައް ބަޔަކަށްވެސް ސަބްސިޑީ އަންނަނީ ލިބެމުންނެވެ. އަދި އެކަމުގެ ސަބަބުން ސަބްސިޑީއަށް ކުރަންޖެހޭ ހަރަދުތައް އިންތިހާއަށް ބޮޑުވަމުންދެ އެވެ. 

2021 ވަނަ އަހަރުން ފެށިގެން 2023 ވަނަ އަހަރުގެ ނިޔަލަށް ސަބްސިޑީ ހަރަދުތައްވަނީ 113 އިންސައްތައިން އިތުރުވެފަ އެވެ. ސަބްސިޑީ ހަރަދުތައް ކުޑަކުރުމަށް މިހާރު އޮތް އިންޑައިރެކްޓް ސަބްސިޑީ ނިޒާމު ޓާގެޓް ސަބްސިޑީ ނިޒާމަކަށް ބަދަލުކުރުމަށް ބައިނަލްއަގުވާމީ މާލީ އިދާރާތަކުން އަންނީ ރާއްޖެއަށް ލަފާދެމުންނެވެ.