އިންޑިއާގެ މަހަރާޝްތްރާގެ ގަވަރުނަރާ ރައީސް ބައްދަލުކުރައްވައިފި

އިންޑިއާގެ މަހަރާޝްތްރާގެ ގަވަރުނަރު ސީޕީ ރާދަކްރިޝްނަން، ރައީސް ޑރ. މުހައްމަދު މުއިއްޒުގެ އަރިހަށް އިހުތިރާމުގެ ޒިޔާރަތެއް ކުރައްވައިފި އެވެ.

ގަވަރުނަރު ރާދަކްރިޝްނަން، ރައީސްގެ އަރިހަށް ވަޑައިގެންނެވީ އެމަނިކުފާނު އިއްޔެ އިންޑިއާގެ މުމްބާއީއަށް ވަޑައިގެންނެވުމުންނެވެ. މި ބައްދަލުވުމުގައި ރައީސްގެ ވާހަކަފުޅުގައި މުމްބާއީގެ ރައްޔިތުންނާއި ގަވަރުނަރު ރާދަކްރިޝްނަން، އެމަނިކުފާނުގެ ދެކަނބަލުންނާއި ދިވެހި ވަފުދަށް ވިދާޅުވި ހޫނު މަރުޙަބާ އާއި ދެއްވި ދީލަތި މެހުމާންދާރީއަށް ޝުކުރުއަދާކުރެއްވި އެވެ. 

އަންނަ އަހަރަކީ އިންޑިއާ އާއި ރާއްޖެއާ ދެމެދު ހާރިޖީ ގުޅުން ގާއިމުކުރިތާ 60 އަހަރު ފުރޭ މުނާސަބާކަން ފާހަގަކުރައްވަމުން، އިންޑިއާ އާއި ރާއްޖޭގެ ބަދަހިގުޅުމުގެ އަގު ވަޒަންކުރައްވާކަމުގައި އެމަނިކުފާނު ވިދާޅުވި އެވެ.

އިންޑިއާ އާއި ރާއްޖެއާ ދެމެދު، ވިޔަފާރި އާއި ފަތުރުވެރިކަމުގެ ދާއިރާއިން ދެ ގައުމުގެ ދެމެދުގައި އޮންނަ ބަދަހި ގުޅުމާ ބެހޭގޮތުން ގަވަރުނަރު ރާދަކްރިޝްނަން ވަނީ ވާހަކަ ދައްކަވާފަ އެވެ. އަދި މި ދާއިރާތަކާއި އިތުރު ދައިރާތަކުން ދިވެހި ރައްޔިތުންނާއި މަހަރާޝްތްރާގެ ރައްޔިތުންނާ ދެމެދު ގުޅުން ބަދަހިކުރުމުގެ މުހިއްމުކަން ފާހަގަކުރެއްވި އެވެ.