އެމްޑީއޭއަށް ނިސްބަތްވާ ސިޔާސީ މުވައްޒަފުންތަކެއް ވަކިކުރިތާ ދެ ގަޑިއިރު ފަހުން ވަޒީފާ ދީފި

ސަރުކާރު ކޯލިޝަންގައި ހިމެނޭ މޯލްޑިވްސް ޑިމޮކްރެޓިކް އެލައިންސްގެ 19 މީހަކު މަގާމުން ވަކިކުރުމަށްފަހު ދެ ގަޑިއިރު ތެރޭ ކުރިންވެސް ތިބި މަގާމުތަކަށް އައްޔަންކޮށްފި އެވެ. 

މީގެ ދެ ހަފުތާއެއްހައި ދުވަސް ކުރިން އެމްޑީއޭއަށް ނިސްބަތްވާ 19 ބޭފުޅަކަށް އެ ބޭފުޅުން ތިއްބެވި މަގާމުތަކުން ވަކިކުރުކަން އަންގަވައި ރައީސުލްޖުމްހޫރިއްޔާގެ އޮފީހުން ސިޓީއެއް ފޮނުއްވި އެވެ. ވަކިކުރެއްވި ބޭފުޅުންގެ ތެރޭގައި އެޕާޓީގެ ނައިބުރައީސް އަދި ވެލިދޫ ދާއިރާގެ މެންބަރު މުހައްމަދު އައްބާސްގެ ދަރިކަލުން، ޓޫރިޒަމް މިނިސްޓްރީގެ ޑެޕިއުޓީ މިނިސްޓަރުގެ މަގާމުގައި ހުންނެވި މުހައްމަދު މާއިޝް ހިމެނެ އެވެ. 

"މިރާ"އަށް މައުލޫމާތު ދެއްވަމުން އެ ޕާޓީގެ އިސްވެރިޔަކު ވިދާޅުވީ ހުރިހާ ބޭފުޅުން ވަކިކުރިކަން އެންގެވުމަށްފަހު އެ ސިޓީ ފޮނުވިތާ ދެ ގަޑިއިރުވެސް ނުވަނީސް އަލުން މަގާމަށް އައްޔަންކުރިކަން އެބޭފުޅުންގެ ތެރެއިން ދެ ބޭފުޅަކު ފިޔަވައި ހުރިހާ ބޭފުޅުންނަށް ރައީސް އޮފީހުން އަންގާފައިވާ ކަމަށެވެ. 

މަގާމުތަކުން ވަކިކުރި ބޭފުޅުންގެ ތެރޭގައި ސްޓޭޓު މިނިސްޓަރު، ނައިބު މިނިސްޓަރު އަދި ސީނިއާ ޕޮލިޓިކަލް ޑިރެކްޓަަރުންނާއި ޕޮލިޓިކަލް ޑިރެކްޓަރުން ފެންވަރުގައި މަގާމުތައް އަދާކުރައްވަމުން ގެންދެވި ބޭފުޅުން ހިމެނިވަޑައިގަންނަވަ އެވެ. އެ ބޭފުޅުން ވަކިކުރި ސަބަބެއް އަންގާފައިނުވާކަމަށް އެ ޕާޓީން ބުނެ އެވެ. 

ވަކިކުރި 19 ބޭފުޅުންގެ ތެރެއިން 16 ބޭފުޅަކަށް އަނބުރާ މަގާމު ހުށަހެޅުއްވި ނަމަވެސް މަގާމާ އަލުން ހަވާލުވެވަޑައިގެންފައިވަނީ 15 ބޭފުޅުންނެވެ. މާއިޝްވަނީ އަލުން މަގާމު ހުށަހެޅުމުން ގަބޫލުނުކުރައްވަން ނިންމަވާފަ އެވެ. 

މި ނޫހަށް މައުލޫމާތު ދެއްވި އެމްޑީއޭގެ ބޭފުޅާ ވިދާޅުވީ އެ ޕާޓީއާއި ޕީއެންސީއާ ދެމެދުގައި އެއްވެސް މައްސަލައެއް އުފެދިފައި ނެތް ކަމަށެވެ. 

ސަރުކާރުންވަނީ ހަރަދުތައް ކުޑަކުރުމުގެ ގޮތުން ސިޔާސީ މުވައްޒަފުންގެ އަދަދުތައް މަދުކުރުމަށް މަސައްކަތްކުރާނެކަން އިއުލާނުކޮށްފަ އެވެ. ނަމަވެސް ސިޔާސީ މުވައްޒަފުން ތިބި އަދަދެއް މިހާތަނަށް ހާމަނުކުރާތީ މަދުވި އަދަދަކީ ކޮބައިކަމެއްވެސް ނޭނގެ އެވެ.