ސުކޫކު ޕޭމެންޓާއެކު ރިޒާވް ދަށަށް | ކަރަންސީ ސްވޮޕާއެކު ރަނގަޅުވާނެ

ދިވެހިރާއްޖެއިން 2021 ވަނަ އަހަރު ވިއްކި ސުކޫކުގެ ކޫޕަން ޕޭމެންޓުގެ ގޮތުގައި ދައްކަންޖެހޭ 50 މިލިއަން ޑޮލަރުގެ ތެރެއިން 25 މިލިއަން ޑޮލަރު ދެއްކުމާއެކު ދައުލަތުގެ ބޭރު ފައިސާގެ ރަސްމީ ރިޒާވް ވަރަށް ބޮޑަށް ދަށްވެއްޖެ އެވެ. 

އެމްއެމްއޭއިން އާންމުކޮށްފައިވާ ހިސާބުތައް ދައްކާ ގޮތުން ޖުމްލަ ރިޒާވްގައި ސެޕްޓެންބަރުގެ ނިޔަލަށް ހުރީ 371.2 މިލިއަން ޑޮލަރެވެ. އެއިން ބޭނުންކުރެވޭ ގޮތަށް ހުރި ފައިސާގެ އަދަދަކީ 48.8 މިލިއަން ޑޮލަރެވެ. އޯގަސްޓުގެ މަހުގެ ނިޔަލަށް ޖުމްލަ ރިޒާވްގައި 443.9 މިލިއަން ޑޮލަރު އަދި ބޭނުންކުރެވޭ ރިޒާވްގައި 61.5 މިލިއަން ޑޮލަރު ހުއްޓެވެ. 

ރިޒާވްގެ ހާލަތު ދަށްވެފައިވާއިރު ރިޒާވް ރަނގަޅުކުރުމަށް އިންޑިޔާގެ ރިޒާވް ބޭންކް އޮފް އިންޑިޔާއާއި އެމްއެމްއޭގެ މެދުގައި 400 މިލިއަން ޑޮލަރު އަދި 30 ބިލިއަން އިންޑިޔާ ރުޕީސްގެ ކަރަންސީ ސްވޮޕް އެއްބަސްވުމެއްގައި ސޮއިކޮށްފައިވެ އެވެ. 

އެ އެއްބަސްވުމުގެ ދަށުން ރިޒާވްއިން ފައިސާ ނަގައިގެން ހިންގަންޖެހޭ ބައެއް ކަންކަން ކުރުމަށް ފައިސާ ލިބޭނެ އެވެ. ޑޮލަރުގެ ކަރަންސީ ސްވޮޕުގެ ސަބަބުން އެމްއެމްއޭއިން ބޭންކުތަކަށް ބޭރު ފައިސާ ދޫކުރުމަށް ފުރުސަތު ފަހިވާނެ އެވެ. އަދި ރުޕީސްގެ ކަރަންސީ ސްވޮޕުގެ ސަބަބުން އިންޑިޔާއާއެކު ވިޔަފާރިކުރާ ފަރާތްތަކަށް ޑޮލަރު ބޭނުންނުކޮށް އެ ގައުމުގެ ފައިސާއިން މުއާމަލާތްތައް ހިންގުމަށް މަގުފަހިވާނެ އެވެ. 

އެމްއެމްއޭއިން ހާމަކޮށްފައިވާ ހިސާބުތަކަށް ބަލާއިރު މި އަހަރުގެ މިހާތަނަށް އިންޑިޔާއިން 300 މިލިއަނެއްހައި ޑޮލަރުގެ މުދާ ރާއްޖެއަށް އެތެރެކޮށްފައިވެ އެވެ. 30 ބިލިއަން ރުފީސްއަކީ މިވަގުތު ރުޕީސްގެ އަގުހުރި މިންވަރަށް ބަލާއިރު ގާތްގަނޑަކަށް 360 މިލިއަން ޑޮލަރެވެ. 

ކަރަންސީ ސްވޮޕާއެކު ރިޒާވްގެ ހާލަތު ރަނގަޅުވާން ފަށާއިރު، ބޭންކުތަކަށް ޑޮލަރު ލިބޭނެ މަގުފަހިކުރުމަށް އެމްއެމްއޭއިންވަނީ ޓޫރިޒަމް ސިނާއަތަށް ޑޮލަރުން ލިބޭ އާމްދަނީގެ ވަކި އިންސައްތައެއް ބޭންކުތަކަަށް މާރުކުރުން ލާޒިމުކޮށްފަ އެވެ. އެ ފައިސާގެ ތެރެއިން 60 އިންސައްތަ އެމްއެމްއޭއަށް ލިބުމުން އެކަމުގެ ސަބަބުންވެސް ރިޒާވްގެ ހާލަތު ރަނގަޅުވާނެކަމަށް މާހިރުން ލަފާކުރައްވަ އެވެ.