އިންޑިޔާ-ދިވެހި ވިޔަފާރީގެ ސަމިޓު | އިންވެސްޓަރުންނަށް ފަހި މާހައުލެއްގެ ޔަގީންކަން

އިންޑިޔާގެ ވިޔަފާރިވެރިންނަށް ހާއްސަ ސަމިޓެއް އެ ގައުމުގައި މިއަދު ބާއްވައިފި އެވެ. 

މި ސަމިޓަކީ މިހާރު އިންޑިޔާއަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން ބޭއްވި ސަމިޓެކެވެ. އެ ސަމިޓުގައި ރައީސްގެ އިތުރަށް އިކޮނޮމިކް މިނިސްޓަރު މުހައްމަދު ސައީދުވެސް ވާހަކަދައްކަވާފައިވެ އެވެ.

ރާއްޖޭގައި އިންވެސްޓުކުރުމަށް ހުރި ފުރުސަތުތަކާ ގުޅޭ ޕްރެޒެންޓޭޝަނެއް އެ ސަމިޓުގެ ބައިވެރިންނަށް ހުށަހަޅާފައިވެ އެވެ. އަދި އެ ސަމިޓުގައި ރާއްޖޭގެ ވިޔަފާރީގެ މާހައުލަށް ގެންނަަމުންދާ ހެޔޮ ބަދަލުތަކުގެ މައުލޫމާތުވެސް ހިއްސާކޮށްފައިވެ އެވެ. 

އެ ސަމިޓުގައި ދެއްކެވި ވާހަކަފުޅުގައި މިނިސްޓަރު ސައީދު ވިދާޅުވެފައިވަނީ ރައީސްގެ ދަތުރުފުޅުގެ ތެރެއިން ގާއިމުކުރެވުނު ކަރަންސީ ސްވޮޕް ފެސިލިޓީއާއެކު އިންޑިޔާއާއި ދިވެހިރާއްޖޭގެ މެދުގައި ދެ ގައުމުގެ ފައިސާއިން ވިޔަފާރިކުރެވޭނެ މަގުފަހިވުމުން ދެ ގައުމުގެ ވިޔަފާރީގެ ގުޅުން އިތުރަށް ހަރުދަނާކުރެވި ފުޅާވެގެންދާނެ ކަމަށެވެ. 

އަދި ރައީސް މުއިއްޒު ވެރިކަމާ ހަވާލުވެވަޑައިގެން ފާއިތުވި 10 މަސްދުވަހު ދިވެހިރާއްޖޭގެ އިގުތިސާދު ސިންދަފާތުކުރައްވައި އެކި އައު ސިނާއަތްތައް ތައާރަފުކުރައްވައި އުފެއްދުންތެރި ބާރުވެރިކުރެއްވުމަށް ހާއްސަ ފިޔަވަޅުތަކެއް އަޅުއްވަމުން ގެންދަވާކަން ފާހަގަކުރައްވަމުން ސައީދު ވިދާޅުވީ އެ ފިޔަވަޅުތަކުގެ ހެޔޮ އަސަރުތައް ދިވެހި އިގުތިސާދުން މިހާރުވެސް ފެންނަމުންދާ ކަމަށެވެ. 

ރައީސްގެ ތަސައްވުރަކީ ރާއްޖޭގެ މެރިޓައިމް ހިދުމަތުގެ ދާއިރާއާއި، މާލީ ދާއިރާގެ އިތުރަށް ޑިޖިޓަލް އިގުތިސާދު ފުޅާކުރެއްވުންކަމަށް ސައީދު ވިދާޅުވި އެވެ. މި ހުުރިހާ ދާއިރާއަކުން ރާއްޖެ އޮތީ ބޭރުގެ އިންވެސްޓުމެންޓުތަކަށް ވަރަށް ފަހިކޮށް ކަމަށާއި، އިންވެސްޓަރުންނަށް ރައްކާތެރި މާހައުލެއް ރާއްޖޭގައި އެބައޮތްކަމަށް މިނިސްޓަރު ވިދާޅުވި އެވެ. 

ރައީސް ވެރިކަމާ ހަވާލުވެވަޑައިގެންނެވި ފަހުން ފާއިތުވި ކުޑަ މުއްދަތުގެ ތެރޭގައި ރާއްޖޭގައި މުޅިން އައު އިންވެސްޓުމެންޓު ގާނޫނަކަށް އަމަލުކުރަން ފަށައި، މާލީ ނިޒާމަށް އިސްލާހީ ބަދަލުތަކެއް ގެންނަވަން ފައްޓަވާފައިވާކަމަށާއި، އެ ބަދަލުތަކުގެ ތެރެއިން ފިކުރީ މުދަލަށްވެސް މިހާރު ރައްކާތެރިކަން ލިބޭނެކަމަށް ސައީދު ވިދާޅުވި އެވެ.