"ރައީސްގެ ދަތުރުފުޅަކީ ރާއްޖެ-އިންޑިއާގެ ގުޅުން ވަރުގަދަވުމަށް ލިބޭ ފުރުސަތެއް"
ޖުމްހޫރީ ޕާޓީގެ ލީޑަރުގެ ހައިސިއްޔަތުން ގާސިމް، ރައީސްގެ އަރިހުން އެދިވަޑައިގެންފައި ވަނީ އިންޑިއާއާއެކު ގުޅުން ބަދަހިކުރަން ކުރެއްވެން ހުރި ހުރިހާ ކަމެއް ކުރެއްވުމަށެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިހާރު އިންޑިއާއަށް ކުރައްވަމުން ގެންދަވާ ރަސްމީ ދަތުރުފުޅަކީ ދެ ގައުމުގެ ދެމެދުގައި އޮތް ގުޅުން ވަރުގަދަ ކުރުމަށް ލިބުނު ފުރުސަތެއް ކަމަށް ޖުމްހޫރީ ޕާޓީގެ ލީޑަރު އަދި ރައްޔިތުންގެ މަޖިލީހުގެ މާމިނގިލި ދާއިރާގެ މެންބަރު ގާސިމް އިބްރާހިމް ވިދާޅުވެއްޖެ އެވެ.
ރައީސް އިންޑިއާއަށް ކުރައްވަމުން ގެންދަވާ ދަތުރުފުޅުގެ ބައެއް ފޮޓޯތައް އެކްސްގައި އާންމު ކުރައްވައި ގާސިމް މިއަދު ވިދާޅުވީ ރައީސްގެ މިދަތުރުފުޅުގައި އެގައުމުގެ ބޮޑުވަޒީރު ނަރެންދްރަ މޯދީއާ ބައްދަލުކުރެއްވުމާއެކު ރާއްޖެ އާއި އިންޑިއާއާ ދެމެދު އޮތް ޒަމާންވީ ގުޅުން އިތުރަށް ބަދަހިކުރެވިގެންދާނެ ފުރުސަތު ލިބޭނެ ކަމަށެވެ.
މިދަތުރުފުޅާއެކު ކުރިއަށް އޮތީ އުފާވެރި ދުވަސްތަކެއްކަން ފާހަގަކުރައްވަމުން ގާސިމް ވިދާޅުވީ މިއީ އުންމީދީ ދަތުރުފުޅެއް ކަމަށެވެ.
ޖުމްހޫރީ ޕާޓީގެ ލީޑަރުގެ ހައިސިއްޔަތުން ގާސިމް، ރައީސްގެ އަރިހުން އެދިވަޑައިގެންފައި ވަނީ އިންޑިއާއާއެކު ގުޅުން ބަދަހިކުރަން ކުރެއްވެން ހުރި ހުރިހާ ކަމެއް ކުރެއްވުމަށެވެ. އަދި އިންޑިއާ ކަނޑުގެ ސަލާމަތާއި ރައްކާތެރިކަމާއި، އިޖުތިމާއީ އަދި އިގްތިސޯދީ ތަރައްގީ އެހެން ހަރުފަތަކަށް ގެންދިއުމަށް އިންޑިއާއާ ރާއްޖެއާ ދެމެދު ގުޅުން ވަރުގަދަކޮށް ބޭއްވުން މުހިންމު ކަމަށް ވެސް ވިދާޅުވި އެވެ.
ރައީސްގެ މި ދަތުރުފުޅަށް ގާސިމް ހިތްވަރު ދެއްވާފައިވާއިރު، ކުރީގެ ރައީސް މުހައްމަދު ނަޝީދު ވެސް ވަނީ މިއީ އުފާވެރި ދަތުރެއް ކަމަށް ވިދާޅުވެފަ އެވެ. އެމަނިކުފާނު ވިދާޅުވީ ދެ ގައުމުގެ މެދުގައި އުފެދިފައި އޮތް ދެބަސްވުން ނެތި ކުރީން އޮތް ގުޅުން އިއާދަވަމުންދާތީ އެކަމާއި އުފާ ކުރައްވާ ކަމަށެވެ.
ކޮމެންޓް
Republic of Maldives