އެއްވެސް ވަކި ގައުމަކަށް ރާއްޖެ ބަރޯސާވުން ކުޑަކުރުމަކީ މުހިއްމު ކަމެއް: ރައީސް

އެއްވެސް ވަކި ގައުމަކަށް ރާއްޖެ ބަރޯސާވުން ކުޑަކޮށް، ރާއްޖޭގެ ބައިނަލްއަގުވާމީ ގުޅުންތައް ސިންދަފާތުކުރުމަކީ ރާއްޖެއަށް މުހިއްމު ކަމެއް ކަމުގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެ އެވެ. 

އިންޑިޔާގެ ރައީސްގެ ރަސްމީ ދައުވަތަކަށް އެ ގައުމަށް މިހާރު ކުރައްވަމުން ގެންދަވާ ފުރަމާނަ ދަތުރުފުޅުގެ ތެރެއިން "ޓައިމްސް އޮފް އިންޑިޔާ"އަށް ދެއްވި ބަސްދީގަތުމެއްގައި އެނޫހުންވަނީ އިންޑިޔާއާ ރާއްޖެ ޖިއޮގްރަފީގެ ގޮތުން އޮތް ގާތްކަމުގެ ސަބަބުން އިންޑިޔާގެ މައްޗަށް ރާއްޖެ ބަރޯސާވާ މިންވަރު ކުޑަކުރުމަކީ މުހިއްމު ކަމެއްގެ ގޮތުގައި ދެކެވަޑައިގަންނަވަންތޯ ސުވާލުކޮށްފަ އެވެ. 

އެ ސުވާލަށް ޖަވާބު ދެއްވަމުން ރައީސް ވިދާޅުވީ ދިވެހިރާއްޖެއިން އަބަދުވެސް ރާއްޖެއާއި އިންޑިޔާގެ ގުޅުމުގެ އަގުވަޒަަންކުރާ ކަމަށެވެ. އަދި ރާއްޖެއާއި އިންޑިޔާގެ މެދުގައި އޮތް ޖިއޮގްރޮފީގެ ގާތްކަމާއި ތާރީހީ ގުޅުންތަކުގެ މުހިއްމުކަން ރާއްޖެއިން ބަލައިގަނެ ގަބޫލުކުރާ ކަމަށެވެ. 

އަދި މިފަހުން ރާއްޖެއާއި އިންޑިޔާ ގުޅުމުގެ މިސްރާބަށް އައިސްފައިވާ ބަދަލަކީ ހެޔޮ ބަދަލެއްގެ ގޮތުގައި ސިފަކުރައްވައި އެމަނިކުފާނު ވިދާޅުވީ އެއްބާރުލުމުގެ މައްޗަށް ބިނާވެފައިވާ ދެ ގައުމަށްވެސް ފައިދާވާ ގުޅުމެއް ބިނާކުރުމަށް ތައްޔާރަށް ކަމުގައި ރައީސް ވިދާޅުވި އެވެ. 

އިތުރަށް އެމަނިކުފާނު ފާހަގަކުރެއްވީ ރާއްޖެއިން ތަފާތު ގައުމުތަކާއެކު ގުޅުން ބަދަހިކޮށް އެއްވެސް އެއް ގައުމަކަށް ބަރޯސާވާ މިންވަރު ކުޑަކުރުމަކީ ދިވެހިރާއްޖޭގެ މުސްތަގުބަލަށް މުހިއްމު ކަމެއް ކަމުގަ އެވެ. ނަމަވެސް އިންޑިޔާއާއެކު އޮތް ގުޅުން އިތުރަށް ބަދަހިކުރުމަކީ ރާއްޖެއިން އިސްކަންދޭ ކަމެއް ކަމުގައި ފާހަގަކުރެއްވި އެވެ. 

"ރާއްޖޭގެ ބައިނަލްއަގުވާމީ ގުޅުންތައް ސިންދަފާތުކޮށް، އެއްވެސް އެއް ގައުމަކަށް ބަރޯސާވުން ކުޑަކުރުމަކީ ދިވެހިރާއްޖެއަށް ކޮންމެހެން ބޭނުންތެރިކަމެއް ކަމުގައުވީ ނަމަވެސް، އިންޑިޔާއާއެކު ހަރުދަނާ އަދި އިސްތިރާޖީ ގުޅުމެއް ބޭއްވުމުގެ އަޒުމް އަޅުގަނޑުމެންގެ އެބައޮތް.،" ރައީސް ވިދާޅުވި އެވެ. 

އިންޑިޔާއާއެކު އެފަދަ ގުޅުމެއް ބޭއްވުމުގެ ބޭނުމަކީ ސަރުކާރުގެ ސިޔާސަތުތަކަކީ ދިވެހި ރައްޔިތުންގެ އެންމެ މަސްލަހަތުތައް ހާސިލުކޮށްދީ، ސަރަހައްދީ ހަމަޖެހުމުގައި ރާއްޖެއަށް ހިއްސާވަނިވި ސިޔާސަތުތަކަކަށް ހެދުންކަން ރައީސް ފާހަގަކުރެއްވި އެވެ. 

އެމަނިކުފާނުގެ ސިޔާސަތަކީ "ފުރަތަމަ ދިވެހިރާއްޖެ" ސިޔާސަތުކަމާއި، އެމަނިކުފާނަށް އެންމެ އިސްވާނީ އަބަދުވެސް ދިވެހިރާއްޖެކަން ފާހަގަކުރައްވަމުން ރައީސް ވިދާޅުވީ އަވައްޓެރިންނާއި އެކުވެރިންނަށް އިހުތިރާމު ކުރުމަކީ ދިވެހިންގެ ޑީއެންއޭގައި އަށަގަނެފައިވާ ކަމެއް ކަމަށެވެ. 

"އިންޑިޔާ މީހުންނަށް ރާއްޖެއިން އަބަދުވެސް މަރުހަބާ ކިޔާނެ. ރާއްޖޭގައި އިންޑިޔާ މީހުންދަނީ ތަނަވަސްކަން ހޯދައި އުފަލާއި ރައްކާތެރިކަމުގައި ދިރިއުޅެމުން. އަދި ދިވެހި މުޖުތަމައަށް އިންޑިޔާ މީހުން އަންނަނީ ފަހި ގޮތެއްގައި ހިއްސާވަމުން. އިންޑިޔާ ފަތުރުވެރިންނަށް ރާއްޖެއިން މަރުހަބާ ކިޔާނެ،" ރައީސް ވިދާޅުވި އެވެ. 

އިންޑިޔާ ރާއްޖެ ގުޅުމުގެ އެންމެ މުހިއްމު ސިފައަކީ ދެ ގައުމުގެ ރައްޔިތުންގެ މެދުގައި އޮތް ގުޅުންކަން ފާހަގަކުރައްވައި ރައީސް ވިދާޅުވީ މުސްތަގުބަލުގައިވެސް އެ ގުޅުން އިތުރަށް ބަދަހިކުރެއްވުމަށް މަސައްކަތް ކުރައްވާނެ ކަމަށެވެ.