ރާއްޖެއިން އެހެން ގައުމަކާ ބާއްވާ ގުޅުމަކުން އިންޑިޔާގެ ސަލާމަތީ މަސްލަހަތަކަށް ބުރޫނާރާނެ: ރައީސް

ރާއްޖެއިން އެހެން ގައުމަކާ ބާއްވާ ގުޅުމެއްގެ ސަބަބުން އިންޑިޔާގެ ސަލާމަތީ މަސްލަހަތަކަށް ބުރޫއެރިޔަަ ނުދެއްވާނެ ކަމުގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެ އެވެ. 

ރައީސް މިފަދައިން ވިދާޅުވީ އިންޑިޔާގެ ރައީސްގެ ރަސްމީ ދައުވަތަކަށް އެ ގައުމަށް ކުރައްވަމުންގެންދަވާ ފުރަމާނަ ދަތުރުފުޅުގައި "ޓައިމްސް އޮފް އިންޑިޔާ" ނޫހަށް ދެއްވި ބަސްދީގަތުމެއްގައި، ދެ ގައުމުގެ ގުޅުމަށް އަލިއަޅުއްވައިލައްވާ ދެއްކެވި ވާހަކަފުޅުގަ އެވެ. 

އިންޑިޔާއަކީ ރާއްޖެއަށް ނުހަނު އަގުހުރި އެކުވެރިއެއް އަދި ބައިވެރިއެއްކަން ފާހަގަކުރައްވަމުން ރައީސް ވިދާޅުވީ އިންޑިޔާ ރާއްޖެ ގުޅުމުގެ އަސާސަކީ ދެ ގައުމުގެ މެދުގައި އޮތް އިހުތިރާމާ ހިއްސާކުރާ މަސްލަހަތުތައް ކަމަށެވެ. އަދި އިންޑިޔާއާއެކު އިސްތިރާޖީ އަދި ވަރުގަދަ ގުޅުމެއް ބޭއްވެވުމަށް އިސްކަންދެއްވާނެ ކަމުގައިވެސް ވިދާޅުވި އެވެ. އަދި ދުނިޔޭގެ ސުލްހަވެރިކަން ކަށަވަރުކުރެއްވުމަށް އެ ގައުމާ ގުޅިގެން މަސައްކަތްކުރައްވާނެ ކަމުގައި ވިދާޅުވި އެވެ. 

އިންޑިޔާއާއެކު ކުރިން ހަދާފައިވާ އެއްބަސްވުންތައް މުރާޖައާކުރެއްވީ ރާއްޖޭގައި އިސްކަންދޭ ކަންކަމަށް ރިއާޔަތްކުރައްވައިގެން ކަމަށާއި، އެއީ ސަރަހައްދީ ހަމަޖެހުމުގައި ފަހި ގޮތަކަށް ރާއްޖެއިން ހިއްސާވުމަށް ގެންނަންޖެހޭ ބަދަލުތަކެއްކަމަށް ރައީސް ވިދާޅުވި އެވެ. އަދި ދުނިޔޭގެ އެންމެ ބޮޑު ޑިމޮކްރަސީގެ ހައިސިއްޔަތުން އިންޑިޔާ ރައްޔިތުންނާއި އެގައުމުގެ ސަރުކާރަށް އެކަންކަމަކީ ވިސްނޭ ކަންތައްތަކެއް ކަމުގައި ގަބޫލުކުރައްވާކަމަށްވެސް ރައީސް ވިދާޅުވި އެވެ. 

ރާއްޖެއާއި ޗައިނާގެ ގުޅުމާމެދު އެ ނޫހުން ކުރި ސުވާލަކަށް ޖަވާބުދެއްވަމުން ރައީސް ވިދާޅުވީ އިންޑިޔާއަކީ ރާއްޖެއަށް ނުހަނު އަގުހުރި އެކުވެރިއެއް ކަމަށެވެ. އަދި އެހެން ގައުމުތަކާއެކު ތަފާތު ދާއިރާތަކުން ގުޅުން ބަދަހިކުރި ނަމަވެސް ރާއްޖެއިން ކުރާ ކަމެއްގެ ސަބަބުން މި ސަރަހައްދުގެ ހަމަޖެހުމާއި ސަލާމަތަށް އުނިކަމެއް ނުލިބޭނެކަން ރާއްޖެއިން ކަށަވަރުކުރާނެ ކަމުގެ ޔަގީންކަން ރައީސް ދެއްވި އެވެ. 

"ރާއްޖެއިން ކުރިއަށް އޮތް ތަނުގައިވެސް އިންޑިޔާއާއެކު އޮތް ޒަމާންވީ އިތުބާރުހުރި ގުޅުމަށް އިސްކަންދޭނެ. އަދި އެހެން ގައުމުތަކާއެކު ރާއްޖެއިން ކުރާ މަސައްކަތަކުން އިންޑިޔާގެ ސަލާމަތީ މަސްލަހަތަކަށް އުނިކަން ނުލިބޭނެކަމުގެ ޔަގީންކަން އެބައޮތް،" ރައީސް ވިދާޅުވި އެވެ. 

ރާއްޖެއަށް އެންމެ ގައުމަކަށް ބަރޯސާވާ މިންވަރު ކުޑަކޮށް ބައިނަލްއަގުވާމީ ގުޅުންތައް ސިންދަފާތުކުރުން މުހިއްމުކަން ފާހަގަކުރައްވައި ރައީސް ވިދާޅުވީ އެއާއެކުވެސް އިންޑިޔާއާއެކު ވަރުގަދަ އަދި އިސްތިރާޖީ ގުޅުމެއް ބޭއްވުމަށް ރާއްޖެއިން މަސައްކަތްކުރާނެ ކަމަށެވެ. 

"އަޅުގަނޑުގެ ސިޔާސަތަކީ "މޯލްޑިވްސް ފަސްޓް" ސިޔާސަތު. އަޅުގަނޑަށް އަބަދުވެސް އެންމެ ކުރިއަށް އަންނާނީ ދިވެހިރާއްޖެ. އެހެންނަމަވެސް އަޅުގަނޑުމެންގެ އަވައްޓެރިންނާއި އެކުވެރިންނަށް އިހުތިރާމު ކުރުމަކީ އަޅުގަނޑުމެންގެ ޑީއެންއޭގެ ބައެއް،" އެމަނިކުފާނު ވިދާޅުވި އެވެ.