އިންޑިއާ ދަތުރުފުޅުން ފުރިހަމަ ނަތީޖާ ފެންނާނެ: ރައީސް

އިންޑިއާއަށް ކުރައްވާ ރަސްމީ ދަތުރުފުޅުން ފުރިހަމަ ނަތީޖާ ލިބިގެންދާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ އިންޑިއާގެ ނިއުދިއްލީ ގައި ދިރިއުޅޭ ދިވެހި ރައްޔިތުންނާއި ބައްދަލު ކުރައްވާ ވާހަކަފުޅު ދައްކަވަމުންނެވެ. ރައީސުލްޖުމްހޫރިއްޔާގެ ދެކަނބަލުން އިންޑިއާއަށް ކުރައްވާ މި ދަތުރުފުޅަކީ އިންޑިއާގެ ރައީސް ދުރޫޕަދީ މުރުމޫގެ ދަޢުވަތަކަށް ކުރައްވާ ދަތުރުފުޅެކެވެ.

ދިއްލީގައި ތިބި ދިވެހިރައްޔިތުންނާއި ބައްދަލު ކުރައްވާ ވާހަކަފުޅު ދައްކަވަމުން ރައީސް ވިދާޅުވީ އެމަނިކުފާނުގެ އިންޑިއާ ދަތުރުފުޅުގައި ކުރިއަށް އޮތް ތިން ދުވަހަކީ މުހިންމު ތިން ދުވަސް ކަމަށެވެ. އެ ދުވަސްތަކުން ރައްޔިތުންނަށް ފައިދާހުރި ކަންތައްތަކެއް ވެގެންދާނެ ކަމަށް ވިދާޅުވި އެވެ.

"ކުރިއަށް އޮތް ތިން ދުވަހަކީ ދިވެހިރައްޔިތުންނަށް ފައިދާހުރި ކަންތައްތަކެއް، ދެ ގައުމުގެ ގުޅުމުގެ ތެރެއިން ފަހިވެގެންދާ ދުވަސްތަކަކަށް ވާނެ. އިރާދަކުރެއްވިއްޔާ މީގެ ފުރިހަމަ ނަތީޖާ، ފޮނިމީރުކަން އަޅުގަނޑުމެން އެންމެނަށް ލިބިގެން ދާނެ ދުވަސްތަކަކަށް ވެގެންދާނެ،" ރައީސް ވިދާޅުވި އެވެ.

ރައީސުލްޖުމްހޫރިއްޔާގެ މި ދަތުރުފުޅުގައި އިންޑިއާގެ ރައީސް ދުރޫޕަދީ މުރުމޫ އާއި ބޮޑު ވަޒީރު ނަރެންދްރަ މޯދީ، އަދި އެ ގައުމުގެ އިސް ވެރިންނާ ބައްދަލުކުރެއްވުމަށް ވަނީ ހަމަޖެހިފައެވެ. މި ބައްދަލުކުރެއްވުންތަކުގައި، ދެ ގައުމުގެ ދެމެދު އެއްބާރުލުން ގާއިމުކޮށްފައިވާ ދާއިރާތަކުން އިތުރަށް ގުޅުންބަދަހިކުރުމާ ގުޅޭގޮތުން މަޝްވަރާ ކުރައްވާނެ ކަމަށް ރައީސް އޮފީހުން ބުންޏެވެ.

ރައީސް މިހާރު ވަނީ އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމާނިއަމް ޖައިޝަންކަރާއި ބައްދަލު ކުރައްވާފަ އެވެ. ރައީސާއި ބައްދަލު ކުރެއްވިކަން ހާމަ ކުރައްވާ ޖައިޝަންކަރު އެކްސް ގައި ކުރެއްވި ޕޯސްޓެއް ގައި ވިދާޅުވީ މިއަދުގެ ބައްދަލްވުމުގައި ރާއްޖެ-އިންޑިއާގެ މަސްލަހަތު އޮތް މުހިންމު ކަންކަމާ މެދު މަޝްވަރާ ކުރައްވާފައިވާ ކަމަށެވެ. ނަމަވެސް ތަފްސީލެއް ނުދެއްވަ އެވެ.

ރައީސާއި އިންޑިއާގެ ބޮޑުވަޒީރު، ނަރެންދުރަ މޯދީ މާދަމާ ބައްދަލު ކުރައްވާނެ ކަން ވެސް ޖައިޝަންކަރު ފާހަގަ ކުރެއްވި އެވެ.  

ރައީސުލްޖުމްހޫރިއްޔާ އިންޑިއާއަށް ކުރައްވާ މި ފުރަމާނަ ދަތުރުފުޅުގައި އިންޑިއާގެ ވެރިރަށް ނިއުދިއްލީގެ އިތުރުން، މުމްބާއީއަށާއި ބެންގަލޫރަށް ވެސް ޒިޔާރަތް ކުރެއްވުމަށް ވަނީ ތާވަލު ކުރެވިފަ އެވެ.

ރައީސް ވިދާޅުވީ އެ ސިޓީތަކަށް ވަޑައިގެން ވެސް ދިވެހީންނާއި ބައްދަލު ކުރައްވާނެ ކަމަށެވެ. އެމަނިކުފާނުގެ އަރިހު ގައި، ސަރުކާރުގެ އިސް ވެރިންގެ ވަފުދެއް ބައިވެރިވެވަޑައިގަންނަވައެވެ. މި ދަތުރުފުޅު ގައި ބައިވެރިވެވަޑައިގަންނަވާ ދިވެހި ވަފުދުގެ މެހުމާންދާރީގެ ހުރިހާ ކަމެއް ހަމަޖައްސަވަނީ އިންޑިއާ ސަރުކާރުންނެވެ.