އިލެކްޓްރިކް ޗާޖިން ސްޓޭޝަންގެ އަމަލީ މަސައްކަތް ކުރިއަށް އެބަދޭ: ފަހުމީ
"ޝެޑިއުލްއާ އެއްގޮތަށް މަސައްކަތް ނިންމުމަށް އަޅުގަނޑުމެން މިދަނީ ވަރަށް ބުރަ މަސައްކަތަކެއް ކުރަމުން،"
އިލެކްޓްރޯނިކް ވެހިކަލް ޗާޖުކުރުމަށް ސްޓެލްކޯއިން ގާއިމުކުރަމުންދާ ސްޓޭޝަންގެ އަމަލީ މަސައްކަތް ވަރަށް ހަލުވި ކަމާއެކު ކުރިއަށް ދާ ކަމަށް އެ ކުންފުނިން ބުނެފިއެވެ.
ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ، އެކްސްގައި ކުރެއްވި ޕޯސްޓެއްގައި ވިދާޅުވީ އިލެކްޓްރިކް ވެހިކަލް (އީވީ) ކާރު ޗާޖިން ސްޓޭޝަންގެ މަސައްކަތް ވަރަށް ބާރަށް ކުރިއަށްދާއިރު، އޮން ސައިޓްގައި އަމަލީ ގޮތުން މަސައްކަތް ކުރަމުންދާ ކަމަށެވެ.
ފަހުމީ ވިދާޅުވީ މިއީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގެންގުޅުއްވާ ތިމާވެށީގެ ހަރުދަނާ ސިޔާސަތުގެ ތެރެއިން ކާބަން ފުޓްޕްރިންޓް ކުޑަކުރުމަށާއި، ގައުމަށާއި ދުނިޔެއަށް އަންނަ ކުރިއެރުންތަކާއިއެކު، ތިމާވެއްޓާއި ރައްޓެހި އުޅަނދުތަކަށް އޮންނަ ޑިމާންޑްބޮޑުވެ، އެފަދަ އުޅަނދުތައް ގެންގުޅެން ބޭނުންވާ ފަރާތްތަކަށާއި، އަދި މިހާރުވެސް ގެންގުޅޭ ފަރާތްތަކަށް ލުއި ފަސޭހަތައް ހޯދައިދިނުމަށް ކުރަމުންދާ މަސައްކަތެއް ކަމަށެވެ. އަދި މިކަމުގައި މި ސްޓޭޝަން މުހިންމު ދައުރެއް އަދާކުރާނެ ކަމަށްވެސް ވިދާޅުވިއެވެ.
"ޝެޑިއުލްއާ އެއްގޮތަށް މަސައްކަތް ނިންމުމަށް އަޅުގަނޑުމެން މިދަނީ ވަރަށް ބުރަ މަސައްކަތަކެއް ކުރަމުން،" އޭނާ ވިދާޅުވިއެވެ.
އީވީ ނުވަތަ އިލެކްޓްރިކް ވެހިކަލް ދުނިޔޭގައި މަގުބޫލުވެގެންދާއިރު އެއީ ޕެޓްރޯލު އަޅަން ނުޖެހޭ ތިމާވެއްޓާ ރައްޓެހި ބާވަތެއްގެ އުޅަނދުތަކެކެވެ.
އިލެކްޓްރޯނިކް ޗާޖިން ސްޓޭޝަން ގާއިމު ކުރުމަށް ނިންމާފައިވަނީ ސްޓެލްކޯގެ ހެޑް އޮފީހާއި އިންވެގެން އޮންނަ ދޮންއަދަރާދަ މަގުގައެވެ. މިތަނުގައި ހަތަރު ފުރޮޅުލީ އުޅަނދުގެ އިތުރުން ދެ ފުރޮޅުލީ އުޅަނދުތައްވެސް ޗާޖު ކުރެވޭނެ ގޮތްތަށް ގާއިމުކުރާނެ ކަމަށް އެ ކުންފުނިން ވަނީ ބުނެފައެވެ.
ކޮމެންޓް
Republic of Maldives