އިހަވަންދިއްޕޮޅު މެރިޓައިމް ވިޔަފާރި | އާގު ބޯޓުގެ ކުނި މެނޭޖު ކުރަން ވެމްކޯއަށް
އެމްޕީއެލްއިން ވެމްކޯއަށް ހަވާލުކުރި ކުނި މެނޭޖު ކުރުމުގެ ވިޔަފާރީގެ ދަށުން އެ ކުންފުންޏަށް ލިބޭ އާމްދަނީ އިތުރުވާނެ އެވެ.
އިހަވަންދިއްޕޮޅުގައި ސަރުކާރުން ފެށި މެރިޓައިމް ވިޔަފާރީގެ ދަށުން ބޭރުން ރާއްޖެ އަންނަ އާގު ބޯޓު ފަހަރާއި އެހެނިހެން އުޅަނދުފަހަރުގެ ކުނި އުކާލައި މެނޭޖު ކުރުމުގެ މަސައްކަތް ވޭސްޓް މެނޭޖުމަންޓް ކޯޕަރޭޝަން (ވެމްކޯ) އާ ހަވާލުކޮށްފި އެވެ.
އިހަވަންދިއްޕޮޅު މެރިޓައިމް ވިޔަފާރީގައި ހިންގުމުގައި އިސް ދައުރެއް އަދާކުރާ އެމްޕީއެލްގެ އޮފީހުގައި މިއަދު ބޭއްވި ރަސްމިއްޔާތެއްގައި ރާއްޖެ އަންނަ ބޯޓު ފަހަރުން އުކާލާ ކުނީގެ ބާވަތްތައް މެނޭޖުކޮށް ބެލެހެއްޓުމުގެ މަސައްކަތުގެ އެއްބަސްވުމުގައި ވެމްކޯގެ ފަރާތުން ސޮއިކުރެއްވީ މުޖުތަބާ ޖަލީލް އެވެ. އަދި އެމްޕީއެލްގެ ފަރާތުން މި އެއްބަސްވުމުގައި ސޮއިކުރެއްވީ އެމްޑީ މުހައްމަދު ވަޖީހު އިބްރާހިމް އެވެ.
ސޮއިކުރެއްވުމަށްފަހު އެމްޕީއެލްގެ އެމްޑީ ވަޖީހު ވިދާޅުވި މި އެއްބަސްވުމާއެކު އިހަވަންދިއްޕޮޅަށް ބޭރުން ހިދުމަތް ހޯދަން އަންނަ ބޯޓު ފަހަރުން އުކާލަން ބޭނުންވާ ކުނި އުކާލުމުގެ މަސައްކަތް އެ ކުންފުނިން ކުރާނެ އެވެ. އަދި މި ކަމަކީ ވެމްކޯއަށް އިތުރު އާމްދަނީއެއް ލިބޭނެ ވިޔަފާރިއަކަށް ވެގެންދާނެ ކަމަށް ވަޖީހު ވިދާޅުވި އެވެ. އަދި މި އެއްބަސްވުމަށްފަހު މެރިޓައިމް ހިދުމަތް ހޯދަން އަންނަ ބޯޓު ފަހަރުން އުކާލަން ބޭނުންވާ ކުނި މެނޭޖު ކުރަން ހއ. ގެ ކޮންމެ ވެސް ރަށެއްގައި ވަކި ސަރަހައްދެއް ހެދުމުގެ ވިސްނުން ގެންގުޅުއްވާ ކަމަށް ވަޖީހު ވިދާޅުވި އެވެ.
"ކޮންމެ ޕޯޓަކަށް މަޑު ކުރުމަށްފަހު ބޭނުންވާނެ ކުނި އުކާލަން. ރާއްޖޭގެ އިހަވަންދިއްޕޮޅަށް އުޅަނދު އައުމުން އެ މަސައްކަތް ކުރާނީ ވެމްކޯއިން،" ވަޖީހު ވިދާޅުވި އެވެ.
ކުނި މެނޭޖު ކުރުމުގެ ވިޔަފާރި ފުޅާކޮށް އާމްދަނީ އިތުރު ކުރަމުން ގެންދާ ވެމްކޯގެ އެމްޑީ މުޖުތަބާ ވިދާޅުވީ މި އެއްބަސްވުމުގެ ދަށުން ބޯޓު ފަހަރުގައި ބޭނުންކުރާ ޖޫޒް އޮއިލްވެސް އެ ކުންފުނިން ނަގާނެ ކަމަށާ މި ތެލު އަޅަން ހާއްސަ ޓޭންކުވެސް ހަދަނެ ކަމަށެވެ.
"އަޅުގަނޑުމެންގެ އަތުގައި މި ވަގުތު ވެސް 10 ލޭންޑިން ކްރާފްޓް އެބައޮތް. އެހެންވެ މިހާރުން މިހާރަށްވެސް މަސައްކަތް ފެށޭނެ،" މުޖުތަބާ ވިދާޅުވި އެވެ.
ބޯޓުން އުކާލާ ޔޫޒްޑް އޮއިލް ރީއެކްސްޕޯޓު ކުރެވޭނެ
އެމްޑީ ވަޖީހު ވިދާޅުވީ ބޯޓު ފަހަރުން އުކާލަން ބޭނުންވާ ޔޫސްޓް އޮއިލްއަކީ މާލީ ގޮތުންވެސް ފައިދާތަކެއް ހުރި އެއްޗެއް ކަމަށާ އެހެންކަމުގެ މިތެޔޮ ރީއެކްސްޕޯޓް ކުރުމަކީވެސް ކުރެވޭނެ ކަމެކެވެ.
"ތެޔޮ ]ޔޫސްޑް އޮއިލް] ރީއެކްސްޕޯޓް ކުރާ އިންޓަނޭޝަނަލް ޕާޓީތައް ވެސް އެބަހުރި. އެފަދަ ހުށަހެޅުންތައްވެސް އެބަހުރި،" ވަޖީހު ވިދާޅުވި އެވެ.
ސަރުކާރުން އިހަަވަންދިއްޕޮޅުގައި ވަނީ ދުނިޔޭގެ އެންމެ ބޮޑު ތެޔޮ ކުންފުނި ވިޓޯލްއާއެކު ބަންކަރިން ފަށާފަ އެވެ. ބަންކަރިން ހިދުމަތް ދެނީ އެސްޓީއޯއިންނެވެ. އަދި މި ސަރަހައްދަށް އަންނަ ބޯޓު ފަހަރަށް ބޭނުންވާ މެރިޓައިމް އެހެން ހިދުމަތްތައް ދެނީ ރާއްޖޭގެ މައި ވިޔަފާރި ބަނދަރު ބަލަހައްޓާ އެމްޕީއެލް އިންނެވެ. އެ ކުންފުނިން ދަނީ މެރިޓައިމްއާ ގުޅުންހުރި 14 ހިދުމަތެއް ދޭން ފަށާފަ އެވެ. މި ހިދުމަތް ހޯދަން ހޯރަފުށީ ކައިރީގައި މިވަގުތުވެސް ޕެނަކާ ތެޔޮ ޓޭންކަމެއް އެބައޮތެވެ. އެމްޓީ ޖިންގީ ތެޔޮ ޓޭންކަރު ދަތުރު ކުރަނީ ދުބާއީގެ އަލްހަމްރިއްޔާ ޕޯޓުން ޗައިނާގެ ޑޮންގުން ޗައިނާ ޕޯޓަށެވެ.
މެރިޓައިމް އިގްތިސޯދު - މެދުއިރުމަތިން ޗައިނާއަށް ދާ ބޯޓެއް އިހަވަންދިއްޕޮޅަށް
ކޮމެންޓް
Republic of Maldives