"ދިވެހިންގެ ދިރިއުޅުމުގެ އަސާސްތައް ބިނާވެފައި އޮތީ އިސްލާމް ދީނަށް"

ދިވެހިންގެ ދިރިއުޅުމުގެ ވަރަށް ގިނަ އަސާސްތަަކުގައި އިސްލާމް ދީނާ ގުޅުވައިލެވޭ މާނަހުރި އެތައް ކަމެއް ފެންނަން އެބަހުރި ކަމަށް ދިވެހި ބަހާއި ތަރިކައާ ބެހޭ މިނިސްޓަރު އާދަމް ނަސީރު ވިދާޅުވެއްޖެ އެވެ.

ރާއްޖެ އިސްލާމްވީ ދުވަސް ފާހަގަކުރުމަށް މިއަދު ބޭއްވި ހާއްސަ ޖަލްސާގައި ވާހަކަ ދައްކަވަމުން މިނިސްޓަރު ނަސީރު ވަނީ އިސްލާމް ދީނަށް ދިވެހިން ދޭ އަހައްމިއްޔަތުކަން ދައްކުވައިދޭ ވަރަށް ގިނަ މިސާލުތައް ވިދާޅުވެ ދެއްވާފަ އެވެ. އެ މިސާލުތައް ފައްޓަވަމުން، މިނިސްޓަރު ވިދާޅުވެފައި ވަނީ އެވާހަކަތަކީ ދީނީ ގޮތުން ކަން އޮތްގޮތުގެ ހުކުމް ނޫން ކަމަށާއި، އެއީ ދިވެހިންގެ ވިސްނުމާއި އާދަކާދައިގެ މައްޗަށް ބިނާވެފައިވާ ކަންކަން ކަމަށެވެ.

މިނިސްޓަރު ވިދާޅުވީ ދިވެހިންގެ ދިރިއުޅުމުގެ އެންމެ އުސް ކުރި ބޯއްޓަކީ އިސްލާމް ދީން ކަމަށާއި ދިވެހިންގެ ވިސްނުމުގައި އެންމެ އިސްކަން ދެވޭ ކަމަކީ އިސްލާމް ދީންކަން އެނގޭ އެތައް ކަމެއް މިއަދާ ހަމައަށް ވެސް ފެންނަން އެބަހުރި ކަމަށެވެ.

"މިސާލަކަށް އަޅުގަނޑުމެންގެ ބަސްތަކަށް ބަލާލިއަސް، ދެނަމާދު ދޭތެރެއޭ ބުނީމާ އެއީ ކޮން ދެނަމާދު ދޭތެރެއެއްކަން ނޭންގޭ ދިވެއްސަކު ނުހުންނާނެ. އެއީ މަޣްރިބާ އިޝާކަން އަދި ދެނަމާދު ދޭތެރެ އަންނަނީ ކޮން މާނައެއްގައިކަން، އާދެ އެއީ ކީރިތި ގުރުއާން އުނގަންނައިދިނުމާ، ކީރިތި ގުރުއާން އުނގެނި ކިޔެވުމަށް، މިވާހަކަކަން އެބުނަނީ. އެހެންވީމަ މުޅި ދިވެހިންގެ މުހާވަރާގައި އެމީހުން ދީން މާނަކުރާ އެކި ވަގުތުތައް ދީނާ ގުޅުވާލާގޮތް ދިވެހިންގެ ދިރިއުޅުމުން، ބަސްކޮށާރުން ފެނޭ،" މިނިސްޓަރު ވިދާޅުވި އެވެ.

އިތުރު މިސާލަކަށް ދެއްކެވީ ހޯމަ ވިލޭރޭ އަދި ހުކުރު ވިލޭރޭގެ ވާހަކަ ދިވެހިން ދެއްކުމެވެ. ހޯމަ ވިލޭރޭ އަކީ ކީރިތި ރަސޫލާ ދުނިޔޭގެ އަލިކަން ދެކެވަޑައިގަތް ރޭ ކަމާއި ހުކުރު ވިލޭރޭއަކީ އާދަމް އަލައިހިއްސަލާމް ދުނިޔެއަށް ފޮނުއްވިރޭކަން ނޭންގޭ ދިވެއްސަކު ނުހުންނާނެ ކަމަށް މިނިސްޓަރު ވިދާޅުވި އެވެ.

"ހަމައެގޮތަށް ގެއެއް އަޅާއިރު ގެއެއްގެ އެނދުއަށި އަތުރާއިރު ގިބްލައަށް ކުރިމަތިލައިގެން އޮވެވޭގޮތަށް، އާދެ އޮށޯވެ އޮންނައިރުވެސް ވަކި އޭގެ އިންތަކެއް، މިންތަކެއް ހުންނަ ގޮތަށް އެކަން ކުރަމުން އައީ،" އިތުރު މިސާލެއް ދައްކަވަމުން މިނިސްޓަރު ވިދާޅުވި އެވެ.

މިސްކިތް ބިނާކުރާއިރު ވެސް އެހެން ބިނާތަކާ ތަފާތުކަން މިނިސްޓަރު ފާހަގަކުރެއްވި އެވެ. އެގޮތުން މިސްކިތްތައް އުސްވެފައި ބޭނުންކޮށްފައި ހުންނަ ފަންނީ ކުރެހުންތައް އާންމު ގޭގެއިން ނުފެންނަ ކަމަށް ވިދާޅުވި އެވެ. އަދި ބާވެފައި ހުންނަ މިސްކިތް ރޫޅާލުމަށްފަހު މިސްކިތު ވަކަރު ދެން އެހެން ކަމެއްގައި ބޭނުން ނުކުރާކަން ވެސް ފާހަގަކުރެއްވި އެވެ.

"އިސްލާމް ދީނަކީ ދިވެހިން ދިރިއުޅުމުގައި އެންމެ އުހުގަ އޮތް ހަގީގަތް. ދިވެހި ވިސްނުމުގެ ހަގީގަތް ގުޅިފަ އޮތީ އިސްލާމް ދީނާ. ދިވެހިންގެ ހުރިހާ އަމަލުތަކާއި ދިރިއުޅުމުގެ އަސާސްތައް ބިނާވެފަ އޮތީ އިސްލާމް ދީނާ،" މިނިސްޓަރު ވިދާޅުވި އެވެ.

މިއަދު ފާހަގަކުރަމުން ދަނީ ރާއްޖެ އިސްލާމްވިތާ 898 އަހަރުވީ ދުވަހެވެ. މިއަދަކީ މުދައްރިސުންގެ ވެސް ދުވަހަށްވާތީ، އެދުވަހުގެ ތަހުނިޔާވެސް މިނިސްޓަރު ވަނީ ފޮނުއްވާފަ އެވެ.