އިސްރާއީލުން ހަނގުރާމައިގެ ޖަރީމާތަކެއް ހިންގަފާނެކަން އެމެރިކާއަށް އެނގޭ: ރިޕޯޓު

އިސްރާއީލުން އޮކްޓޯބަރު 7، 2023 ގައި ޣައްޒާއަށް ދޭން ފެށި އުދުވާނީ ހަމަލާތަކުގައި ހަނގުރާމައިގެ ކުށްތަކެއް ހިންގުމުގެ ފުރުސަތު އޮތްކަން އެމެރިކާގެ ބައެއް އޮފިޝަލުން ރައީސް ޖޯ ބައިޑެންގެ ސަރުކާރުގެ ވެރިންގެ ސަމާލުކަމަށް ގެންނެވިކަން ހާމަވެއްޖެ އެވެ. 

އެމެރިކާގެ އިސް މަސްއޫލުވެރިންގެ މެދުގައި ބަދަލުކޮށްފައިވާ ތިން އީމެއިލް ސެޓެއް މުރާޖައާކުރުމަށްފަހު ރޮއިޓާސްއިން ބުނީ އޮކްޓޯބަރު 11 އާއި 14 ވަނަ ދުވަހާ ދެމެދު، ޣައްޒާގައި މަރުވަމުންދިޔަ އާންމުންގެ އަދަދު އިތުރުވަމުންދާ ރޭޓާމެދު ކަންބޮޑުވުން ފާޅުކޮށް އެއީ ހަނގުރާމައިގެ ޖަރީމާތަކެއް ކަމުގައި ވުން އެކަށީގެންވާކަމަށް އެމެރިކާ ސަރުކާރަށް ލަފާ އަރުވާފައިވާ ކަމަށެވެ. 

އޭގެ އިތުރަށް މި އީމެއިލްތަކުގައި އެމެރިކާއިން ހަނގުރާމައާމެދު ވާހަކަދައްކަމުން އައި ގޮތް ބަދަލުކޮށް އިސްރާއީލާއެކު އެމެރިކާ އޮތްކަން ހާމަކުރުމާއެކު، ފަލަސްތީނު ރައްޔިތުން ތަހައްމަލުކުރަމުންދާ ވޭންތަކާއި އަނިޔާއާމެދު ހަމްދަރުދީ ފާޅުކުރުމަށް އޮފިޝަލުން ބާރުއެޅުއްވިކަން ފާހަގަވެ އެވެ. 

އޮކްޓޯބަރު 11 ވަނަ ދުވަހު އެމެރިކާގެ ސްޓޭޓް ޑިޕާޓުމެންޓުގެ އިސް އޮފިޝަލެއް ކަމަށްވާ ބިލް ރޫސޯ އެމެރިކާ ސަރުކާރުގެ އިސްވެރިންނަށް ފޮނުއްވި އީމެއިލެއްގައި ވިދާޅުވެފައިވަނީ ޣައްޒާގައި ނިއުޅެމުންދިޔަ އިންސާނީ ކާރިސާއާމެދު އެއްވެސް ބަހެއް ނުބުނުމަކީ އަރަބި ބަހުން ވާހަކަދައްކާ މީހުންގެ ކުރިމަތީގައި އެމެރިކާގެ އިތުބާރު ގެއްލެމުންދާ ކަމެއް ކަމަށެވެ. 

އެ ދުވަހަކީ ޣައްޒާއަށް އިސްރާއީލުން ދިން ހަމަލާތަކުގައި ފަލަސްތީނުގެ 1،200 އެއްހަައި މީހުން ޝަހީދުކޮށްލި ދުވަހެކެވެ. 

ރޫސޯގެ އީމެއިލުގައި އޭނާ ވިދާޅުވެފައިވަނީ ފަލަސްތީނުގެ އާންމުންނަށް ކުރިމަތިވެފައި އޮތް އިންސާނީ ހާލަތާމެދު އެމެރިކާއިން ބަހެއް ނުބުނުމަކީ އެއިން އެއްވެސް މަންފާއެއް ނުލިބޭ ކަމަކަށްވުމުގެ އިތުރަށް އެކަމުގެ ސަބަބުން އިސްރާއީލުން ހިންގާ ހަނގުރާމައިގެ ޖަރީމާތަކުގައި ބައިވެރިވުމުގެ ތުހުމަތު އެމެރިކާއަށް އަމާޒުވާނެ ކަމަށެވެ. 

މާޗު މަހުގައި ރޫސޯވަނީ އަމިއްލަ ސަަބަބުތަކެއް ހުރެގެންކަމަށް ވިދާޅުވެ މަގާމުން އިސްތިއުފާ ދެއްވާފަ އެވެ. 

އޮކްޓޯބަރު 13 ވަނަ ދުވަހު އިސްރާއީލުންވަނީ އުތުރު ޣައްޒާގައި ދިރިއުޅޭ މީހުން އެމީހުންގެ ގެދޮރު ދޫކޮށް ދެކުނަށް ހިޖުރަކުރުމަށް 24 ގަޑިއިރުގެ މުހުލަތެއް ދޭކަން އަންގައި އުތުރު ޣައްޒާއަށް ވައިގެ މަގުން ލީފްލެޓުތަކެއް އަޅާފަ އެވެ. 

ރެޑް ކްރެސެންޓާއެކު ބޭއްވެވި ބައްދަލުވުމަކަށްފަހު އެއިރު އެމެރިކާގެ އެސިސްޓެންޓް ސެކްރެޓަރީ އޮފް ޑިފެންސް ފޯ ދަ މިޑްލް އީސްޓުގެ މަގާމުގައި ހުންނެވި ޑަނާ ސްޓްރޯލް ފޮނުއްވި އީމެއިލެއްގއި އޭނާ ވިދާޅުވީ ރެޑް ކްރެސެންޓުން ދެކޭ ގޮތުގައި އެއިރުވެސް އިސްރާއީލު އޮތީ ހަނގުރާމައިގެ ޖަރީމާތައް ފަށައިގަތުމުގެ ތުންފަތް މަތީގަ އެވެ. 

"މިހާ އަވަހަށް މިލިއަނެއްހައި އާންމުން އެމީހުން ދިރިއުޅެމުންދިޔަ ސަރަަހައްދު ނޫން ތަނަކަށް ގެންދިއުމަކީ ކުރެވޭނެ ކަމެއް ނޫންކަން ރެޑް ކްރޮސްއިން ފާހަގަަކުރޭ،" އޭނާގެ އީމެއިލުގައި ވިދާޅުވެފައިވެ އެވެ. އެ އީމެއިލްތަކުގެ ތެރޭގައި ބައެއް އޮފިޝަލުންވަނީ އިންސާނީ ބޮޑު ކާރިސާއެއް ކުރިމަތިނުވާނެ ގޮތަކަށް އެހައި ގިނަ ބަޔަކު އެއް ސަރަހައްދުން އަނެއް ސަރަހައްދަށް ގެންދިއުމަކީ ކުރެވޭނެ ކަމެއް ނޫންކަމަށް ވިދާޅުވެފަ އެވެ. 

އެ އީމެއިލް ފޮނުވި ދުވަހަކީ ފަލަސްތީނު ރައްޔިތުންނަށް އިސްރާއީލުގެ ހަނގުރާމައިގެ ސަބަބުން ކުރިމަތިވަމުންދާ ގެއްލުމާއި އަނިޔާ އެމެރިކާ ސަރުކާރުން ގަަބޫލުކޮށް އެކަންކަން ފެންނަކަމަަށް ރަސްމީކޮށް ބުނި ދުވަހެވެ. އެއީ ދޯހާގައި އޮތް ނޫސްވެރިންގެ ބައްދަލުވުމެއްގައި ސެކްރެޓަރީ އޮފް ސްޓޭޓް އެންޓޮނީ ބްލިންކެން ދެއްކެވި ވާހަކަފުޅުގަ އެވެ.