އަބްދުލްމަޖީދު މާހިރު އަވަހާރަވެއްޖެ

އަބްދުލްމަޖީދު މާހިރު އަވަހާރަވެއްޖެ އެވެ.

މާހިރު އަވަހާރަވީ އާލާސްކަންފުޅާ އުޅުއްވާތާ ގިނަ ދުވަސްތަކެއް ފަހުންނެވެ. މާހިރަކީ ދިވެހި ބޭސްވެރިކަމާ ގުޅޭ މުހިންމު / ގިނަ ފޮތްތަކެއް ލިޔުއްވާ ނެރުއްވެވި ބޭފުޅެކެވެ. ދާދި ފަހުން ވެސް ފޮތެއް ނެރުއްވި އެވެ.

މީގެ އިތުރުން މާލެ މުނިސިޕަލްޓީގެ ރައީސް ކަމާއި ފެން ކުންފުނީގައި ވެސް މުހިނުްމު މަސައްކަތްތަކެއް ކުރެއްވި އެވެ. މުނިސިޕަލްޓީގެ ރައީސްކަން ކުރެއްވީ ރައީސް ނާސިރުގެ ވެރިކަމުގަ އެވެ.

ފެން ކުންފުނީގައި ހިދުމަތް ކުރެއްވީ ރައީސް މައުމޫންގެ ވެރިކަމުގަ އެވެ. މާލޭގައި ނަރުދަމާ އެޅުމުގެ މަސައްކަތް ހިނގުމުގައި އިސްކޮށް ހުންނެވީ މާހިރު އެވެ.

އައްޑޫގައި އިނގިރޭސިން ތިބިއިރު އައްޑޫގައި ވެސް މަސައްކަތް ކުރެއްވި އެވެ.

މާހިރުގެ ބޭފުޅުންގެ ތެރޭގައި ޑރ. ފަރަހަނާޒް ފައިސަލް އާއި އަމީން ފައިސަލް ހިމެނިވަޑަައިގަންނަވަ އެވެ. އެ ދެ ބޭފުޅުންގެ މަންމައަކީ އަމީނާ މުހައްމަދު އަމީނެވެ.

މާހިރު އަވަހާރަވުމާއި ގުޅިގެން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ތައުޒިޔާ ވިދާޅުވެފަ އެވެ.

އެކްސް ގައި ކުރެއްވި ޕޯސްޓެއްގައި އެމަނިކުފާނު ވިދާޅުވީ މާހިރަކީ ރާއްޖޭގެ އިސް ރަށްވެހީންގެ ތެރެއިން ނުހަނު ގަދަރުވެރި، ހިދުމަތްތެރި، ތަޖުރިބާކާރު ހަރުދަނާ ޝަހްސިއްޔަތެއް ކަމަށެވެ. މާހިރު އަވަހާރަވި ހަބަރު އަޑު އެހީ ފުން ހިތާމައާއެކު ކަމަށް ވިދާޅުވި އެވެ.

އޭނާ އަކީ މާލޭ މުނިސިޕަލް ކައުންސިލްގެ ރައީސްކަމުގެ އިތުރަށް، ސަރުކާރުގެ އެކި އިދާރާތަކުގައި އިސް މަގާމުތަކެއް ފުރުއްވާފައިވާ ބޭފުޅެއްކަން ފާހަގަ ކުރައްވާ ރައީސް ވިދާޅުވީ މާހިރަކީ ދިވެހި ބޭސްވެރި ހަކީމެއް ކަމަށެވެ. އަދި ދިވެހި ތާރީހާއި އާދަކާދައިގެ އެތައް މައުލޫމާތެއް މިއަދުގެ ޖީލަށް އޮޅުންފިލުއްވައިދެއްވި އުސްތާޒެއް ކަމަށް ރައީސް ވިދާޅުވި އެވެ.

"ގައުމަށް ހިދުމަތްތެރި އިލްމީ ގާބިލް ދަރީންތަކެއް ތަރުބިއްޔަތު ކުރެއްވި އަގުހުރި ބައްޕަ އެކެވެ،"