އދގެ ސެކްރެޓަރީ ޖެނެރަލް އިސްރާއީލަށް ވަދެވަޑައިގަތުން މަނާކުރުމުން އެމެރިކާ ނުރުހިއްޖެ
އދގެ ސެކްރެޓަރީ ޖެނެރަލަށް އިސްރާއީލަށް ވަދެވަޑައިގަތުން މަނާކުރުމުން ދުނިޔޭގެ ކުރިމަތީގައި އިސްރާއީލުގެ މަގާމު އިތުރަށް ރަނގަޅުނުވާނެކަމަށް އެމެރިކާއިން ގަބޫލުކުރެ އެވެ.
އިސްރާއީލަށް އދގެ އަމީން އާންމު އެންޓޯނިއޯ ގުޓަރޭސް ވަދެވަޑައިގަތުން މަނާކުރުމަށް ނިންމުމުން އެމެރިކާއިން ނުރުހުން ފާޅުކޮށްފި އެވެ.
ބުދަދުވަހު އިސްރާއީލުންވަނީ ގުޓަރޭސްއަކީ "ޕާސަނާ ނޮން ގްރާޓާ"އެއް ކަމަށް ނިންމައި، އެގައުމަށް އޭނާ އެތެރެވެވަޑައިގަތުން މަނާކޮށްފަ އެވެ. އެމެރިކާއިން ސިފަކުރި ގޮތުގައި އެއީ ބިނާކުރަނިވި ނިންމުމެއް ނޫނެވެ.
"އެއީ އެއްވެސް ގޮތަކުން ފައިދާވަނިވި ގޮތެއްކަމަށް އަޅުގަނޑުމެން ނުދެކެން،" އެ ނިންމުމާމެދު ނޫސްވެރިޔަކު ކުރި ސުވާލަކަށް ޖަވާބުދެއްވަމުން އެމެރިކާގެ ސްޓޭޓް ޑިޕާޓުމެންޓުގެ ތަރުޖަމާން މެތިއު މިލާ ވިދާޅުވި އެވެ.
މިލާ އިތުރަށް ވިދާޅުވީ އިސްރާއީލުން އދއާއެކު އިތުރަށް މަސައްކަތްކުރަންޖެހޭ ކަމަށެވެ. އަދި އެކަމުގެ ގާބިލުކަން އިސްރާއީލުގެ ކިބާގައި ހުންނަންވާނެ ކަމަށް ގަބޫލުކުރައްވާ ކަމަށެވެ. އަދި އިސްރާއީލުގެ ނިންމުމުގެ ސަބަބުން ދުނިޔޭގައި އެކަމުގެ މަގާމު އިތުރަށް ރަނގަޅުނުވާނެކަން އޭނާ ފާހަގަކުރެއްވި އެވެ.
ގުޓަރޭސްއަށް އިސްރާއީލަށް ވަދެވަޑައިގަތުން މަނާކުރުމަށް ނިންމީ އީރާނުން އިސްރާއީލަށް ދިން ހަމަލާއާ ގުޅިގެން ނުތަނަވަސްކަން ކުޑަކުރުމަށް ބާރުއަޅުއްވައި ގުޓަރޭސް ދެއްކެވި ވާހަކަފުޅާމެދު ހިތްހަމަނުޖެހިގެންނެވެ.
އެ ނިންމުން ނިންމި ސަބަބެއްކަމަށް އިސްރާއީލުގެ ހާރިޖީވަޒީރު އިސްރާއީލް ކަޓްޒް ވިދާޅުވީ އީރާނުގެ ހަމަލާ ސާފު އިބާރާތުން ގުޓަރޭޒް ކުށްވެރިނުކުރެއްވި ކަމަށެވެ.
އެ ހަމަލާއަށްފަހު ވަގުތުން ހަމަލާ ބަދަލުކުރުން ހުއްޓައިލުމަށް ގޮވައިލައްވާ ގުޓަރޭސް ވިދާޅުވީ "މެދުއިރުމަތީގެ ހަމަނުޖެހުމާއި ނުތަނަވަސްކަން ފަހަރަކަށްވުރެ ފަހަރެއް މަތިކުރަމުންދާ ދިއުން ކުށްވެރިކުރަން" ކަމަށެވެ.
ކޮމެންޓް
Republic of Maldives