ހުޅުމާލެއިން ސިނާއީ ބޭނުމަށް 12 ބިމެއް ވިއްކަނީ، ހަމައެކަނި ދިވެހިންނަށް
އެޗްޑީސީން ނެރުނު ބަޔާނެއްގައި ބުނި ގޮތުގައި ވިއްކަން ނިންމާފައިވާ ބިންތަކަކީ ހުޅުމާލޭގެ ދެވަނަ ފިޔަވަހިން ވިއްކާ ބިންތަކެވެ. ވިއްކަން ނިންމާފައިވަނީ ދެ ސައިޒެއްގެ ބިމެވެ. އެއީ 3،689 އަކަފޫޓާއި، 3،746 އަކަފޫޓުގެ ބިމެވެ.
ހުޅުމާލެއިން ސިނާއީ ބޭނުންތަކަށް 12 ބިމެއް ވިއްކުމަށް ހައުސިން ޑިވެލޮޕްމެންޓު ކޯޕަރޭޝަން (އެޗްޑީސީ)އިން ހުޅުވާލައިފި އެވެ.
އެޗްޑީސީން ނެރުނު ބަޔާނެއްގައި ބުނި ގޮތުގައި ވިއްކަން ނިންމާފައިވާ ބިންތަކަކީ ހުޅުމާލޭގެ ދެވަނަ ފިޔަވަހިން ވިއްކާ ބިންތަކެވެ. ވިއްކަން ނިންމާފައިވަނީ ދެ ސައިޒެއްގެ ބިމެވެ. އެއީ 3،689 އަކަފޫޓާއި، 3،746 އަކަފޫޓުގެ ބިމެވެ.
އެ ކުންފުނިން ބުނެފައިވަނީ މި ބިންތައް ގަތުމަށް ހުށަހެޅޭނީ ދިވެހިންނަށް އެކަނި ކަމަށެވެ. އެގޮތުން 18 އަހަރު ވެފައިވާ ކޮންމެ ދިވެއްސަކަށްވެސް ބިން ގަތުމަށް ހުށަހެޅޭނެ އެވެ. އަދި ކުންފުންޏަކުން ހުށަހަޅާނަމަ އެއީ ރާއްޖޭގައި ރަސްޖިސްޓްރީކޮށްފައިވާ ސައްތައިން ސައްތަ ދިވެހިންގެ ހިއްސާ އޮންނަ ކުންފުންޏަކަށްވާންވާނެ އެވެ.
ބިން ވިއްކުން ކުރިއަށްގެންދާނީ ދެ މަރުހަލާއަކަށް ބަހާލައިގެން ކަމަށާއި، ފުރަތަމަ މަރުހަލާއަކީ ބިން ގަތުމަށް ޝައުގުވެރިކަން ފާޅުކޮށް އެކްސްޕްރެޝަން އޮފް އިންޓަރެސްޓު ހުށަހެޅުމުގެ މަރުހަލާ ކަމަށް އެޗްޑީސީން ބުންޏެވެ.
އެ ކުންފުނިން ބުނި ގޮތުގައި ދެވަނަ މަރުހަލާއަކީ ވިއްކަން ކަނޑައަޅާފައިވާ ބިމެއް ގަތުމަށް އެކަކަށްވުރެ ގިނަ ފަރާތްތަކުން ޝައުގުވެރިިކަން ފާޅުކޮށްފައިވާނަމަ، ބީލަމުގެ އުސޫލުން ބިން ވިއްކުމެވެ. ބީލަން ފެށޭނީ 7،500 ރުފިޔާއިންނެވެ. ކޮންމެ ފަރާތަކަށްވެސް ތިން ބިން ގަނެވޭނެ އެވެ.
ބީލަމުގެ މަރުހަލާ ކުރިއަށްގެންދާނީ ބީލަން ހުށަހެޅުމަށް އެޗްޑީސީން ގާއިމުކޮށްފައިވާ އޮންލައިން ޕޯޓަލް މެދުވެރިކޮށެވެ. އެ ޕޯޓަލުގައި ވިއްކުމަށް ކަނޑައަޅާފައިވާ ބިންތަކުގެ މައުލޫމާތު މިހާރު ފެންނަން ހުންނާނެކަމަށް އެޗްޑީސީން ބުންޏެވެ.
ބިންތައް ވިއްކުމާ ގުޅޭ އިތުރު މައުލޫމާތު އެ ކުންފުނީގެ ހޮޓްލައިން ނަންބަރު 1516 އަށް ގުޅުމުން ފާސްކުރެވޭނެ އެވެ.
ކޮމެންޓް
Republic of Maldives