އެމްޑީޕީއަށް ބޮޑު ބަދަލެއް | އެކަޑެމީއަކާއި ތިންކު ޓޭންކެއް ގާއިމުކުރަނީ
ސިޔާސީ ދާއިރާއިން ކިޔަވައިދޭ އެކަޑެމީއެއް ގާއިމުކުރުމަށާއި، ތިންކު ޓޭންކެއް ގާއިމުކުރުމަށާއި، މާލީ ގޮތުން ޕާޓީއަކީ ފުދުންތެރި ޕާޓީއަކަށް ހެދުމަށް އިމާރާތް ހަދައި ކުއްޔަށް ދިނުމުގެ ވިޔަފާރިކުރަން ފައްޔާޒު ހުށަހެޅުއްވި އެވެ.
ރާއްޖޭގެ އެންމެ ދުވަސްވީ އަދި އެންމެ ބޮޑު ޕާޓީ އެމްޑީޕީގެ ހިންގުން ހަރުދަނާކުރުމުގެ ގޮތުން އެ ޕާޓީން ސިޔާސީ ފަންނު އުނގަންނައިދޭ އެކަޑެމީއަކާއި ސިޔާސަތުތައް ދިރާސާކުރަން ހާއްސަ ތިންކު ޓޭންކެއް އުފައްދަން ނިންމައިފި އެވެ.
މިރޭ އެމްޑީޕީގެ ގައުމީ މަޖިލީހުގެ ޖަލްސާގައި ޕާޓީގެ ހިންގުން ހަރުދަނާކުރުމަށް ތިން ކަމެއް ކުރަން ޕާޓީގެ ޗެއާޕާސަން ފައްޔާޒު އިސްމާއީލު ހުށަހެޅުވި އެވެ. އެގޮތުން ސިޔާސީ ދާއިރާއިން ކިޔަވައިދޭ އެކަޑެމީއެއް ގާއިމުކުރުމަށާއި، ތިންކު ޓޭންކެއް ގާއިމުކުރުމަށާއި، މާލީ ގޮތުން ޕާޓީއަކީ ފުދުންތެރި ޕާޓީއަކަށް ހެދުމަށް އިމާރާތް ހަދައި ކުއްޔަށް ދިނުމުގެ ވިޔަފާރިކުރަން އޭނާ ހުށަހެޅުއްވި އެވެ.
ތިންކު ޓޭންކެއް އުފެއްދުމުގެ މަގުސަދާ ގުޅޭ ގޮތުން ފައްޔާޒު ވިދާޅުވީ އެފަދަ މުއައްސަސާއެއް ގާއިމުކުރުމުގެ މައިގަނޑު ބޭނުމަކީ ޕާޓީގެ ފަރާތުން ރަނގަޅު ސިޔާސަތުތަކެއް އެކުލަވައިލުމަށް ބޭނުންވާ ދިރާސާތައްކޮށް އެކުލަވައިލާ ސިޔާސަތުތައް ކުރިއެރުވުން ކަމަށެވެ.
ފައްޔާޒު އިތުރަށް ވިދާޅުވީ މިހާރުވެސް ޕާޓީގެ އަސާސީ ގަވާއިދުގެ ތެރޭގައި ޕާޓީގެ އެތެރޭގެ ގުނަވަނެއްގެ ގޮތުގައި ތިންކު ޓޭންކެއް ގާއިމުކުރަން ހިމަނާފައި އޮންނަ ކަމަށެވެ. ނަމަވެސް ވިސްނުންފުޅަކީ އެމްޑީޕީގެ ފަރާތުން ރަޖިސްޓްރީކޮށް ވަކިން ތިންކު ޓޭންކެއް ގާއިމުކުރެއްވުންކަމަށްވެސް ވިދާޅުވި އެވެ.
"އަޅުގަނޑުމެންގެ އަސާސީ ގަވާއިދުގައި ދާއިމީ ކޮމިޓީތަކުގެ ތެރޭގައި ތިންކް ޓޭންކެއްގެ ވާހަކަ އެބަ އޮވޭ. އެހެންނަމަވެސް އަޅުގަނޑުމެން މިހާރު މި ހިޔާރު ކުރަނީ ހަމަ ވަކިން، ވަކި މުއައްސަސާއެއް ގޮތުގައި އެމްޑީޕީގެ ފަރާތުން ރަޖިސްޓްރީ ކޮށްގެން އެފަދަ ތިންކް ޓޭންކެއް އެކުލަވާލަން،" އޭނާ ފާހަގަކުރެއްވި އެވެ.
އެމްޑީޕީގެ މަގުސަދަކީ ސިޔާސީ މައިދާނަށް ނުކުންނަ މީހުންނާއި އެ ދާއިރާގައި މިހާރުވެސް އުޅޭ މީހުންނަކީ ގާބިލު މީހުން ކމށް ހެދުންކަން ފާހަގަކުރައްވައި ފައްޔާޒު ވިދާޅުވީ ތައުލީމީ މުއައްސަސާއެއްގެ ގޮތުގައި ކަމާ ބެހޭ އިދާރާތަކުގައި ރަޖިސްޓްރީކޮށްގެން ޕާޓީއާ ވަކިން މުސްތަގިއްލުކޮށް އެތަން ހިންގަވަން ބޭނުންފުޅުވާ ކަމަށެވެ.
"އަޅުގަނޑު އުއްމީދުކުރަން އެތަނުން ތަމްރީނު ވެގެން، އެހެން ޕާޓީތަކަށް ވެސް މީހުން ނުކުންނާނެ ކަމަށް. އަދި ރާއްޖޭން ބޭރުން ވެސް، އެތަނުގައި ކިޔެވުމަށް މީހުން އަންނާނެ ކަމަށް. މިއީ އެކަމުގެ ފެށުމެއް،" ފައްޔާޒު ވިދާޅުވި އެވެ.
ސިޔާސީ ޕާޓީއެއްގެ ނަމުގައި އެފަދަ މުއައްސަސާއެއް ގާއިމުކުރުމާމެދު ގާނޫނުގައި ބަޔާންކުރާ ގޮތެއް ސާފުނުވާތީ ޕާޓީގެ ނަމުގައި އެކަޑެމީ ހިންގޭނެ ހާލަތެއް ނެތްނަމަ، ޕާޓީގެ މެންބަރެއްގެ ނަމުގައި ނަމަވެސް އެ މުއައްސަސާ ގާއިމުކުރުމާމެދު ގައުމީ މަޖިލީހުގެ މެންބަރުންގެ ހިޔާލަކަށް ފައްޔާޒު އެދިވަޑައިގަތެވެ.
މިރޭގެ ގައުމީ މަޖިލީހަށް ފައްޔާޒު ހުށަހެޅުއްވި ހުރިހާ ކަމެއް ފާސްކުރުމަށް ގައުމީ މަޖިލީހުގެ އަޣުލަބިއްޔަތުން ނިންމާފައިވެ އެވެ. މިއީ ސިޔާސީ ޕާޓީއަކުން ތިންކު ޓޭންކާއި އެކަޑެމީއެއް ގާއިމުކޮށް ޕާޓީގެ ނަމުގައި ވިޔަފާރިކުރަން ނިންމާ ފުރަތަމަ ފަހަރެވެ.
ކޮމެންޓް
Republic of Maldives