އައިސީޖޭގައި އޮތް ޣައްޒާ މައްސަލައަށް ރާއްޖެ ވަދެއްޖެ
ރައީސް ވިދާޅުވީ ޣައްޒާގައި ހިންގަމުންދާ ގާނޫނާ ހިލާފު އަމަލުތަކަށް އިސްރާއީލު ޖަވާބުދާރީ ކުރުވަން ޖެހޭނެ ކަމަށެވެ.
އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) ގައި ކުރިއަށްދާ ޣައްޒާގެ މައްސަލައަށް ދިވެހިރާއްޖެއިން ތަދައްޚުލުވާން ހުށައަޅައިފި އެވެ.
އައިސީޖޭ ގައި ސައުތު އެފްރިކާއިން އިސްރާއީލާ ދެކޮޅަށް ހުށަހެޅި މި މުހިންމު މައްސަލައިގެ ތެރެއަށް ދިވެހިރާއްޖެއިން ތަދައްޚުލުވާން ހުށައެޅީ ޒަމާނުއްސުރެ ރާއްޖެއިން ފަލަސްތީނުގެ ސިޔާދަތީ މިނިވަން ދައުލަތެއް ގާއިމުކުރުމަށް ކުރަމުންގެންދާ މުހިންމު މަސައްކަތާ އެއްގޮތްވާގޮތުގެ މަތިން ކަމަށް ސަރުކާރުން ބުންޏެވެ.
ސަރުކާރުގެ މި ނިންމުމާއި ގުޅޭގޮތުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވީ ޣައްޒާގައި ހިންގަމުންދާ ގާނޫނާ ހިލާފު އަމަލުތަކަށް އިސްރާއީލު ޖަވާބުދާރީ ކުރުވަން ޖެހޭނެ ކަމަށެވެ. އަދި ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ޖަރީމާތައް ހުއްޓާލުމަށް ގޮވާލައްވާ ގާނޫނުގެ ވެރިކަން ދަމަހައްޓަން ޖެހޭ ކަމަަށް އެމަނިކުފާނު ވިދާޅުވި އެވެ.
އިންސާނީ ހައްގުތައް ނެގެހެއްޓުމަށް ރާއްޖެއިން އަބަދުވެސް ވަކާލާތުކުރާ ކުރާކުރުން ރައީސް ވަނީ ތަކުރާރު ކުރައްވާފަ އެވެ. އަދި ވިދާޅުވީ ރާއްޖެއިން ހިޔާރު ކުރާނީ އިންސާނީ، ސުލްހަ އާއި އިންސާފު ކަމަަށެވެ. އަދި މިކަމުގައި ދިވެހި ސަރުކާރު ސާބިތުކަމާއެކު ފަލަސްތީނުގެ ރައްޔިތުންނަށް އެންމެ ފުރިހަމައަށް އެއްބާރުލުން ދެމުން ގެންދަވާނެކަން ވެސް ރައީސުލްޖުމްހޫރިއްޔާ ހާމަކުރެއްވިއެވެ.
ރައީސުލްޖުމްހޫރިއްޔާ ވަނީ ވަގުތުން މިކަމަށް ގާނޫނީ ފިޔަވަޅު އެޅުމަށް ގޮވާލެއްވުމުގެ އިތުރުން 1967ވަނަ އަހަރުގެ ކުރިން އޮތް ބޯޑަރުތަކާ އެއްގޮތްވާ ގޮތުގެމަތިން ފަލަސްތީނުގެ ވެރިރަށަކީ އިރުމަތީ ގުދުސް ކަމުގައި ކަނޑައަޅައި، ފަލަސްތީނުގެ ސިޔާދަތީ މިނިވަން ދައުލަތެއް ގާއިމުކުރުމަށް ގޮވާލައްވާފަ އެވެ.
ކޮމެންޓް
Republic of Maldives