އީރާނުން އިސްރާއީލަށް ވަރުގަދަ ހަމަލާތަކެއް ދީފި
އީރާނުގެ ހަމަލާތައް އަމާޒުކޮށްފައިވަނީ، އިސްރާއީލުގެ މުހިއްމު އަސްކަރީ އަމާޒުފަތްގަނޑުތަކަށާއި، ސަލާމަތީ މުހިއްމު ސަރަހައްދުތަކަށެވެ.
އީރާނުގެ ހަމަލާތައް އަމާޒުކޮށްފައިވަނީ، އިސްރާއީލުގެ މުހިއްމު އަސްކަރީ އަމާޒުފަތްގަނޑުތަކަށާއި، ސަލާމަތީ މުހިއްމު ސަރަހައްދުތަކަށެވެ. އީރާނުން ބުނި ގޮތުގައި މި ހަމަލާއަކީ އިސްރާއީލުން ޣައްޒާއަށާއި ލުބުނާނަށް ދެމުންދާ ހަމަލާތަކުގެ ބަދަލު ހިފުމަށް ދިން ހަމަލާތަކެކެވެ.
އީރާނުގެ ރިވޮލޫޝަނަރީ ގާޑުން ބުނެފައިވަނީ މި ހަމަލާތަކުގެ ރައްދުގައި އިސްރާއީލުން އީރާނަށް ހަމަލާއެއް ދީފިނަމަ އިސްރާއީލު ސުންނާފަތިކޮށްލާ ވަރުގެ ވަރުގަދަ ހަމަލާތަކެއް އިސްރާއީލަށް ރައްދުކުރާނެ ކަމަށެވެ.
އިސްރާއީލު އަސްކަރިއްޔާގެ ތަރުޖަމާން ޑެނިއަލް ހަގޭރީ ވިދާޅުވީ އިސްރާއީލުގެ ވައިގެ ދިފާއީ ނިޒާމުން އީރާނުގެ ގިނަ މިސައިލުތައް ވައްޓައިލި ކަމަށެވެ. އަދި އުތުރު އަދި މެދު ތެރޭ އިސްރާއިލަށް މަދު މިސައިލުތަކެއް އަރާފައިވާކަމަށް އޭނާ ވިދާޅުވި އެވެ.
ވައިގެ ތެރޭގައި ގޮއްވައިލި މިސައިލުތަކުގެ ބައިތައް ތަލްއަވީވަށް ވެއްޓުމުގެ ސަބަބުން ދެމީހަކަށް އަނިޔާވެފައިވާކަމަށް އިސްރާއީލުގެ އެމަޖެންސީ ސާވިސްއިން ރިޕޯޓުކުރި އެވެ. އެހެން ސަރަހައްދުތަކުގައިވެސް ބައެއް މީހުންނަށް އަނިޔާވެފައިވާކަމަށް ރިޕޯޓުތައް ބުނެ އެވެ.
އީރާނުގެ ދައުލަތުގެ ޓީވީން ރިޕޯޓުކުރި ގޮތުގައި ފޮނުވައިލި ބައެއް ބެލިސްޓިކް މިސައިލުތަކުގެ އަމާޒުފަތްގަނޑަކީ އިސްރާއީލުގެ ޓޭންކުތަކެވެ. އެއީ ޣައްޒާގެ ދެކުނާއި އުތުރު ވަކިކުރުމަށް އިސްރާއީލުން ގާއިމުކުރި ނެޓްޒަރިމް ކޮރިޑޯގައި ހުރި ޓޭންކުތަކެކެވެ.
ކޮމެންޓް
Republic of Maldives