ޖައުހަރީ މަރުވެފައި އޮއްވާ ފެނުމުގެ ކުރިން މޫދުގައި މަސްބާނަން އުޅުނު

އުސްފަސްގަނޑު ކައިރިން ކަނޑުމަތީން މަރުވެފައި އޮއްވާ އިއްޔެ ފެނުނު ހ. ވެލަސްފަރުގެ، އިބްރާހީމް ޖައުހަރީ މޫދަށް މަސްބާނަން ފައިބާ އުޅުނު ކަމަށް ފުލުހުން ބުނެފި އެވެ.

އުަސްފަސްގަނޑާ ދިމާ ކަނޑުމަތީ މީހަކު މަރުވެފައި އޮތް ކަމުގެ ރިޕޯޓު ފުލުހުންނަށް ކޮށްފައި ވަނީ އިއްޔެ ހަވީރު 5:06 ހާއިރު އެވެ. 

މި މައްސަލައިގެ އަޕްޑޭޓެއް ދެމުން ފުލުހުން މިއަދު ބުނެފައި ވަނީ ބްރިޖާ ދިމާލުން އޭނާ މަސްބާނަން މޫދަށް ފައިބާ އުޅުނު ކަމަށް މައުލޫމާތު ލިބިފައިވާ ކަމަށެވެ.

"ސެޕްޓެމްބަރު 30 ވަނަ ދުވަހުގެ 15:04 އެހާކައްހާއިރު ބްރިޖް ކައިރިން މޫދަށް މަސްބާނަން ފޭބިކަން މިހާތަނަށް ބެލި ބެލުމުން އެނގިފައިވޭ،" ފުލުހުން ބުންޏެވެ.

އުމުރުން 62 އަހަރުގެ ޖައުހަރީ އަކީ ފޮޓޯގްރާފަރެކެވެ. އޭނާ އަކީ ސިޔާސީ ހަރަކާތްތަކުން ވަރަށް ބޮޑަށް ފާހަގަ ކުރެވުނު މީހެކެވެ. އެންމެ ބޮޑަށް އޭނާ ފާހަގަކޮށްލެވެނީ ރާއްޖޭގައި މިހާރު މި އޮތް ވެރިކަމުގެ ނިޒާމު ގެންނަން، ކުރީގެ އިދިކޮޅު ފަރާތްތަކުން ހިންގި "އިސްލާހީ ހަރަކާތް" ފޮޓޯ ނަގައި، އެ ހަރަކާތުގައި ވެރިގަދައަށް އުޅުނު އެކްޓިވިސްޓެއްގެ ގޮތުގަ އެވެ.