ރައީސް އދގައި ރާއްޖެ ތަމްސީލުކޮށްދެއްވީ ވިސްނުންތެރިކަމާއެކު ފުރިހަމައަށް: ގާސިމް

ރައީސުލްޖުމްހޫރިއްޔާ ޑރ.މުހައްމަދު މުއިއްޒު އދގެ އާންމު މަޖިލީހުގެ 79 ވަނަ ބައްދަލުވުމުގައި ބައިވެރިވެވަޑައިގެން ދިވެހިރާއްޖެ ތަމްސީލުކޮށްދެއްވީ ވަރަށް ވިސްނުންތެރިކަމާއެކު ފުރިހަމައަށް ކަމުގައި ޖުމްހޫރީ ޕާޓީގެ ލީޑަރު ގާސިމް އިބްރާހީމް ވިދާޅުވެއްޖެ އެވެ. 

އދ.ގެ އާންމު މަޖިލީހުގެ ޖަލްސާގައި ތަގުރީރުކުރެއްވުމަށް ކުރެއްވި ދަތުރުފުޅު ނިންމަވައިލެއްވުމަށްފަހު ރާއްޖެއަށް ރައީސް ވަޑައިގަތުމުން އެމަނިކުފާނަށް މަރުހަބާ ވިދާޅުވެ އެކްސްގައި ގާސިމް ކުރެއްވި ޕޯސްޓެއްގައި ރައީސަށް މަރުހަބާ ވިދާޅުވި އެވެ. 

ރާއްޖެއަކީ ކުޑަ ގައުމެއް ނަމަވެސް މީގެ ކުރިން ރާއްޖޭގެ ރައީސުން އދއަށް ވަޑައިގެން ރާއްޖެއަށް ދިމާވެފައިވާ ގޮންޖެހުންތަކާއި ދުނިޔެއަށް ކުރިމަތިވެފައިވާ އެކި ކަންކަމުގައި ރާއްޖެއިން ދެކޭ ގޮތް މުނާސަބު ގޮތެއްގައި އަޑުއުފުއްލަވާފައިވާކަމަށް ގާސިމް ވިދާޅުވި އެވެ. 

އދ.ގައި ރައީސް ދިވެހިރާއްޖެ ތަމްސީލުކޮށްދެއްވީ ވަރަށް ފުރިހަމައަށްކަމަށާއި، އެމަނިކުފާނު ދައްކުވައިދެއްވީ ދިވެހިރާއްޖެއަކީ ފަހުރުވެރިވުން ހައްގު އަމިއްލަ ވިސްނުންތަކާއި އިލްމީ އަސާސްތަކުގެ މައްޗަށް ބިނާވެފައިވާ ތަސައްވުރެއް އޮތް ގައުމެއްކަން ކަމުގައި ގާސިމް ވިދާޅުވި އެވެ. 

"ނަމަވެސް ޝައްކެއްނެތް ގޮތުގައި، މީގެ 59 އަހަރު ކުރީން ދިވެހީންގެ ފަޚުރުވެރި މިނިވަން ދިދަ އދ ގެ އިދާރާގައި ވިހުރެންފެށިފަހުން، މި ޤައުމުގެ ވެރިޔަކު އދ ގައި ދިވެހި ޤައުމު ތަމްސީލް ކުރުމުގައި އަދުގެ ރައީސުލް ޖުމްހޫރިއްޔާ ޑރ މުޙައްމަދު މުޢިއްޒު ދިވެހިޤައުމު ތަމްސީލް ކޮށްދެއްވީ، ނުހަނު ވިސްނުންތެރިކަމާއި އެކު ވަރަށް ފުރިހަމަ އަދި އެހާމެ މުނާސަބުކޮށް ކަމަށް އަޅުގަނޑު ދެކެން،" ރައީސް އދ.ގައި ރާއްޖެ ތަމްސީލު ކުރެއްވި ގޮތަށް ތާރީފު ކުރައްވަމުން ގާސިމް ވިދާޅުވި އެވެ. 

"މި ލޮބުވެތި ޤައުމަކީ ފަޚުރުވެރި، ކެރޭ، ހަރުދަނާ، ދުރުވިސްނޭ، ޢިލްމާއި ހުނަރު ލިބިފައިވާ، ތަރައްޤީއަށް އުންމީދު ކުރާ ތަޞައްވަރެއް އޮތް، އަދި މުޅި ދުނިޔޭގެ ކުރިމަތީގައި ބަސްބުނަން ކެރޭ ޤައުމެއްކަން، ރައީސް ޑރ މުޢިއްޒު އެވަނީ ވަރަށް ސާބިތު ކަމާއި އެކު ދައްކުވައިދެއްވާފައި،" 

ކުރީގެ ރައީސް ޔާމީނަށް އިޝާރަތްކުރައްވައި ގާސިމް ވިދާޅުވެފައިވަނީ ފަސް އަހަރުގެ ދައުރެއްގައި އދގައި ރާއްޖެ ތަމްސީލުކުރައްވަން ކެރިވަޑައިނުގެންނެވި ބޭފުޅަކަށް ރައީސް މުއިއްޒުގެ ތަގުރީރު އޮޅުންނުފިލާވަޑައިނުގެންނެވި ނަމަވެސް ދުނިޔޭގެ ސަމާލުަކން އެމަނިކުފާނު އދ.ގެ އާންމު މަޖިލީހުގައި ދެއްވި ތަގުރީރަށް ލިބުނު ކަމަށެވެ. 

"މީގެ އިތުރުން އދގެ ސަލާމަތީ މަޖިލީހުގެ ތަޅުމުގައި ތަގުރީރު ކުރެއްވި ރާއްޖޭގެ ފުރަތަމަ ރައީސް އަކީވެސް އެމަނިކުފާނު ކަމަށް އެވަނީ ތާރީހުގައި ލިޔެވިފައި. އދ ގެ 78 ވަނަ ޢާންމު ބައްދަލުވުމުގެ ހަވާސާގައި ކުރިއަށް ދިޔަ މުހިންމު އެތައް ބައްދަލުވުމެއްގެ ރިޔާސަތުގައި ކޯ-ޗެއަރއެއްގެ ހައިސިއްޔަތުން ރައީސް މުޢިއްޒު ވަނީ އިސް ދައުރެއް އަދާކުރައްވާފައި." ގާސިމް ވިދާޅުވި އެވެ. 

ގާސިމް އިތުރަށް ފާހަގަކުރެއްވީ ރައީސް ފަލަސްތީނު މައްސަލާގައި ސިހުޔޫނީ ދައުލަތުން ހިންގަމުންދާ ޖަރީމާތައް ކުށްވެރިކުރައްވައި ދެއްކެވި ވާހަކަފުޅަކީ ދުނިޔޭގެ ގިނަ ގައުމުތަކާއި ވަކިން ހާއްސަކޮށް އިސްލާމީ އުންމަތުން ބަލަައިގަނެފައިވާ ނުހަނު މަތީ ތަރުހީބެއް ލިބުނު ވާހަކަަފުޅެއް ކަމަށެވެ. 

އަދި 2040 ވަނަ އަހަރު އަންނަންވާއިރަށް ރާއްޖެއަކީ ތަރައްގީވެފައިވާ ގައުމަކަށް ހެއްދެވުމަށް ރައީސް ހުށަހެޅުއްވި ތަސައްވުރަކީ ދިވެހިފަސްގަނޑާއި ރައްޔިތުންނާމެދު ރައީސް ދެއްކެވި ނަމޫނާއެއް ކަމުގައި ފާހަގަކުރައްވައި އެމަނިކުފާނަށް ގާސިމު ޝުކުރު އަދާކުރެއްވި އެވެ.